ಅವಿವಾಹಿತ ಮಗಳು ತನ್ನ ಮದುವೆ ಖರ್ಚನ್ನು ಪೋಷಕರಿಂದ ಪಡೆಯಬಹುದು: ಹೈಕೋರ್ಟ್

ರಾಯಪುರ: 'ಹಿಂದೂ ದತ್ತು ಸ್ವೀಕಾರ ಮತ್ತು ಜೀವನಾಂಶ ಕಾಯ್ದೆ- 1956'ರ ಅಡಿ ಅವಿವಾಹಿತ ಪುತ್ರಿಯು ತನ್ನ ಪೋಷಕರಿಂದ ತನ್ನ ಮದುವೆ ಖರ್ಚನ್ನು ಪಡೆಯಲು ಅವಕಾಶವಿದೆ ಎಂದು ಛತ್ತೀಸಗಡ ಹೈಕೋರ್ಟ್ ಪ್ರತಿಪಾದಿಸಿದೆ. 

ಛತ್ತೀಸಗಡದ ದುರ್ಗ ಜಿಲ್ಲೆಯ 35 ವರ್ಷದ ರಾಜೇಶ್ವರಿ ಎಂಬ ಮಹಿಳೆ ಸಲ್ಲಿಸಿದ ಅರ್ಜಿಯನ್ನು ಹೈಕೋರ್ಟ್‌ನ ಬಿಲಾಸ್‌ಪುರ ವಿಭಾಗೀಯ ಪೀಠ ವಿಚಾರಣೆ ನಡೆಸಿತು. ಈ ವೇಳೆ ಪೀಠದಲ್ಲಿದ್ದ ನ್ಯಾಯಮೂರ್ತಿಗಳಾದ ಭದೂರಿ ಹಾಗೂ ಸಂಜಯ್ ಎಸ್. ಅಗರ್‌ವಾಲ್ ಅವರಿದ್ದ ಪೀಠವು, '1956ರ ಹಿಂದೂ ದತ್ತು ಸ್ವೀಕಾರ ಮತ್ತು ಜೀವನಾಂಶ ಕಾಯ್ದೆ' ಪ್ರಕಾರ ಅವಿವಾಹಿತ ಯುವತಿ ತನ್ನ ಪೋಷಕರಿಂದ ಮದುವೆಯ ಖರ್ಚು ಪಡೆಯಲು ಅವಕಾಶವಿದೆ ಎಂಬ ವಕೀಲರ ವಾದವನ್ನು ಪುಷ್ಟೀಕರಿಸಿತು.

ಈ ಮೂಲಕ 2016ರ ಏಪ್ರಿಲ್ 22ರಂದು ದುರ್ಗ ಕೌಟುಂಬಿಕ ನ್ಯಾಯಾಲಯದ ನ್ಯಾಯಾಧೀಶರು ನೀಡಿದ್ದ ಆದೇಶವನ್ನು ಹೈಕೋರ್ಟ್ ತಳ್ಳಿ ಹಾಕಿದೆ. 

ಏನಿದು ಪ್ರಕರಣ?: ಭಿಲಾಯ್ ಉಕ್ಕು ಘಟಕದ ಉದ್ಯೋಗಿಯಾದ ಭಾನುರಾಮ್ ಅವರ ಪುತ್ರಿಯಾದ ರಾಜೇಶ್ವರಿ ಅವರು ತನಗೆ ಮದುವೆ ಖರ್ಚು ನೀಡಬೇಕು ಎಂದು ಕೋರಿ 2016ರಲ್ಲಿ ಕೌಟುಂಬಿಕ ನ್ಯಾಯಾಲಯದ ಮೊರೆ ಹೋಗಿದ್ದರು. ಈ ಅರ್ಜಿಯಲ್ಲಿ ತಮ್ಮ ತಂದೆ ಭಾನುರಾಮ್ ಅವರು ನಿವೃತ್ತಿಯಾಗುವ ವೇಳೆ ₹55 ಲಕ್ಷ ಪಡೆಯಲಿದ್ದಾರೆ. ಇದರಲ್ಲಿ ತನ್ನ ಮದುವೆ ಖರ್ಚಿಗಾಗಿ ₹20 ಲಕ್ಷ ನೀಡಬೇಕು ಎಂದು ಸೂಚಿಸಬೇಕು ಎಂದು ರಾಜೇಶ್ವರಿ ಅವರು ಉಲ್ಲೇಖಿಸಿದ್ದರು. ಆದರೆ ಕೌಟುಂಬಿಕ ನ್ಯಾಯಾಲಯ ಈ ಅರ್ಜಿಯನ್ನು ತಿರಸ್ಕರಿಸಿತ್ತು. ಆದರೆ, ಇದರ ವಿರುದ್ಧ ರಾಜೇಶ್ವರಿ ಅವರು ಹೈಕೋರ್ಟ್ ಮೊರೆ ಹೋಗಿದ್ದರು.