ಧಾರವಾಡ ