ಕೊರೊನಾ ಭೀತಿ: 15 ಲಕ್ಷ ಮಂದಿ ಬ್ರಿಟಿಷರಿಗೆ ಮೂರು ತಿಂಗಳು ಗೃಹವಾಸ

ಲಂಡನ್: ಕೊರೊನಾ ವೈರಸ್ ಪೀಡೆ ಜಾಗತಿಕವಾಗಿ ತನ್ನ ಕಬಂಧ ಬಾಹು ಹರಡುತ್ತಿರುವಂತೆಯೇ, ಕೋವಿಡ್-19ನಿಂದಾಗುವ ಸಾವು ತಡೆಗಟ್ಟಲು ಮತ್ತು ವೈರಸ್ ಹರಡುವಿಕೆಯ ಪ್ರಮಾಣ ತಗ್ಗಿಸಲು ಬ್ರಿಟಿಷ್ ಸರ್ಕಾರ ಕಠಿಣ ಕ್ರಮಗಳನ್ನು ಘೋಷಿಸಿದೆ.

ವೈರಸ್ ಸೋಂಕಿನ ಸಾಧ್ಯತೆಯಿರುವ ಸುಮಾರು 15 ಲಕ್ಷ ಮಂದಿಯನ್ನು ಗುರುತಿಸಿರುವ ಯುಕೆ ಸರ್ಕಾರ, ಅವರೆಲ್ಲರೂ ಮೂರು ತಿಂಗಳು ಮನೆಯಿಂದ ಹೊರ ಬಾರದಂತೆ ನಿರ್ದೇಶನ ನೀಡಿದೆ.

ಎಲುಬು ಅಥವಾ ರಕ್ತದ ಕ್ಯಾನ್ಸರ್, ಸಿಸ್ಟಿಕ್ ಫೈಬ್ರೋಸಿಸ್ ಮುಂತಾದ ತೀವ್ರ ಕಾಯಿಲೆಗಳಿಂದ ಬಳಲುತ್ತಿರುವವರು ಅಥವಾ ಅಂಗಾಂಗ ಕಸಿಗೆ ಒಳಪಟ್ಟವರು ಕೊರೊನಾ ವೈರಸ್‌ನಿಂದ ತಮ್ಮನ್ನು ರಕ್ಷಿಸಿಕೊಳ್ಳುವ ನಿಟ್ಟಿನಲ್ಲಿ ಮನೆಯೊಳಗೇ ಇರುವಂತೆ ಆರೋಗ್ಯ ಅಧಿಕಾರಿಗಳು ಸೂಚಸಿದ್ದಾರೆ.

"ತೀರಾ ಗಂಭೀರ ಆರೋಗ್ಯ ಸಮಸ್ಯೆ ಇರುವವರು ಮತ್ತು ರೋಗನಿರೋಧಕ ಶಕ್ತಿ ತೀರಾ ಕಡಿಮೆ ಇರುವವರು ದಯವಿಟ್ಟು ಮನೆಯೊಳಗೇ ಇರಬೇಕು" ಎಂದು ಸಮುದಾಯ ಇಲಾಖೆಯ ಕಾರ್ಯದರ್ಶಿ ರಾಬರ್ಟ್ ಜೆನ್ರಿಕ್ ಅವರು ಹೇಳಿಕೊಂದರಲ್ಲಿ ತಿಳಿಸಿದ್ದಾರೆ.

ಇದನ್ನೂ ಓದಿ: ಸಿಎಂ ಕ್ರಮ: ಕರ್ನಾಟಕ ಗಡಿ ಬಂದ್, ವಿಕ್ಟೋರಿಯಾದಲ್ಲಿ ಚಿಕಿತ್ಸೆ, 2 ತಿಂಗಳ ಪಡಿತರ

ಈ ರೀತಿ ವೈದ್ಯರ ಮೂಲಕ ಗುರುತಿಸಿ ಸಂಪರ್ಕಿಸಲಾದವರನ್ನು ಕನಿಷ್ಠ 12 ವಾರಗಳ ಕಾಲ ಮನೆಯೊಳಗೇ ಇರುವಂತೆ ಸೂಚಿಸಲಾಗುತ್ತಿದೆ. ಅವರಿಗೆ ಸೂಕ್ತ ಫೋನ್ ಸಂಪರ್ಕ ಮತ್ತು ದಿನಸಿ ವಸ್ತುಗಳು ಅಥವಾ ಔಷಧಿ ಪೂರೈಕೆಗೆ ವ್ಯವಸ್ಥೆ ಮಾಡಲಾಗುತ್ತದೆ ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ. ಅವರೆಲ್ಲರೂ ಶಾಪಿಂಗ್ ಅಥವಾ ವಿಹಾರ ಇಲ್ಲವೇ ಪ್ರವಾಸಕ್ಕೆ ಹೋಗುವಂತಿಲ್ಲ ಎಂದೂ ಸೂಚಿಸಲಾಗಿದೆ.

ಇದನ್ನೂ ಓದಿ: Coronavirus update| ಇಲ್ಲಿದೆ ರಾಜ್ಯವಾರು ಶಂಕಿತರು, ಸೋಂಕಿತರು, ಮೃತರ ಸಂಖ್ಯೆ

ಇತ್ತೀಚಿನ ಅಂಕಿ ಅಂಶಗಳ ಪ್ರಕಾರ, ಯುಕೆಯಲ್ಲಿ ಇದುವರೆಗೆ ಕೊರೊನಾ ವೈರಸ್ ಸೋಂಕಿನಿಂದಾಗಿ 177 ಮಂದಿ ಸಾವನ್ನಪ್ಪಿದ್ದು, ಸೋಂಕು ಹರಡುವಿಕೆ ತಡೆಗೆ ಬೋರಿಸ್ ಜಾನ್ಸನ್ ಆಡಳಿತವು ಕಟ್ಟು ನಿಟ್ಟಿನ ಕ್ರಮಗಳನ್ನು ಕೈಗೊಂಡಿದೆ. ಬಾರ್, ಪಬ್ ಮತ್ತು ರೆಸ್ಟೋರೆಂಟ್‌ಗಳನ್ನು ಬಂದ್ ಮಾಡಲಾಗಿದ್ದು, ಪ್ರವಾಸಿ ತಾಣಗಳಲ್ಲಿಯೂ ನಿರ್ಬಂಧ ವಿಧಿಸಲಾಗಿದೆ.