ದುಬೈ: ಅಫ್ಗಾನಿಸ್ತಾನದ ಸೋವಿಯತ್ ವಿರೋಧಿ ಹೋರಾಟದ ನಾಯಕ ಎಂಬ ಖ್ಯಾತಿಗೆ ಪಾತ್ರರಾಗಿರುವ ಅಹ್ಮದ್ ಶಾ ಮಸೂದ್ ಅವರ ಪುತ್ರ ಅಹ್ಮದ್ ಮಸೂದ್ ತಾಲಿಬಾನ್ಗೆ ಯುದ್ಧದ ಎಚ್ಚರಿಕೆ ನೀಡಿದ್ದಾರೆ.
ನನ್ನ ನಿಯಂತ್ರಣದಲ್ಲಿರುವ ಪ್ರದೇಶಗಳನ್ನು ತಾಲಿಬಾನಿಗಳಿಗೆ ಬಿಟ್ಟುಕೊಡುವುದಿಲ್ಲ ಎಂದು ಅವರು ಹೇಳಿರುವುದಾಗಿ ದುಬೈ ಮೂಲದ ‘ಅಲ್-ಅರೇಬಿಯಾ’ ಸುದ್ದಿ ವಾಹಿನಿ ಭಾನುವಾರ ವರದಿ ಮಾಡಿದೆ.
ದೇಶದಲ್ಲಿ ಆಡಳಿತ ನಡೆಸಲು ತಾಲಿಬಾನ್ ಅನ್ನೂ ಒಳಗೊಂಡಂತೆ ಸಮಗ್ರ ಸರ್ಕಾರ ರಚನೆಗೆ ಅಹ್ಮದ್ ಮಸೂದ್ ಕರೆ ನೀಡಿದ್ದಾರೆ. ‘ಒಂದು ವೇಳೆ ಬಂಡೂಕೋರರೇನಾದರೂ ಮಾತುಕತೆಯನ್ನು ನಿರಾಕರಿಸಿದರೆ, ಯುದ್ಧ ಅನಿವಾರ್ಯವಾಗಲಿದೆ’ ಎಂದು ಅವರು ಎಚ್ಚರಿಕೆ ನೀಡಿದ್ದಾರೆ.
ಅಹ್ಮದ್ ಮಸೂದ್ ಅವರು ಕಾಬೂಲ್ಗೆ ಸಮೀಪದ ಪಂಜ್ಶೀರ್ ಪ್ರಾಂತ್ಯದ ಮೇಲೆ ಹಿಡಿತ ಹೊಂದಿದ್ದು, ಅದನ್ನು ಇನ್ನೂ ತಾಲಿಬಾನ್ ವಶಕ್ಕೆ ಒಪ್ಪಿಸಿಲ್ಲ.