ಕ್ರೀಡಾ ಚಟುವಟಿಕೆಗಳಿಗೆ ಅಲ್ಪಪ್ರಮಾಣದಲ್ಲಿ ಪ್ರೇಕ್ಷಕರು

ಸಿಡ್ನಿ: ಮುಂಬರುವ ದಿನಗಳಲ್ಲಿ ಕೊರೊನಾ ವೈರಸ್‌ ಪ್ರಸರಣವು ಕುಂಠಿತವಾದಂತೆ ಕ್ರೀಡಾ ಚಟುವಟಿಕೆಗಳಲ್ಲಿ ಸಣ್ಣ ಪ್ರಮಾಣದ ಪ್ರೇಕ್ಷಕರ ಸಮೂಹ ಸೇರಬಹುದು ಎಂದು  ಆಸ್ಟ್ರೇಲಿಯಾದ ಉಪಮುಖ್ಯ ವೈದ್ಯಾಧಿಕಾರಿ ಪಾಲ್ ಕೆಲಿ ಹೇಳಿದ್ದಾರೆ.

ಆಸ್ಟ್ರೇಲಿಯಾದಲ್ಲಿ ಇಲ್ಲಿಯವರಿಗೆ 7200 ಜನರಿಗೆ ಸೋಂಕು ತಗುಲಿದೆ. ಅದರಲ್ಲಿ 102 ಮಂದಿ ಮೃತರಾಗಿದ್ದಾರೆ. ಕಳೆದೊಂದು ವಾರದಿಂದ ಕೋವಿಡ್‌ ನಿಂದಾಗಿ ಯಾವುದೇ ಸಾವು  ವರದಿಯಾಗಿಲ್ಲ. ಪ್ರತಿದಿನ ಗರಿಷ್ಠ 20 ಪ್ರಕರಣಗಳು ಮಾತ್ರ ವರದಿಯಾಗುತ್ತಿವೆ.  ಇದರಿಂದಾಗಿ ದೇಶದಲ್ಲಿ ಕ್ರೀಡಾಂಗಣಗಳನ್ನು ತೆರೆಯಲು ಅನುಮತಿ ನೀಡಲಾಗಿದೆ.

‘ಸಹಜ ಸ್ಥಿತಿಗೆ ಮರಳುವ ಹಾದಿಯಲ್ಲಿ ದೇಶವಿದೆ. ಜನರೂ ಕೂಡ ಹೊರಗೆ ಹೋಗಿ ಫುಟ್‌ಬಾಲ್ ಪಂದ್ಯಗಳನ್ನು ನೋಡಲು ಇಚ್ಛಿಸುತ್ತಿದ್ದಾರೆ.  ಈ ಕುರಿತು ಶುಕ್ರವಾರ ನಡೆಯಲಿರುವ ಸರ್ಕಾರದ ಸಭೆಯಲ್ಲಿ ಚರ್ಚಿಸಲಾಗುತ್ತಿದೆ’ ಎಂದು ಹೇಳಿದ್ದಾರೆ.