ಮಂಗಳೂರು: ಕರ್ನಾಟಕದ ರೋಷನಿ ಮತ್ತು ಆದ್ಯಲಕ್ಷ್ಮಿ ಅವರು ಮಂಗಳೂರು ರೈಫಲ್ ಕ್ಲಬ್ ಆಯೋಜಿಸಿರುವ ಮಂಗಳೂರು ಓಪನ್ ಶೂಟಿಂಗ್ ಚಾಂಪಿಯನ್‌ಷಿಪ್‌ನಲ್ಲಿ ಅಮೋಘ ಸಾಧನೆ ಮಾಡಿದರು. ಕದ್ರಿಯಲ್ಲಿರುವ ಕ್ಲಬ್‌ನ ಅಂಗಣದಲ್ಲಿ ಗುರುವಾರ ಆರಂಭಗೊಂಡ ಚಾಂಪಿಯನ್‌ಷಿಪ್‌ನ ರೈಫಲ್ ವಿಭಾಗದ ಆರಂಭಿಕ ಸುತ್ತುಗಳಲ್ಲಿ ರೋಷನಿ ಒಟ್ಟು 601.6 ಸ್ಕೋರು ಕಲೆ ಹಾಕಿದರೆ ಆದ್ಯಲಕ್ಷ್ಮಿ 601.5 ಸ್ಕೋರು ಸಂಗ್ರಹಿಸಿದರು.
ಪಿಸ್ತೂಲು ಶೂಟಿಂಗ್ ಸೀನಿಯರ್ ವಿಭಾಗದಲ್ಲಿ ತಮಿಳುನಾಡಿನ ತಂಗರಾಜೇಶ್ವರಿ 359 ಮತ್ತು ನವ್ಯ ಬಾನು 352 ಸ್ಕೋರು ಗಳಿಸಿದರು. ಯೂತ್‌ ವಿಭಾಗದಲ್ಲಿ ಝಾರ ಮಾನಿಪಾಡಿ 324 ಸ್ಕೋರುಗಳೊಂದಿಗೆ ಮಿಂಚಿದರು. ಆದರೆ ಪಿಸ್ತೂಲು ಶೂಟಿಂಗ್‌ನಲ್ಲಿ ಯಾರಿಗೂ ಐಎಸ್‌ಎಸ್‌ಎಫ್‌ ಮಟ್ಟವನ್ನು ತಲುಪಲು ಸಾಧ್ಯವಾಗಲಿಲ್ಲ. ನ್ಯಾಷನಲ್ ರೆಕಾರ್ಡ್ ಮಟ್ಟಕ್ಕೇ ಅವರು ಸಮಾಧಾನಪಟ್ಟುಕೊಂಡರು.
ರೈಫಲ್ ಶೂಟಿಂಗ್‌ನಲ್ಲಿ ಕೇರಳದ ನವೀನ್ ವಿನೋದ್ ಮತ್ತು ತಮಿಳುನಾಡಿನ ವಿಶ್ವ ಪಿ.ಆರ್‌ ಕ್ರಮವಾಗಿ ಒಟ್ಟು 384 ಮತ್ತು 376 ಸ್ಕೋರು ಗಳಿಸಿದರೆ ಕರ್ನಾಟಕದ ವಿ.ಪ್ರಭಾಕರನ್ 372, ರಿತೇಶ್‌ 365 ಹಾಗೂ ನಜೀಮಾ ಮಾನಿಪ್ಪಾಡಿ 364 ಸ್ಕೋರುಗಳೊಂದಿಗೆ ಭರವಸೆ ಮೂಡಿಸಿದರು.
