ಆಸ್ಟ್ರೇಲಿಯಾ ಓಪನ್ ಟೆನಿಸ್: ಎರಡನೇ ಸುತ್ತಿಗೆ ಯೂಕಿ ಬಾಂಭ್ರಿ

ಮಂಗಳವಾರ ನಡೆದ ಆಸ್ಟ್ರೇಲಿಯಾ ಓಪನ್ ಟೆನಿಸ್ ಟೂರ್ನಿಯ ಕ್ವಾಲಿಫೈಯರ್ಸ್‌ನ ಮೊದಲ ಪಂದ್ಯದಲ್ಲಿ ಯೂಕಿ 6–4, 6–2ರಿಂದ ಪೋರ್ಚುಗಲ್‌ನ ಜೊವಾ ಡಾಮಿಂಗೀಸ್ ವಿರುದ್ಧ ಜಯಿಸಿ ಎರಡನೇ ಸುತ್ತಿಗೆ ಪ್ರವೇಶಿಸಿದರು.

2018ರಲ್ಲಿ ಅಮೆರಿಕ ಓಪನ್ ನಲ್ಲಿ ಭಾಗವಹಿಸಿದ ನಂತರ ಗಾಯಗೊಂಡಿದ್ದ ಯೂಕಿ ಗ್ರ್ಯಾನ್‌ಸ್ಲಾಂ ಟೂರ್ನಿಗಳಿಂದ ದೂರ ಉಳಿದಿದ್ದರು. ಇಲ್ಲಿ ನಡೆದ 68 ನಿಮಿಷಗಳ ಹೋರಾಟದಲ್ಲಿ ಯೂಕಿ ಮೇಲುಗೈ ಸಾಧಿಸಿದರು.

29 ವರ್ಷದ ಯೂಕಿಯ ಪರಿಣಾಮಕಾರಿ ರಿಟರ್ನ್ ಮತ್ತು ನೆಟ್‌ ಸಮೀಪದ ಆಟದ ಮುಂದೆ 248ನೇ ರ‍್ಯಾಂಕ್‌ನ ಜಾವೊ ಶರಣಾದರು. ಯೂಕಿ ಮಾಡಿದ ಚೆಂದದ ಸರ್ವ್‌ಗಳುಗಮನ ಸೆಳೆದವು.

ರಾಮಕುಮಾರ್, ಅಂಕಿತಾಗೆ ನಿರಾಶೆ: ಪುರುಷರ ಸಿಂಗಲ್ಸ್‌ನಲ್ಲಿ ರಾಮಕುಮಾರ್ ರಾಮನಾಥನ್ ನಿರಾಶೆ ಅನುಭವಿಸಿದರು. ದಿಟ್ಟ ಹೋರಾಟ ಮಾಡಿದರೂ ರಾಮಕುಮಾರ್‌ಗೆ ಜಯ ಒಲಿಯಲಿಲ್ಲ.

ಮೊದಲ ಸುತ್ತಿನ ಪಂದ್ಯದಲ್ಲಿ ರಾಮಕುಮಾರ್ 3–6, 5–7 ರಿಂದ ಇಟಲಿಯ ಜಿಯಾನ್ ಮೊರೊನಿ ವಿರುದ್ಧ ಸೋತರು. ಮೊರೊನಿಯ ಶರವೇಗದ ಸರ್ವ್‌ಗಳ ಮುಂದೆ ಭಾರತದ ಆಟಗಾರ ಹಿನ್ನಡೆ ಅನುಭವಿಸಿದರು.

ಮಹಿಳೆಯರ ಸಿಂಗಲ್ಸ್‌ನಲ್ಲಿ 203ನೇ ಶ್ರೇಯಾಂಕದ ಅಂಕಿತಾ 1–6, 0–6 ರಿಂದ 120ನೇ ರ್‍ಯಾಂಕ್‌ನ ಉಕ್ರೇನಿನ ಲಿಸಿಯಾ ಸುರೆಂಕೊ ವಿರುದ್ಧ ಸೋತರು. ಕೇವ 50 ನಿಮಿಷಗಳಲ್ಲಿ ಪಂದ್ಯ ಮುಗಿಯಿತು.

ಈ ಟೂರ್ನಿಗೆ ಬರುವ ಮುನ್ನ ಅಂಕಿತಾ ಅವರು ಕೋವಿಡ್ ಕಾಡಿತ್ತು. ದೀರ್ಘ ಚಿಕಿತ್ಸೆ ಮತ್ತು ವಿಶ್ರಾಂತಿಯ ನಂತರ ಕಣಕ್ಕೆ ಮರಳಿದ್ದಾರೆ.

‘ಕಳೆದ 14 ರಿಂದ 16 ದಿನಗಳಲ್ಲಿ ಒಂದು ದಿನವೂ ರೆಕೆಟ್ ಮುಟ್ಟಿಲ್ಲ. ಬೇರೆ ಯಾವ ಚಟುವಟಿಕೆಗಳನ್ನೂ ಮಾಡಿಲ್ಲ’ ಎಂದು ಪಂದ್ಯದ ನಂತರ ಅಂಕಿತಾ ಹೇಳಿದರು.