'ಸೇವೆಗೆ ಸಿದ್ಧ', 'ಸದಾ ಜನರಿಗಾಗಿ'–ಕಮಲಾ ಹ್ಯಾರಿಸ್

ವಾಷಿಂಗ್ಟನ್: ಅಮೆರಿಕದ ಮೊದಲ ಉಪಾಧ್ಯಕ್ಷೆಯಾಗಿ ಪದಗ್ರಹಣ ಮಾಡಿರುವ ಭಾರತೀಯ ಸಂಜಾತೆ ಕಮಲಾ ಹ್ಯಾರಿಸ್, 'ಸೇವೆಗೆ ಸಿದ್ಧ' ಮತ್ತು 'ಸದಾ ಜನರಿಗಾಗಿ' ಇರುವುದಾಗಿ ತಿಳಿಸಿದರು.

ಬುಧವಾರ ಕ್ಯಾಪಿಟಲ್ ಬಿಲ್ಡಿಂಗ್‌ನ ವೆಸ್ಟ್ ಫ್ರಂಟ್‌ನಲ್ಲಿ ನಡೆದ ಐತಿಹಾಸಿಕ ಕಾರ್ಯಕ್ರಮದಲ್ಲಿ 56 ವರ್ಷದ ಕಮಲಾ ಹ್ಯಾರಿಸ್ ಅಮೆರಿಕದ 46ನೇ ಉಪಾಧ್ಯಕ್ಷೆಯಾಗಿ ಪ್ರಮಾಣ ವಚನ ಸ್ವೀಕರಿಸಿದರು.

It's an honor to be your Vice President. pic.twitter.com/iM3BxJzz6E

— Vice President Kamala Harris (@VP) January 20, 2021

ತಮಿಳುನಾಡಿನ ಚೆನ್ನೈನಿಂದ ಅಮೆರಿಕಕ್ಕೆ ವಲಸೆ ಹೋದ ಭಾರತೀಯ ಕುಟುಂಬದ ಮಗಳಾಗಿರುವ ಕಮಲ ಹ್ಯಾರಿಸ್ ಅಮೆರಿಕದ 'ಮೊದಲ ಮಹಿಳಾ ಉಪಾಧ್ಯಕ್ಷೆ'ಯಾಗುವ ಮೂಲಕ ಇತಿಹಾಸ ರಚಿಸಿದ್ದಾರೆ. ಅಷ್ಟೇ ಅಲ್ಲದೆ ಅಮೆರಿಕದ ಉಪಾಧ್ಯಕ್ಷೆ ಸ್ಥಾನ ವಹಿಸುತ್ತಿರುವ 'ದಕ್ಷಿಣ ಏಷ್ಯಾದ ಮೊದಲ ಮಹಿಳಾ ಉಪಾಧ್ಯಕ್ಷೆ' ಮತ್ತು 'ಮೊದಲ ಕಪ್ಪುವರ್ಣೀಯ' ಎಂಬ ಹಿರಿಮೆಗೂ ಪಾತ್ರವಾಗಿದ್ದಾರೆ.

ಇದನ್ನೂ ಓದಿ: ಬೈಡನ್‌ ಈಗ ಅಮೆರಿಕ ಅಧ್ಯಕ್ಷ: ಕ್ಯಾಪಿಟಲ್‌ನಲ್ಲಿ ಭಾರಿ ಭದ್ರತೆಯಲ್ಲಿ ಪ್ರಮಾಣ ವಚನ

ಕಮಲಾ ದೇವಿ ಹ್ಯಾರಿಸ್ ಎಂಬ ನಾನು ದೇಶಿ ಹಾಗೂ ವಿದೇಶಿ ಶತ್ರುಗಳಿಂದ ಅಮೆರಿಕ ಸಂವಿಧಾನವನ್ನು ರಕ್ಷಿಸುತ್ತೇನೆ ಎಂದು ಪ್ರತಿಜ್ಞೆ ಮಾಡುತ್ತೇನೆ. ಇದಕ್ಕಾಗಿ ನಿಜವಾದ ನಂಬಿಕೆ ಹಾಗೂ ನಿಷ್ಠೆಯನ್ನು ಹೊಂದಿರುತ್ತೇನೆ. ಈ ಕರ್ತ್ಯವ್ಯವನ್ನು ಮುಕ್ತವಾಗಿ ಮತ್ತು ನಿಷ್ಠೆಯಿಂದ ನಿರ್ವಹಿಸುತ್ತೇನೆ ಎಂದು ಪ್ರಮಾಣ ವಚನ ಕೈಗೊಂಡರು.

For the people—always. pic.twitter.com/KW0TS1cnUq

— Kamala Harris (@KamalaHarris) January 20, 2021

ಬಳಿಕ ಟ್ವೀಟ್ ಮಾಡಿರುವ ಕಮಲಾ ಹ್ಯಾರಿಸ್, 'ಸೇವೆಗೆ ಸಿದ್ಧ', 'ಸದಾ ಜನರಿಗಾಗಿ' ಎಂದು ತಿಳಿಸಿದರು. ಮಗದೊಂದು ಟ್ವೀಟ್‌ನಲ್ಲಿ ನನಗಿಂತ ಮೊದಲು ಬಂದಿರುವ ಮಹಿಳೆಯ ಕಾರಣ ಇಂದು ನಾನು ಇಲ್ಲಿದ್ದೇನೆ ಎಂದು ತಿಳಿಸಿದರು.