ವಾಷಿಂಗ್ಟನ್‌: ಲಕ್ಷಾಂತರ ಜನರ ಸಾವಿಗೆ ಕಾರಣವಾಗಿರುವ ಕೋವಿಡ್–19 ಅನ್ನು ‘ಚೀನಾ ವೈರಸ್‌’ ಎಂದೇ ಕರೆಯಬೇಕು ಎಂದು ಚೀನಾದ ವಿರುದ್ಧ ಮತ್ತೆ ವಾಗ್ದಾಳಿ ನಡೆಸಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್ ಅವರು,‘ಕೊರಾನಾ’ ಶಬ್ದವು ಇಟಲಿಯ ಸುಂದರ ಸ್ಥಳದ ಹೆಸರಿನಂತೆ ಭಾಸವಾಗುತ್ತದೆ ಎಂದಿದ್ದಾರೆ.
ಪೆನ್ಸಿಲ್ವೇನಿಯಾದಲ್ಲಿ ಚುನಾವಣಾ ಪ್ರಚಾರದಲ್ಲಿ ಮಾತನಾಡಿದ ಅವರು, ‘ನಾನು ಮತ್ತೆ ಅಮೆರಿಕದ ಅಧ್ಯಕ್ಷನಾಗಿ ಆಯ್ಕೆಯಾದರೆ, ಅಮೆರಿಕವನ್ನು ಉತ್ಪಾದನಾ ಕ್ಷೇತ್ರದಲ್ಲಿ ಮಹಾಶಕ್ತಿಯನ್ನಾಗಿ ಬೆಳೆಸುತ್ತೇನೆ. ಈ ಬಳಿಕ ಚೀನಾದ ಮೇಲೆ ಅಮೆರಿಕ ಅವಲಂಬಿತವಾಗುವ ಅವಶ್ಯಕತೆ ಇರುವುದಿಲ್ಲ’ ಎಂದು ಅವರು ಭರವಸೆ ನೀಡಿದರು.
‘ಕೋವಿಡ್–19 ಹರಡುವುದಕ್ಕಿಂತ ಮುನ್ನ ಅಮೆರಿಕದ ಆರ್ಥಿಕ ಪ್ರಗತಿ ಉತ್ತಮವಾಗಿತ್ತು. ಈ ವೈರಸ್‌ ಹರಡಲು ಚೀನಾವೇ ಕಾರಣ. ಇದು ಕೊರೊನಾ ವೈರಸ್‌ ಅಲ್ಲ, ಚೀನಾ ವೈರಸ್‌’ ಎಂದು ಅವರು ಕಿಡಿಕಾರಿದರು.
