ಡೊನಾಲ್ಡ್ ಟ್ರಂಪ್‍ನ್ನು 'ದೇವ'ರಾಗಿಸಿದ ತೆಲಂಗಾಣದ ರೈತ!

ತೆಲಂಗಾಣ: ಇಲ್ಲಿನ ಜನ್‍ಗಾಂವ್ ಜಿಲ್ಲೆಯ ಕೊನ್ನೆ ಎಂಬ ಗ್ರಾಮದ  ಬುಸ್ಸಾ ಕೃಷ್ಣ ಎಂಬವರ ಮನೆಯಲ್ಲಿ ದೇವರ ಕೋಣೆಯಲ್ಲಿ ದೇವರ ಫೋಟೊ ಜತೆ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಫೋಟೊ ಇದೆ. 31ರ ಹರೆಯದ ಬುಸ್ಸಾ ಕೃಷ್ಣ ರೈತ. ಪ್ರತಿನಿತ್ಯ ದೇವರಿಗೆ ಪೂಜೆ ಮಾಡುವಾಗ ಇಲ್ಲಿ ಟ್ರಂಪ್‍ಗೂ ಪೂಜೆ ಸಲ್ಲುತ್ತದೆ. ಟ್ರಂಪ್ ಫೋಟೊಗೆ ಅರಶಿನ, ಕುಂಕುಮ ಹಚ್ಚಿ, ಹೂ ಅರ್ಪಿಸಿ ಆರತಿ ಮಾಡಲಾಗುತ್ತಿದೆ.

ಕಳೆದ ವರ್ಷ ಫೆಬ್ರುವರಿಯಲ್ಲಿ ಅಮೆರಿಕದ ಕನ್ಸಾಸ್‌ನಲ್ಲಿ ತೆಲಂಗಾಣದ ಎಂಜಿನಿಯರ್ ಶ್ರೀನಿವಾಸ ಕೋಚಿಭೊಟ್ಲ ಅವರನ್ನು ಗುಂಡಿಕ್ಕಿ ಹತ್ಯೆಗೈಯ್ಯಲಾಗಿತ್ತು. ಅಮೆರಿಕದಲ್ಲಿ ಭಾರತೀಯರ ಮೇಲೆ ನಡೆದ ದ್ವೇಷಪರಾಧ ಕೃತ್ಯ ಇದಾಗಿತ್ತು. ಈ ಪ್ರಕರಣದ ಬಗ್ಗೆ ಟ್ರಂಪ್ ಮೌನ ವಹಿಸಿದ್ದರಿಂದ ಅಮೆರಿಕದೊಂದಿಗೆ  ರಾಜತಾಂತ್ರಿಕ ಕ್ರಮಗಳನ್ನು ಕೈಗೊಳ್ಳದಿರಲು ಭಾರತ ತೀರ್ಮಾನಿಸಿತ್ತು. ಕೋಚಿಭೊಟ್ಲ ಹತ್ಯೆ ಪ್ರಕರಣದ ನಂತರ ಕೃಷ್ಣ ಅವರು ಟ್ರಂಪ್‍ಗೆ ಈ ರೀತಿ ಪೂಜೆ ಮಾಡಲು ಆರಂಭಿಸಿದ್ದರು.

ಪೂಜೆ ಯಾಕೆ?
ಕೋಚಿಭೊಟ್ಲ ಹತ್ಯೆ ಪ್ರಕರಣದಿಂದ ನನಗೆ ತುಂಬಾ ನೋವಾಗಿದೆ.  ಅಮೆರಿಕದ ಜನರ ಮೇಲೆ ಭಾರತೀಯರಿಗೆ ಯಾವ ರೀತಿ ಪ್ರೀತಿ, ವಿಶ್ವಾಸ ಇದೆ ಎಂದು ಟ್ರಂಪ್ ಮತ್ತು ಅಮೆರಿಕದ ಜನರಿಗೆ ತಿಳಿಯಲಿ ಎಂಬ ಕಾರಣದಿಂದ ಟ್ರಂಪ್‍ಗೆ ಪೂಜೆ ಸಲ್ಲಿಸುತ್ತಿದ್ದೇನೆ. ನನ್ನ ಈ ಪ್ರಾರ್ಥನೆ ಒಂದು ದಿನ ಟ್ರಂಪ್‍ಗೆ ತಲುಪುತ್ತದೆ ಎಂಬ ಭರವಸೆ ಇದೆ. ಆಧ್ಯಾತ್ಮದಿಂದ ಎಲ್ಲವನ್ನೂ ಗೆಲ್ಲಬಹುದು ಎಂಬ ನಂಬಿಕೆಯುಳ್ಳವರು ಭಾರತೀಯರು, ಒಬ್ಬ ವ್ಯಕ್ತಿಯೊಂದಿಗೆ ನೇರ ಸಂಪರ್ಕ ಸಾಧ್ಯವಾಗದೇ ಇದ್ದರೆ ಅವರನ್ನು ಪ್ರೀತಿ ಮತ್ತು ಆರಾಧನೆ ಮೂಲಕ ಗೆಲ್ಲಬಹುದು. ನಾನಿಲ್ಲಿ ಮಾಡುತ್ತಿರುವುದು ಅದನ್ನೇ ಎಂದು ಕೃಷ್ಣ  ಹೇಳಿರುವುದಾಗಿ ಹಿಂದೂಸ್ತಾನ್ ಟೈಮ್ಸ್ ವರದಿ ಮಾಡಿದೆ.

