ನ್ಯೂಯಾರ್ಕ್: ಅಮೆರಿಕದ ಪೌರತ್ವ ಹೊಂದಿದ್ದೇವೆಂದು ಸುಳ್ಳು ಮಾಹಿತಿ ನೀಡಿ 2016ರ ಅಮೆರಿಕ ಅಧ್ಯಕ್ಷೀಯ ಚುನಾವಣೆಯಲ್ಲಿ ಕಾನೂನುಬಾಹಿರವಾಗಿ ಮತಚಲಾಯಿಸಿದ್ದಾರೆಂದು ಇಲ್ಲಿನ ಫೆಡರಲ್ ಸರ್ಕಾರದ ಪರ ವಕೀಲರು ಒಬ್ಬ ಭಾರತೀಯ ಮತ್ತು ಮತ್ತೊಬ್ಬ ಭಾರತೀಯ ಮೂಲದ ಮಲೇಷ್ಯಾದ ವ್ಯಕ್ತಿ ಸೇರಿದಂತೆ ಹನ್ನೊಂದು ವಿದೇಶಿ ವ್ಯಕ್ತಿಗಳ ವಿರುದ್ಧ ಇಲ್ಲಿನ ಜಿಲ್ಲಾ ನ್ಯಾಯಾಲಯದಲ್ಲಿ ಆರೋಪ ಹೊರಿಸಿದ್ದಾರೆ.
ಕಳೆದ ತಿಂಗಳು ಉತ್ತರ ಕೊರೊಲಿನಾದ ಮಿಡ್ಲ್ ಡಿಸ್ಟ್ರಿಕ್ನ ನ್ಯಾಯಾಲಯದಲ್ಲಿ ನಡೆದ ವಿಚಾರಣೆ ವೇಳೆ ಭಾರತದ ಬೈಜುಪೊಟಕುಲತ್ ಥಾಮಸ್(58) ಹಾಗೂ ಭಾರತೀಯ ಮೂಲದ ಮಲೇಷ್ಯಾದಲ್ಲಿ ನೆಲಸಿರುವ ವ್ಯಕ್ತಿ ರೂಬ್ ಕೌರ್ ಅತಾರ್ ಸಿಂಗ್ (57) ಸೇರಿದಂತೆ ಹನ್ನೊಂದು ಇತರೆ ವಿದೇಶಿ ಪ್ರಜೆಗಳ ಮೇಲೆ ಕಾನೂನು ಬಾಹಿರವಾಗಿ ಮತಚಲಾಯಿಸಿದ್ದಾರೆ ಎಂದು ಫೆಡರಲ್ ಸರ್ಕಾರದ ಪರ ವಕೀಲರು ಆರೋಪ ಹೊರಿಸಿದ್ದಾರೆ.
ಆರೋಪ ಸಾಬೀತಾದರೆ, ಈ ವ್ಯಕ್ತಿಗಳಿಗೆ ಒಂದು ವರ್ಷದ ಜೈಲು ಶಿಕ್ಷೆ ಮತ್ತು 1 ಲಕ್ಷ ಅಮೆರಿಕನ್ ಡಾಲರ್ ದಂಡ ಪಾವತಿಸಬೇಕಾಗುತ್ತದೆ ಎಂದು ಅಮೆರಿಕದ ವಲಸೆಮತ್ತು ಕಸ್ಟಮ್ಸ್ ಜಾರಿನಿರ್ದೇಶನಾಲಯ(ಐಸಿಇ) ಹೋಮ್ ಲ್ಯಾಂಡ್ ಸೆಕ್ಯುರಿಟಿ ಇನ್ವೆಸ್ಟಿಗೇಷನ್ ಸಂಸ್ಥೆ ತಿಳಿಸಿದೆ.
ಅಮೆರಿಕದ ಕಾನೂನಿನ ಪ್ರಕಾರ ಅಮೆರಿಕದ ಪೌರತ್ವ ಹೊಂದಿರದ ನಾಗರಿಕರು, ಫೆಡರಲ್ ಚುನಾವಣೆಯಲ್ಲಿ ಮತಚಲಾಯಿಸಲು ನೋಂದಣಿ ಮಾಡಿಸಲು ಸಾಧ್ಯವಿಲ್ಲ.