ಸರ್ಕಾರಿ ನೌಕರರು ಮತ್ತು ಅವರ ಕುಟುಂಬದ ಸದಸ್ಯರಿಗೆ ₹ 50 ಲಕ್ಷದವರೆಗೆ ಉಚಿತ ಚಿಕಿತ್ಸೆ ಕೊಡಿಸುವ ಉದ್ದೇಶವನ್ನು ಸರ್ಕಾರಿ ನೌಕರರ ಸಂಘ ಹೊಂದಿದ್ದು, ಈ ಯೋಜನೆಗೆ ತಗಲುವ ವೆಚ್ಚವನ್ನು ಭರಿಸಲು ಹಣಕಾಸು ಇಲಾಖೆ ಒಪ್ಪಿರುವುದಾಗಿ ವರದಿಯಾಗಿದೆ (ಪ್ರ.ವಾ., ಡಿ. 2). ಇದು ಒಳ್ಳೆಯ ಯೋಜನೆ. ಆದರೆ ಈ ಸೌಲಭ್ಯದಿಂದ ಅನುದಾನಿತ ಖಾಸಗಿ ಸಂಸ್ಥೆಗಳ ನೌಕರರು ಹೊರಗುಳಿದಿರುವುದು ವಿಪರ್ಯಾಸವೇ ಸರಿ. ಅನುದಾನಿತ ನೌಕರರು ಸರ್ಕಾರದಿಂದ ವೇತನ, ಭತ್ಯೆಯಂತಹ ಸೌಲಭ್ಯಗಳನ್ನು ಪಡೆಯುತ್ತಿದ್ದರೂ ಈ ಯೋಜನೆ ಮಾತ್ರ ಅವರನ್ನು ಒಳಗೊಂಡಿಲ್ಲವೇಕೆ? ಅವರಿಗೆ ಅನಾರೋಗ್ಯದ ಸಮಸ್ಯೆಗಳು ಕಾಡುವುದಿಲ್ಲವೇ? ಇದನ್ನು ಸರ್ಕಾರ ಗಂಭೀರವಾಗಿ ಪರಿಶೀಲಿಸಬೇಕಾಗಿದೆ.
