ಯುಗಾದಿಗೂ ಮುನ್ನವೇ ಹಣ್ಣು ತರಕಾರಿ ಬೆಲೆ ಏರಿಕೆ

ಬಿಸಿಲಿನ ಪರಿಣಾಮದಿಂದಾಗಿ ತರಕಾರಿ ದರ ದಿಢೀರ್‌ ಏರಿಕೆಯಾಗಿದ್ದು, ವಿಜಯನಗರ ಮಾರುಕಟ್ಟೆಯಲ್ಲಿ ಭಾನುವಾರ ಹುರುಳಿಕಾಯಿ, ನುಗ್ಗೇಕಾಯಿ ಕೆ.ಜಿ.ಗೆ ತಲಾ ₹150 ಹಾಗೂ ಸೇಬು₹180ರಂತೆ ಮಾರಾಟವಾಗುತ್ತಿದ್ದರೆ, ಹಾಪ್‌ಕಾಮ್ಸ್‌ನಲ್ಲಿ ಸೇಬು(ಚಿಲ್ಲಿ) ₹136ಕ್ಕೆ ಮಾರಾಟವಾಗುತ್ತಿದೆ.

‘ಬಿಸಿಲಿನ ತಾಪಮಾನ ಏರಿಕೆಯಾಗಿರುವುದರಿಂದ ಬಹುತೇಕ ನುಗ್ಗೇ ಗಿಡಗಳು ಸೊರಗುತ್ತಿವೆ. ಎಳೆ ಕಾಯಿಯೂ ಸಿಗುವುದು ಕಷ್ಟ. ಪೂರೈಕೆ ಪ್ರಮಾಣವೂ ತೀರ ಕಡಿಮೆ ಇದೆ. ಹಾಗಾಗಿ, ಪ್ರತಿ ಕೆ.ಜಿಗೆ ₹100 ದರವಿದ್ದ ನುಗ್ಗೇಕಾಯಿ ದರ ಇದೀಗ ₹150 ತಲುಪಿದೆ’ ಎನ್ನುತ್ತಾರೆ ವ್ಯಾಪಾರಿ ಯಲ್ಲಮ್ಮ.

ಸೊಪ್ಪಿನ ದರ ಏರಿಕೆ: ಕೊತ್ತಂಬರಿ ಸೊಪ್ಪಿನ ದರ 15 ದಿನಗಳಿಂದಲೂ ಏರುತ್ತಾ ಬಂದಿದ್ದು, ಒಂದು ಕಟ್ಟಿಗೆ ₹20 ರಿಂದ ₹30ಕ್ಕೆ ಮಾರಾಟವಾಗುತ್ತಿದೆ. ಕಳೆದ ವಾರ ₹ 20ರಿಂದ ₹ 25ಕ್ಕೆ ಮಾರಾಟವಾಗುತ್ತಿತ್ತು. ಇನ್ನುಳಿದಂತೆ ಮೆಂತೆ, ಸಬ್ಬಸಿಗೆ ಸೊಪ್ಪಿನ ದರದಲ್ಲೂ ಕೊಂಚ ಏರಿಕೆಯಾಗಿದೆ.