ಸಾರ್ವಜನಿಕ ಸ್ಥಳಗಳಲ್ಲಿ ನಡೆಯುವ ದೊಂಬಿ ಅಥವಾ ಹಿಂಸಾ ಕೃತ್ಯಗಳ ಮೇಲೆ ನಿಗಾ ಇಡುವ ಡ್ರೋಣ್‌ ವ್ಯವಸ್ಥೆಯನ್ನು ಭಾರತೀಯ ವಿಜ್ಞಾನ ಸಂಸ್ಥೆಯ ವಿಜ್ಞಾನಿಗಳು ಅಭಿವೃದ್ಧಿಪಡಿಸಿದ್ದಾರೆ. ಪೊಲೀಸರು ಈ ತಂತ್ರಜ್ಞಾನವನ್ನು ಅಳವಡಿಸಿಕೊಂಡರೆ ಕ್ಷಣ ಮಾತ್ರದಲ್ಲಿ ಮಾಹಿತಿ ಪಡೆದು ಕ್ರಮ ತೆಗೆದುಕೊಳ್ಳಲು ಸಾಧ್ಯ. ಹಲ್ಲೆ ಮಾಡುತ್ತಿರುವ ಮತ್ತು ಹಲ್ಲೆಗೆ ಒಳಗಾದ ವ್ಯಕ್ತಿಯ ಮೇಲೆ ನಿಗಾ ಇಡುವ ಡ್ರೋಣ್‌, ಅವರನ್ನು ನಿಖರವಾಗಿ ಗುರುತಿಸುತ್ತದೆ. ಬೇಕೆಂದಾಗ ಅದರಿಂದ ಮಾಹಿತಿ ಪಡೆಯಬಹುದು. ಆ ವ್ಯಕ್ತಿಗಳ ಭಂಗಿಯ ಆಧಾರದಲ್ಲಿ ಯಾವ ರೀತಿಯ ಹಿಂಸೆ ನಡೆಯುತ್ತಿದೆ ಎಂಬುದನ್ನೂ ವಿಶ್ಲೇಷಿಸುತ್ತದೆ.
