ಜೋಹಾನ್ಸ್‌ಬರ್ಗ್‌: ‘ದಕ್ಷಿಣ ಆಫ್ರಿಕಾ ಟೆಸ್ಟ್‌ ಕ್ರಿಕೆಟ್‌ ತಂಡದ ನಾಯಕತ್ವಕ್ಕೆ ತಾನೂ ಆಕಾಂಕ್ಷಿ’ ಎಂದು ತಂಡದ ಬ್ಯಾಟ್ಸಮನ್‌ ಏಡನ್‌ ಮರ್ಕರಮ್‌ ಹೇಳಿದ್ದಾರೆ. ಸಾರಥ್ಯ ಸಿಗದಿದ್ದರೆ ನಿರಾಶೆಯಂತೂ ಆಗುವುದಿಲ್ಲ ಎಂದು ಅವರು ಸೋಮವಾರ ನುಡಿದರು.
ಅನುಭವಿ ಆಟಗಾರ ಫಾಫ್‌ ಡು ಪ್ಲೆಸಿಸ್‌ ಅವರು ಮೂರೂ ಮಾದರಿಯ ತಂಡದ ನಾಯಕತ್ವಕ್ಕೆ ರಾಜೀನಾಮೆ ಸಲ್ಲಿಸಿದ ಬಳಿಕ ಕ್ರಿಕೆಟ್‌ ದಕ್ಷಿಣ ಆಫ್ರಿಕಾ (ಸಿಎಸ್‌ಎ), ಟೆಸ್ಟ್‌ ಮಾದರಿಗೆ ಹೊಸ ನಾಯಕನ ಹುಡುಕಾಟದಲ್ಲಿದೆ. ಕ್ವಿಂಟನ್‌ ಡಿ ಕಾಕ್ ಅವರು ಈಗಾಗಲೇ ಏಕದಿನ, ಟ್ವೆಂಟಿ–20 ಮಾದರಿಯ ಸಾರಥ್ಯ ವಹಿಸಿಕೊಂಡಿದ್ದಾರೆ.
‘ತಂಡದ ನಾಯಕತ್ವದ ವಿಚಾರಕ್ಕೆ ಅಷ್ಟೊಂದು ತಲೆ ಕೆಡಿಸಿಕೊಳ್ಳುವುದಿಲ್ಲ. ಅದೊಂದು ಅವಕಾಶ. ನನ್ನ ಹೆಸರು ಜನರ ಬಾಯಲ್ಲಿ ಓಡಾಡುತ್ತಿದೆ. ಹೀಗಾಗಿ ನಾನು ಮಾತನಾಡಬೇಕಿದೆ. ನಾಯಕತ್ವ ವಹಿಸಿಕೊಳ್ಳುವ ಅವಕಾಶ ಸಿಕ್ಕರೆ ಖುಷಿಯಾಗುತ್ತದೆ’ ಎಂದು ಮರ್ಕರಮ್‌ ಹೇಳಿದ್ದನ್ನು ಸ್ಪೋರ್ಟ್ 24 ಸುದ್ದಿ ಸಂಸ್ಥೆ ವರದಿ ಮಾಡಿದೆ.
