ಸಂಬರ್ವುಲು (ಇಂಡೋನೇಷ್ಯಾ): ಇಂಡೋನೇಷ್ಯಾದ ಜಾವಾ ದ್ವೀಪದಲ್ಲಿ ಸಂಭವಿಸಿದ ಬಹುದೊಡ್ಡ ಜ್ವಾಲಾಮುಖಿಯ ಅವಶೇಷಗಳ ಅಡಿಯಿಂದ 13 ವರ್ಷದ ಬಾಲಕನ ಮೃತದೇಹ ಹೊರತೆಗೆಯಲಾಗಿದ್ದು, ಮೃತರ ಸಂಖ್ಯೆ 15ಕ್ಕೆ ಏರಿದೆ. ಇನ್ನೂ 27 ಮಂದಿ ನಾಪತ್ತೆಯಾಗಿದ್ದಾರೆ.
ಪೂರ್ವ ಜಾವಾ ಪ್ರಾಂತ್ಯದ ಜುಮಜಂಗ್ ಜಿಲ್ಲೆಯ ಸೆಮೆರು ಪರ್ವತದಲ್ಲಿ ಈ ಜ್ವಾಲಾಮುಖಿ ಸ್ಫೋಟಿಸಿತ್ತು. ಲಾವಾರಸದಿಂದ ಉತ್ಪತ್ತಿಯಾದ ಬೂದಿ 12 ಸಾವಿರ ಮೀಟರ್ನಷ್ಟು (40 ಸಾವಿರ ಅಡಿ) ಎತ್ತರಕ್ಕೆ ಚಿಮ್ಮಿತ್ತು.
ತೀವ್ರ ಸುಟ್ಟ ಗಾಯಗಳೊಂದಿಗೆ 56 ಮಂದಿ ವಿವಿಧ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ದುರಂತದಲ್ಲಿ 3 ಸಾವಿರಕ್ಕೂ ಅಧಿಕ ಮನೆಗಳು ಮತ್ತು 38 ಶಾಲೆಗಳು ಹಾನಿಗೊಂಡಿವೆ.