ಅಂದಹಾಗೆ ಕೃಷ್ಣ ಅವರಿಗೆ ಟ್ರಂಪ್ ಬಗ್ಗೆ ಹೆಚ್ಚೇನೂ ಗೊತ್ತಿಲ್ಲ.
ಜಗತ್ತಿನ ಶಕ್ತಿಶಾಲಿ ಮತ್ತು ಪ್ರಭಾವಿ ನಾಯಕರು ಅವರು. ಅವರ ದಿಟ್ಟತನದ ನಿಲುವು ನನಗೆ ಇಷ್ಟ. ಅವರು WWF ಸ್ಪರ್ಧೆಯಲ್ಲಿ ಭಾಗವಹಿಸಿದ್ದರಿಂದ ಅವರು ಶಕ್ತಿಶಾಲಿಯೇ ಆಗಿರುತ್ತಾರೆ ಅಂತಾರೆ ಕೃಷ್ಣ.

ಕೃಷ್ ರಾಜ್ ಎಂಬ ಫೇಸ್‌ಬುಕ್ ಖಾತೆ ಹೊಂದಿರುವ ಇವರು ಟ್ರಂಪ್‍ಗೆ ಪೂಜೆ ಸಲ್ಲಿಸುತ್ತಿರುವ ಫೋಟೊಗಳನ್ನು ಅಪ್‍ಲೋಡ್ ಮಾಡುತ್ತಿರುತ್ತಾರೆ,
ಯಾರೊಬ್ಬರೂ ನನ್ನನ್ನು ಗಂಭೀರವಾಗಿ ತೆಗೆದುಕೊಂಡಿಲ್ಲ. ಕೆಲವೊಬ್ಬರು ನನ್ನನ್ನು ಹುಚ್ಚ ಅಂತಾರೆ. ಇಂಥಾ ಕುಗ್ರಾಮದಿಂದ ಸಲ್ಲಿಸಿದ ಪೂಜೆ ಟ್ರಂಪ್‍ಗೆ ಹೇಗೆ ತಲುಪುತ್ತದೆ ಎಂದು ಕೆಲವರು ಕೇಳುತ್ತಾರೆ. ಆದರೆ ನಾನು ಮಾಡುವ ಕಾರ್ಯದಲ್ಲಿ ನನಗೆ ನಂಬಿಕೆ ಇದೆ. ಜೂನ್ 19ರಂದು ಟ್ರಂಪ್‍ ನನಗೆ ಟ್ವಿಟರ್‍‍ನಲ್ಲಿ ಸಂದೇಶ ಕಳುಹಿಸಿದ್ದರು ಅಂತಾರೆ ಕೃಷ್ಣ. ಆ ಸಂದೇಶ ಟ್ರಂಪ್‍ ಕಳಿಸಿದ್ದೇ? ಎಂಬುದನ್ನು ದೃಢೀಕರಿಸುವ ಗೋಜಿಗೆ ಹೋಗದ ಕೃಷ್ಣ, ಒಂದು ವೇಳೆ ಟ್ರಂಪ್ ಭಾರತಕ್ಕೆ ಬಂದರೆ ನನ್ನನ್ನು ಖಂಡಿತ ಗುರುತುಹಿಡಿಯುತ್ತಾರೆ ಎಂದು ಹೇಳುತ್ತಾರೆ.