ಮಂಗಳನ ಮೇಲೆ ಯಶಸ್ವಿಯಾಗಿ ಇಳಿದ ಚೀನಾದ ರೋವರ್‌

ಬಿಜೀಂಗ್‌: ಚೀನಾದ ಬಾಹ್ಯಾಕಾಶ ನೌಕೆಯು ಮಂಗಳ ಗ್ರಹದ ಮೇಲೆ ಯಶಸ್ವಿಯಾಗಿ ಇಳಿದಿದೆ. ಈ ಮೂಲಕ ಚೀನಾವು ಮಂಗಳ ಗ್ರಹದಲ್ಲಿ ತನ್ನ ರೋವರ್‌ ಅನ್ನು ಇಳಿಸಿದ ಎರಡನೇ ರಾಷ್ಟ್ರ ಎನಿಸಿಕೊಂಡಿದೆ (ಮೊದಲ ದೇಶ ಅಮೆರಿಕ) ಎಂದು ಮಾಧ್ಯಮವೊಂದು ಶನಿವಾರ ವರದಿ ಮಾಡಿದೆ.

‘ಮೊದಲೇ ಆಯ್ಕೆ ಮಾಡಲಾಗಿದ್ದ ಮಂಗಳ ಗ್ರಹದ ದಕ್ಷಿಣ ‌ಪ್ರದೇಶದಲ್ಲಿ ಚೀನಾದ ‘ಜುರಾಂಗ್’ ರೋವರ್ ಅನ್ನು ಇಳಿಸಲಾಯಿತು’ ಎಂದು ಕ್ಸಿನುವಾ ಸುದ್ದಿ ಸಂಸ್ಥೆ ವರದಿಯಲ್ಲಿ ಹೇಳಿದೆ.

ಸೌರಶಕ್ತಿ ಚಾಲಿತ ಆರು ಚಕ್ರಗಳ ಜುರಾಂಗ್‌ ರೋವರ್‌ 240 ಕಿ.ಗ್ರಾಂ ತೂಕವನ್ನು ಹೊಂದಿದೆ. ಇದರಲ್ಲಿ ಆರು ವೈಜ್ಞಾನಿಕ ಸಾಧನಗಳನ್ನು ಅಳವಡಿಸಲಾಗಿದೆ.

ಲ್ಯಾಂಡರ್‌ ಸಹಾಯದಿಂದ ಮಂಗಳ ಗ್ರಹದಲ್ಲಿ ಜೀವದ ಕುರುಹುಗಳನ್ನು ಹುಡುಕುವ ಮೂರು ತಿಂಗಳ ಮಿಷನ್‌ಗೆ ಈ ರೋವರ್‌ ಅನ್ನು ನಿಯೋಜಿಸಲಾಗಿದೆ ಎಂದು ವರದಿಯಲ್ಲಿ ಹೇಳಲಾಗಿದೆ.

‘ಬಾಹ್ಯಾಕಾಶದಲ್ಲಿ 9 ನಿಮಿಷಗಳ ಕಾಲ ಕಠಿಣ ಪರಿಸ್ಥಿತಿಯನ್ನು ಎದುರಿಸಿದ ರೋವರ್‌ ಮಂಗಳ ಗ್ರಹದಲ್ಲಿ ಯಶಸ್ವಿಯಾಗಿ ಇಳಿದಿದೆ’ ಎಂದು ಚೀನಾ ರಾಷ್ಟ್ರೀಯ ಅಂತರಿಕ್ಷ ಆಡಳಿತವು (ಸಿಎನ್‌ಸಿಎ) ತಿಳಿಸಿದೆ.

ಆರ್ಬಿಟರ್‌, ಲ್ಯಾಂಡರ್‌ ಮತ್ತು ರೋವರ್‌ ಅನ್ನು ಒಳಗೊಂಡ ‘ಟಿಯಾನ್‌ವೆನ್‌–1’ ಅನ್ನು 2020ರ ಜುಲೈ 23ರಂದು ಉಡಾವಣೆ ಮಾಡಲಾಗಿತ್ತು.