ಭಾನುವಾರ, ಮೇ 16, 2021
22 °C

ಗ್ಯಾಸ್‌ ಪೈಪ್‌ನಿಂದ ಸೋರಿಕೆ; ಆತಂಕ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಬೆಂಗಳೂರು: ಎಚ್‌ಎಸ್ಆರ್‌ ಲೇಔಟ್‌ನಲ್ಲಿ ಅಳವಡಿಸಿರುವ ಗ್ಯಾಸ್‌ ಪೈಪ್‌ ಒಡೆದು ಅನಿಲ ಸೋರಿಕೆಯಾಗಿದ್ದರಿಂದ, ಕೆಲ ಕಾಲ ಆತಂಕದ ವಾತಾವರಣ ನಿರ್ಮಾಣವಾಯಿತು.

ಒಂದನೇ ಹಂತದ 11ನೇ ಮುಖ್ಯರಸ್ತೆಯ 22ನೇ ಅಡ್ಡರಸ್ತೆಯ ನೆಲದಡಿ ‘ಗೇಲ್‌’ ಕಂಪನಿಯಿಂದ ಗ್ಯಾಸ್‌ ಪೈಪ್‌ಲೈನ್‌ ಅಳವಡಿಸಲಾಗಿದೆ. ಅದೇ ಜಾಗದಲ್ಲಿ ಕಾರ್ಮಿಕರು, ಶನಿವಾರ ಯಂತ್ರ ಮೂಲಕ ಏರ್‌ಟೆಲ್‌ ಮೊಬೈಲ್ ಕಂಪನಿಯ ಕೇಬಲ್ ಅಳವಡಿಸುತ್ತಿದ್ದರು.  

‘ರಾತ್ರಿ 7.30ರ ಸುಮಾರಿಗೆ ನೆಲದಡಿಯಲ್ಲಿದ್ದ ಗ್ಯಾಸ್‌ನ ಪೈಪ್‌ಗೆ ಹಾನಿಯಾಗಿತ್ತು. ನಂತರ, ಗ್ಯಾಸ್‌ ಸೋರಿಕೆಯಾಗಿ ವಾಸನೆ ಬರಲಾರಂಭಿಸಿತ್ತು. ಗಾಬರಿಗೊಂಡ ಜನ, ಮನೆಯಿಂದ ಹೊರಗೆ ಬಂದು ನಿಂತುಕೊಂಡರು’ ಎಂದು ಪ್ರತ್ಯಕ್ಷದರ್ಶಿಯೊಬ್ಬರು ಹೇಳಿದರು.

‘ಸ್ಥಳದಲ್ಲಿ ಗ್ಯಾಸ್‌ ಮಾತ್ರ ಸೋರಿಕೆಯಾಗುತ್ತಿತ್ತು. ಬೆಂಕಿ ಹೊತ್ತಿಕೊಂಡಿರಲಿಲ್ಲ. ಅಗ್ನಿಶಾಮಕ ದಳದ ಸರ್ಜಾಪುರ ಠಾಣೆಯ ಸಿಬ್ಬಂದಿ, ಸ್ಥಳಕ್ಕೆ ಬಂದು ಪರಿಶೀಲನೆ ನಡೆಸಿದರು. ಗೇಲ್‌ ಕಂಪನಿ ಸಿಬ್ಬಂದಿ, ಸೋರಿಕೆಯಾಗುತ್ತಿದ್ದ ಪೈಪ್‌ ಬದಲಾಯಿಸಿ ಹೊಸ ಪೈಪ್‌ ಅಳವಡಿಸಿದರು’ ಎಂದರು.

ಪೊಲೀಸರಿಗೆ ದೂರು: ‘ಗ್ಯಾಸ್‌ ಪೈಪ್‌ಲೈನ್ ಇರುವ ಜಾಗದಲ್ಲಿ ‘ಪೈಪ್‌ಲೈನ್ ಇದೆ. ಎಚ್ಚರಿಕೆ’ ಎಂಬ ಫಲಕ ಹಾಕಲಾಗಿದೆ.  ಏರ್‌ಟೆಲ್ ಕಂಪನಿಯವರು ಅನುಮತಿ ಪಡೆಯದೇ ಕೇಬಲ್ ಅಳವಡಿಸುವುದಕ್ಕಾಗಿ ರಸ್ತೆ ಅಗೆಯುತ್ತಿದ್ದರು. ಅವರ ನಿರ್ಲಕ್ಷ್ಯದಿಂದ ಪೈಪ್‌ ಒಡೆದಿರುವುದಾಗಿ ಗೇಲ್‌ ಅಧಿಕಾರಿಗಳು ಆರೋಪಿಸುತ್ತಿದ್ದಾರೆ’ ಎಂದು ಎಚ್‌ಎಸ್‌ಆರ್ ಲೇಔಟ್ ಪೊಲೀಸರು ಹೇಳಿದರು.

‘ಗೇಲ್ ಅಧಿಕಾರಿಗಳಿಂದ ದೂರು ಪಡೆಯಲಾಗಿದೆ. ಏರ್‌ಟೆಲ್ ಕಂಪನಿ ಪ್ರತಿನಿಧಿ ಹಾಗೂ ಕಾರ್ಮಿಕರನ್ನು ವಿಚಾರಣೆ ನಡೆಸಲಿದ್ದೇವೆ’ ಎಂದರು.  

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು