ವಾಷಿಂಗ್ಟನ್: ‘ಡೆಮಾಕ್ರಟಿಕ್ ಪಕ್ಷದಿಂದ ಅಮೆರಿಕದ ಅಧ್ಯಕ್ಷೀಯ ಚುನಾವಣೆಯ ಅಭ್ಯರ್ಥಿಯಾಗಿ ಜೋ ಬಿಡೆನ್ ಅವರು ವಾಷಿಂಗ್ಟನ್ನಲ್ಲಿ ಗೆಲುವು ಸಾಧಿಸಿದ್ದಾರೆ’ ಎಂದು ಅಮೆರಿಕದ ಮಾಧ್ಯಮ ವರದಿ ಮಾಡಿದೆ.
‘ಸೋಮವಾರ ರಾತ್ರಿ ಮತ ಎಣಿಕೆ ಬಹುತೇಕ ಪೂರ್ಣಗೊಂಡಿದ್ದು, ಅತಿ ಕಡಿಮೆ ಅಂತರದಲ್ಲಿ ಬಿಡೆನ್ ಅವರು ತಮ್ಮ ಪ್ರತಿಸ್ಪರ್ಧಿ ಬರ್ನಿ ಸ್ಯಾಂಡರ್ಸ್ ಎದುರು ಗೆಲುವು ಪಡೆದಿದ್ದಾರೆ’ ಎಂದು ಎನ್ಬಿಸಿ ಹಾಗೂ ನ್ಯೂಯಾರ್ಕ್ ಟೈಮ್ಸ್ ವರದಿ ಮಾಡಿದೆ.
ಬಿಡೆನ್ ಅವರು ಶೇ 37.9 ಹಾಗೂ ಸ್ಯಾಂಡರ್ಸ್ ಅವರು ಶೇ 36.4 ಮತ ಗಳಿಸಿದ್ದಾರೆ.
ಅರಿಜೋನಾ, ಫ್ಲಾರಿಡಾ ಹಾಗೂ ಇಲಿನಾಯ್ ರಾಜ್ಯಗಳಲ್ಲಿ ಮಂಗಳವಾರ ಚುನಾವಣೆ ನಡೆಯಬೇಕಿದೆ. ಆದರೆ ಕೊರೊನಾ–2 ವೈರಸ್ ಸೋಂಕು ವೇಗವಾಗಿ ಹರಡುತ್ತಿರುವುದರಿಂದಾಗಿ, ಮತಗಟ್ಟೆಗಳ ಸುರಕ್ಷತೆ ಕುರಿತು ಆತಂಕ ಮೂಡಿದೆ. ಒಹಾಯೊದಲ್ಲಿ ಚುನಾವಣೆ ಮುಂದೂಡಿರುವುದಾಗಿ ಅಧಿಕಾರಿಗಳು ಘೋಷಿಸಿದ್ದಾರೆ.
ಮಂಗಳವಾರದ ಚುನಾವಣೆ ಸ್ಯಾಂಡರ್ಸ್ ಪಾಲಿಗೆ ನಿರ್ಣಾಯಕವಾಗಲಿದ್ದು, ಬಹುಮತ ಗಳಿಸದೆ ಇದ್ದಲ್ಲಿ ಅವರು ಅಧ್ಯಕ್ಷೀಯ ಚುನಾವಣೆಯಿಂದ ಹೊರನಡೆಯಬೇಕಾಗುತ್ತದೆ.