ಮಂಗಳವಾರ ನಿಧನರಾದ ನ್ಯಾಯಮೂರ್ತಿ ಎಂ.ರಾಮಾ ಜೋಯಿಸ್ ಅವರು ಶಿಕ್ಷಕ ವಲಯದಲ್ಲಿ ಸ್ಮರಣೀಯರು. ಅವರು ವಕೀಲರಾಗಿ ಕಾರ್ಯನಿರ್ವಹಿಸುತ್ತಿದ್ದಾಗ ರಾಜ್ಯದ ಸಾವಿರಾರು ಶಿಕ್ಷಕರಿಗೆ ನೆರವಾಗಿದ್ದರು. ಅಂದಿನ ಸರ್ಕಾರವು ಶಿಕ್ಷಕರ ನಿವೃತ್ತಿ ವಯಸ್ಸನ್ನು 58ರಿಂದ 55ಕ್ಕೆ ಇಳಿಸಿತ್ತು. ಕೆಲವು ಶಿಕ್ಷಕರು ನ್ಯಾಯಾಲಯದ ಮೆಟ್ಟಿಲೇರಿ ತಡೆಯಾಜ್ಞೆ ತಂದರು. ಯಾರೆಲ್ಲ ತಡೆಯಾಜ್ಞೆ ತಂದರೋ ಅವರನ್ನು ಮಾತ್ರ ಸರ್ಕಾರ 58ರವರೆಗೆ ಸೇವೆಯಲ್ಲಿ ಮುಂದುವರಿಸಿತು. ಇದರಿಂದಾಗಿ 55 ವರ್ಷದ ಅಂಚಿಗೆ ಬಂದ ಶಿಕ್ಷಕರೆಲ್ಲರೂ ಕೋರ್ಟ್ ಮೆಟ್ಟಿಲೇರುತ್ತಿದ್ದರು. ದೂರದ ಊರಿನ ಶಿಕ್ಷಕರು ರಾಮಾ ಜೋಯಿಸ್ ಅವರಿಗೆ ₹ 120 ಮನಿಯಾರ್ಡರ್ ಮಾಡಿದರೆ ಸಾಕು, ಕೋರ್ಟಿನ ತಡೆಯಾಜ್ಞೆ ಅವರ ಕೈ ಸೇರುತ್ತಿತ್ತು. ಮೂರು ವರ್ಷಗಳ ಸೇವಾ ಅವಧಿ ದೊರೆಯುತ್ತಿತ್ತು.