ಚೀನಾ: ವುಹಾನ್ ನಗರದಲ್ಲಿ 76 ದಿನಗಳ ನಂತರ ಲಾಕ್ ಡೌನ್ ತೆರವು, ರಸ್ತೆಗಿಳಿದ ಜನ

ವುಹಾನ್ (ಚೀನಾ): ವಿಶ್ವದಲ್ಲಿಯೇ ಮೊದಲ ಬಾರಿಗೆ ಕೊರೊನಾ ಸೋಂಕು ಕಾಣಿಸಿಕೊಂಡ ವುಹಾನ್ ನಗರದಲ್ಲಿ ಬುಧವಾರದಿಂದ ಲಾಕ್‌‌ಡೌನ್ ತೆರವುಗೊಳಿಸಲಾಗಿದ್ದು, 76 ದಿನಗಳಿಂದ ಮನೆಯೊಳಗೆ ಬಂಧಿಗಳಾಗಿದ್ದ ಜನರು ಈಗ ರಸ್ತೆಗೆ ಇಳಿದಿದ್ದಾರೆ.

ಇದರಿಂದಾಗಿ ಕೊರೊನಾ ಸೋಂಕು ತಡೆಗಟ್ಟಲು ಲಾಕ್‌‌ಡೌನ್ ಪರಿಣಾಮಕಾರಿ ಮಾರ್ಗ ಎಂಬುದನ್ನು ಅರಿತ ಚೀನಾ ಅನುಸರಿಸಲು ಅತ್ಯಂತ ಕಠಿಣವಾದರೂ 76 ದಿನಗಳ ಕಾಲ ಲಾಕ್‌‌ಡೌನ್ ಜಾರಿಗೊಳಿಸಿ ಕೊರೊನಾ ಸೋಂಕು ತಡೆಗಟ್ಟುವಲ್ಲಿ ಯಶಸ್ವಿಯಾಗಿದೆ.
ವುಹಾನ್ ನಗರದಲ್ಲಿ ಈಗ ಸ್ಥಳೀಯ ಸಾರಿಗೆಗೆ ಅವಕಾಶ ಕಲ್ಪಿಸಲಾಗಿದೆ.  ಅಂಗಡಿ ಮುಂಗಟ್ಟುಗಳಿಗೆ, ಸಣ್ಣಪುಟ್ಟ ವ್ಯಾಪಾರದಿಂದ ಆರಂಭವಾಗಿ ಬೃಹತ್ ಪ್ರಮಾಣದ ವ್ಯಾಪಾರಗಳಿಗೆ ಅವಕಾಶ ನೀಡಲಾಗಿದೆ.

ಜನವರಿಯಿಂದ ಆರಂಭವಾಗಿದ್ದ ಲಾಕ್‌‌ಡೌನ್ನಿಂದಾಗಿ ವುಹಾನ್ ನಗರದಲ್ಲಿ ಜನ ಮನೆಯೊಳಗೆ ಬಂಧಿಗಳಾಗಿದ್ದರು.
ಲಾಕ್‌‌ಡೌನ್ ತೆರವುಗೊಳಿಸಿದ್ದರೂ ಕಟ್ಟುನಿಟ್ಟಿನ ಕ್ರಮಗಳನ್ನು ಜಾರಿಗೊಳಿಸಿರುವ ಚೀನಾ ಸರ್ಕಾರ ಪ್ರತಿಯೊಬ್ಬರೂ ಆರೋಗ್ಯಕ್ಕೆ ಸಂಬಂಧಿಸಿದ ನಿಯಮಗಳನ್ನು ಪಾಲಿಸುವಂತೆ ಆದೇಶ ಹೊರಡಿಸಿದೆ. ಚೀನಾ ಹುಬೇ ನಗರದಲ್ಲಿ ಮಾರ್ಚ್ 25ರಂದು ಲಾಕ್‌‌ಡೌನ್ ತೆರವುಗೊಳಿಸಲಾಗಿತ್ತು. ಆದರೆ, ಅತ್ಯಂತ ಹೆಚ್ಚುಸಾವು ಕಂಡು ಬಂದ ವುಹಾನ್ ನಗರದಲ್ಲಿ ಲಾಕ್‌‌ಡೌನ್ ಮುಂದುವರಿಸಲಾಗಿತ್ತು.
ಚೀನಾ ಸರ್ಕಾರ ಪ್ರತಿಯೊಬ್ಬರಿಗೂ ಕ್ಯುಆರ್ ಕೋಡ್ ನೀಡಿದೆ. ಇದು ಅವರ ಆರೋಗ್ಯದ ಸ್ಥಿತಿಯನ್ನು ತಿಳಿಸಲಿದೆ. ಹಸಿರು ಬಣ್ಣದ ಕ್ಯುಆರ್ ಕೋಡ್ ನೀಡಿರುವ ವ್ಯಕ್ತಿಗಳು ಉತ್ತಮ ಆರೋಗ್ಯ ಹೊಂದಿದವರಾಗಿದ್ದು, ಕೆಲವು ನಿಯಮಗಳನ್ನು ಪಾಲಿಸಿ ಹೊರಗೆ ತಿರುಗಾಡಬಹುದು. ಇತರೆ ನಗರಗಳಿಗೆ ತೆರಳಬಹುದು. 

 ಇದನ್ನೂ ಓದಿ: ಚೀನಾ ಕೊಟ್ಟ ಕೊರೊನಾ ಸೋಂಕು ಅಂಕಿಅಂಶದ ಬಗ್ಗೆ ಅಮೆರಿಕದ ಟ್ರಂಪ್‌ಗೂ ಸಂದೇಹ

ಇದೇ ಆಧಾರದಲ್ಲಿ 55 ಸಾವಿರ ಮಂದಿ ಹಸಿರು ಕ್ಯುಆರ್ ಕೋಡ್ ಹೊಂದಿದ್ದು ರೈಲಿನ ಮೂಲಕ ವುಹಾನ್ ನಗರದಿಂದ ಚೀನಾದ ಇತರ ಕಡೆಗಳಿಗೆ ಪ್ರಯಾಣಿಸಿದ್ದಾರೆ ಎಂದು ಸ್ಥಳೀಯ ರೈಲ್ವೆ ಇಲಾಖೆಯ ವರದಿಗಳು ತಿಳಿಸಿವೆ.