ಗುಜರಾತ್‌: ಒಂದೇ ಕುಟುಂಬದ ಆರು ಸದಸ್ಯರು ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆ
ಅಕ್ಷರ ಗಾತ್ರ :ಆ |ಆ |ಆ
ಅಹಮದಾಬಾದ್‌: ಏಳರಿಂದ 12 ವರ್ಷದ ನಾಲ್ವರು ಮಕ್ಕಳು ಸೇರಿದಂತೆ ಒಂದೇ ಕುಟುಂಬದ ಆರು ಸದಸ್ಯರು ಯಾರೂ ವಾಸವಿಲ್ಲದ ಫ್ಲ್ಯಾಟ್ ಒಂದರಲ್ಲಿ ನೇಣುಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾರೆ.
ಗುಜರಾತ್‌ನ ಅಹಮದಾಬಾದ್‌ನ ವಾಟ್ವಾ ಜಿಐಡಿಸಿ ಪ್ರದೇಶದಲ್ಲಿ ಶುಕ್ರವಾರ ಮುಂಜಾನೆ ಈ ಘಟನೆ ಬೆಳಕಿಗೆ ಬಂದಿದೆ. ಫ್ಲ್ಯಾಟ್ ಕುಟುಂಬಕ್ಕೇ ಸೇರಿದ್ದರೂ, ಇಲ್ಲಿ ಯಾರೂ ವಾಸವಿರಲಿಲ್ಲ. ಜೂನ್ 17ರಂದು ಅಮ್ರೀಷ್‌ ಪಟೇಲ್‌(42) ಹಾಗೂ ಅವರ ಸಹೋದರ ಗೌರಂಗ್‌ ಪಟೇಲ್‌ (40) ಸುತ್ತಾಡಿಕೊಂಡು ಬರುವುದಾಗಿ ಪತ್ನಿಯರಿಗೆ ತಿಳಿಸಿ ತಮ್ಮ ನಾಲ್ವರು ಮಕ್ಕಳೊಂದಿಗೆ ಮನೆಯಿಂದ ಹೋಗಿದ್ದರು. ಇಬ್ಬರೂ ಸಹೋದರರು ನಗರದ ಬೇರೆ ಬೇರೆ ಪ್ರದೇಶದಲ್ಲಿ ವಾಸವಾಗಿದ್ದರು ಎಂದು ಇನ್‌ಸ್ಪೆಕ್ಟರ್‌ ಡಿ.ಆರ್.ಗೋಹಿಲ್‌ ತಿಳಿಸಿದರು.
ಪತಿ ಹಾಗೂ ಮಕ್ಕಳು ಮನೆಗೆ ಬಾರದೇ ಇದ್ದಾಗ, ಇಬ್ಬರ ಪತ್ನಿಯರೂ ಅವರನ್ನು ಹುಡುಕಿಕೊಂಡು ಫ್ಲ್ಯಾಟ್‌ಗೆ ತೆರಳಿದ್ದರು. ಫ್ಲ್ಯಾಟ್‌ನ ಬಾಗಿಲು ಒಳಗಿನಿಂದ ಚಿಲಕ ಹಾಕಿಕೊಂಡಿದ್ದ ಕಾರಣ, ಪೊಲೀಸರಿಗೆ ಮಾಹಿತಿ ನೀಡಿದ್ದರು. ಪೊಲೀಸರು ಬಾಗಿಲು ತೆಗೆದು ಒಳ ಪ್ರವೇಶಿಸಿದ ಸಂದರ್ಭದಲ್ಲಿ ಇಬ್ಬರು ಸಹೋದರರ ಶವ ಹಾಲ್‌ನಲ್ಲಿ, ಹೆಣ್ಣು ಮಕ್ಕಳಾದ ಕೃತಿ(9) ಹಾಗೂ ಸಾನ್ವಿ(7) ಶವ ಅಡುಗೆ ಕೋಣೆಯಲ್ಲಿ ಹಾಗೂ 12 ವರ್ಷದ ಇಬ್ಬರು ಗಂಡುಮಕ್ಕಳ ಶವ ಮಲಗುವ ಕೋಣೆಯಲ್ಲಿ ನೇಣುಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿದೆ.
ನಿದ್ದೆಮಾತ್ರೆಗಳನ್ನು ನೀಡಿ ಮಕ್ಕಳು ನಿದ್ದೆ ಮಾಡಿದ ನಂತರ ಅವರನ್ನು ಕೊಂದು ನೇತು ಹಾಕಿ, ನಂತರ ತಾವೂ ನೇಣು ಹಾಕಿಕೊಂಡಿದ್ದಾರೆ ಎಂದು ಅಧಿಕಾರಿಗಳು ಸಂಶಯ ವ್ಯಕ್ತಪಡಿಸಿದ್ದಾರೆ. ಶವಗಳನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದ್ದು, ತನಿಖೆ ನಡೆಯುತ್ತಿದೆ ಎಂದು ಪೊಲೀಸರು ತಿಳಿಸಿದರು.
ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ
ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್
ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.
