ಪ್ರಜಾವಾಣಿ ಸಾಧಕರು 2023 | ಅನುಷಾ - ಬೆನ್ನುಹುರಿಯ ನೋವು ಮೀರಿದ ಸಾಧನೆ

****

ಹೆಸರು: ಒ.ಸಿ. ಅನುಷಾ

ವೃತ್ತಿ: ದಿ ಅಸೋಸಿಯೇಷನ್‌ ಆಫ್‌ ಪೀಪಲ್‌ ವಿತ್‌ ಡಿಸೆಬಿಲಿಟಿ (ಎಪಿಡಿ) ಸಂಸ್ಥೆಯಲ್ಲಿ ಶಿಕ್ಷಕಿ

ಸಾಧನೆ: ಬೆನ್ನುಹುರಿ ಸಮಸ್ಯೆ ಮೀರಿಯೂ ಶಿಕ್ಷಣ, ಕ್ರೀಡಾಕ್ಷೇತ್ರದಲ್ಲಿ ಛಾಪು

ಆಕೆ ಎಲ್ಲ ಮಕ್ಕಳಂತೆಯೇ ಪುಟ್ಟ ಪುಟ್ಟ ಹೆಜ್ಜೆಯಿಡುತ್ತಾ ಪೋಷಕರ ಮುದ್ದಿನ ಮಗಳು.ಆಕೆಗೆ ಎರಡು ವರ್ಷವಿದ್ದಾಗ (1996) ಎದುರಾದ ಘಟನೆಯೊಂದು ಬದುಕಿಗೇ ಆಘಾತ ನೀಡಿತು. ಆದರೆ, ಸ್ಥೈರ್ಯ ಕಳೆದುಕೊಳ್ಳದೆ ಬದುಕು ರೂಪಿಸಿಕೊಂಡಿದ್ದಾರೆ ಒ.ಸಿ.ಅನುಷಾ. ಪ್ಯಾರಾ ಬ್ಯಾಡ್ಮಿಂಟನ್‌, ಬ್ಯಾಸ್ಕೆಟ್‌ಬಾಲ್‌ ಆಟಗಾರ್ತಿಯಾಗಿ ರಾಷ್ಟ್ರೀಯ ಹಾಗೂ ರಾಜ್ಯಮಟ್ಟದಲ್ಲಿ ಮಿಂಚುತ್ತಿದ್ದಾರೆ. ಚಿತ್ರದುರ್ಗ ಜಿಲ್ಲೆ ಹೊಳಲ್ಕೆರೆ ತಾಲ್ಲೂಕಿನ ಮಲ್ಲಾಡಿಹಳ್ಳಿಯ ಇವರು ಒ.ಎಸ್‌.ಚಿದಾನಂದ– ಆಶಾ ದಂಪತಿ ಪುತ್ರಿ. ಈಗ ಬೆಂಗಳೂರಿನಲ್ಲೇ ಕೆಲಸ.

ಕಟ್ಟಡದ ಮೊದಲ ಅಂತಸ್ತಿನಿಂದ ಬಿದ್ದ ಪರಿಣಾಮ ಅನುಷಾಗೆ ಬೆನ್ನುಹುರಿ ಸಮಸ್ಯೆ ಕಾಣಿಸಿಕೊಂಡಿತ್ತು. ಹಲವು ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆದರೂ ಚೇತರಿಕೆ ಸಾಧ್ಯವಾಗಲಿಲ್ಲ. ಅನುಷಾ ಅವರು ಅದೇ ನೋವಿನ ನಡುವೆಯೂ ಶಿಕ್ಷಣ ಪಡೆದು, ಈಗ ಕ್ರೀಡಾ ಕ್ಷೇತ್ರದಲ್ಲಿ ಸಾಧನೆ ತೋರುತ್ತಿದ್ದಾರೆ. ಭುವನೇಶ್ವರದಲ್ಲಿ ನಡೆದಿದ್ದ ರಾಷ್ಟ್ರೀಯ ಬ್ಯಾಡ್ಮಿಂಟನ್‌ನಲ್ಲಿ ಕಂಚು ಹಾಗೂ ರಾಜ್ಯಮಟ್ಟದ ಬ್ಯಾಸ್ಕೆಟ್‌ಬಾಲ್‌ ಸ್ಪರ್ಧೆಯಲ್ಲಿ ಬೆಳ್ಳಿಯ ಪದಕ ಪಡೆದಿದ್ದಾರೆ. ಮುಂದಿನ ರಾಷ್ಟ್ರೀಯ ಕ್ರೀಡಾಕೂಟಕ್ಕೆ ಅನುಷಾ ಸಿದ್ಧತೆಯಲ್ಲಿದ್ದಾರೆ.

‘ಡಿ.ಇಡಿ ಶಿಕ್ಷಣ ಪಡೆಯಲು ಮುಂದಾದ ವೇಳೆ, ಪ್ರಾಯೋಗಿಕ ಕಾರ್ಯ ನಡೆಸಲು ನಿಮ್ಮಿಂದ ಆಗದು. ಶಿಕ್ಷಕರಾಗುವವರು ಸಾಕಷ್ಟು ಓಡಾಟ ನಡೆಸಬೇಕೆಂದು ಡಿ.ಇಡಿ ಪ್ರವೇಶಕ್ಕೆ ಶಿಕ್ಷಣ ಸಂಸ್ಥೆಗಳು ನಿರಾಕರಿಸಿದ್ದವು. ಹೋರಾಟದ ಬಳಿಕ ಸಂಸ್ಥೆಯೊಂದರಲ್ಲಿ ಡಿ.ಇಡಿಗೆ ಪ್ರವೇಶವೂ ಸಿಕ್ಕಿತು. ಈಗ ಬಿಎ, ಬಿ.ಇಡಿ ಶಿಕ್ಷಣ ಸಹ ಪೂರೈಸಿದ್ದೇನೆ. ಪ್ರಸ್ತುತ ಬೆಂಗಳೂರಿನ ದಿ ಅಸೋಸಿಯೇಷನ್‌ ಆಫ್‌ ಪೀಪಲ್‌ ವಿತ್‌ ಡಿಸೆಬಿಲಿಟಿ (ಎಪಿಡಿ) ಸಂಸ್ಥೆಯಲ್ಲಿ ಶಿಕ್ಷಕಿ ಆಗಿ ಕೆಲಸ ಮಾಡುತ್ತಿದ್ದೇನೆ’ ಎಂದು ಹೇಳುತ್ತಾರೆ ಅನುಷಾ.

‘2017ರಲ್ಲಿ ಎಪಿಡಿ ಸಂಸ್ಥೆಯ ಬಗ್ಗೆ ತಿಳಿಯಿತು. ಅಲ್ಲಿಗೆ ಬಂದ ಮೇಲೆ ನನ್ನ ಬದುಕಿನ ಚಿತ್ರಣ ಬದಲಾಯಿತು’ ಎಂದು ಭಾವುಕರಾದರು.