ಉಗ್ರರ ನಿಗ್ರಹಕ್ಕೆ ಭಾರತದಲ್ಲಿ ಡ್ರೋನ್ ನೆಲೆ ಹುಡುಕುತ್ತಿರುವ ಅಮೆರಿಕ

ಈ ಕುರಿತು ಅಮೆರಿಕ ಅಧ್ಯಕ್ಷ ಜೋ ಬೈಡನ್ ಆಡಳಿತವುಭಾರತದೊಂದಿಗೆ ಮಾತುಕತೆಯಲ್ಲಿ ತೊಡಗಿಸಿಕೊಂಡಿದೆ ಎಂದು ಅಮೆರಿಕ ವಿದೇಶಾಂಗ ಕಾರ್ಯದರ್ಶಿ ಆ್ಯಂಟನಿ ಬ್ಲಿಂಕನ್ ತಿಳಿಸಿದ್ದಾರೆ.

ಇದನ್ನೂ ಓದಿ:ಅಫ್ಗನ್‌ ನಿರಾಶ್ರಿತರಿಗಾಗಿ ಒಂದಾದ ಜಾರ್ಜ್‌ ಬುಷ್‌, ಬಿಲ್‌ ಕ್ಲಿಂಟನ್‌, ಒಬಾಮ

ರಿಪಬ್ಲಿಕನ್ ಪಕ್ಷದ ಪ್ರತಿನಿಧಿ ಮಾರ್ಕ್ ಇ. ಗ್ರೀನ್ ಪ್ರಶ್ನೆಗೆ ಉತ್ತರವಾಗಿ ಬ್ಲಿಂಕನ್ ಈ ವಿವರವನ್ನು ಬಹಿರಂಗಪಡಿಸಿದ್ದಾರೆ. ತಾಲಿಬಾನಿಗಳು ಹಾಗೂ ಪಾಕಿಸ್ತಾನದ ಐಎಸ್‌ಐ ನಡುವೆ ಬಾಂಧವ್ಯ ವೃದ್ಧಿಸಿಕೊಂಡಿರುವುದರಿಂದ ಅಮೆರಿಕ ಮೇಲಿನ ಸಂಭವನೀಯ ಬೆದರಿಕೆಯನ್ನು ತಟಸ್ಥಗೊಳಿಸಲು ಡ್ರೋನ್ ಬಳಕೆಗೆ ವಾಯುವ್ಯ ಭಾರತದಲ್ಲಿ ವೈಮಾನಿಕ ನೆಲೆ ಬಳಸುವುದಕ್ಕಾಗಿ ಬೈಡನ್ ಆಡಳಿತವು ಭಾರತದ ಜೊತೆ ಮಾತುಕತೆ ನಡೆಸುತ್ತಿದೆ.

ಆದ್ಯಾಗೂ ಅಫ್ಗಾನಿಸ್ತಾನದಲ್ಲಿ ಭಯೋತ್ಪಾದಕರ ಮೇಲೆ ನಿಗಾ ಇರಿಸಲು ಭಾರತದಿಂದ ಡ್ರೋನ್ ನೆಲೆ ಪ್ರಾರಂಭಿಸುವ ಕುರಿತು ಉಭಯ ದೇಶಗಳ ನಡುವಣ ಚರ್ಚೆಯ ವಿವರಗಳನ್ನು ಬಹಿರಂಗಪಡಿಸಲಿಲ್ಲ.

ಕಳೆದ ತಿಂಗಳು ಅಮೆರಿಕದಿಂದ ಸೇನೆ ಹಿಂತೆಗೆತದ ಬೆನ್ನಲ್ಲೇ ಅಫ್ಗಾನಿಸ್ತಾನವು ತಾಲಿಬಾನಿಗಳ ವಶವಾಗಿದೆ.

ಅಫ್ಗನ್‌ನಿಂದ ಸೇನೆ ಹಿಂತೆಗೆತದೊಂದಿಗೆ ಭಯೋತ್ಪಾದಕರ ಮೂಲಸೌಕರ್ಯಗಳನ್ನು ದಮನಿಸಲು ಈ ಹಿಂದೆ ಬಳಕೆ ಮಾಡುತ್ತಿದ್ದ ವಾಯುನೆಲೆಗಳು ಅಮೆರಿಕಕ್ಕೆ ಲಭ್ಯವಿಲ್ಲ. ಕತಾರ್, ಕುವೈತ್ ಮತ್ತು ಗಲ್ಫ್ ಸೇರಿದಂತೆ ಇತರ ದೇಶಗಳಲ್ಲಿರುವ ಅಮೆರಿಕ ನೆಲೆಯು ಪಾಕಿಸ್ತಾನ ಹಾಗೂ ಅಫ್ಗಾನಿಸ್ತಾನದಿಂದ ದೂರದಲ್ಲಿದೆ.

ಈ ಎಲ್ಲ ಬೆಳವಣಿಗೆಗಳ ಬಗ್ಗೆ ಭಾರತ ಇದುವರೆಗೆ ಯಾವುದೇ ಅಧಿಕೃತ ಪ್ರತಿಕ್ರಿಯೆಯನ್ನು ನೀಡಿಲ್ಲ.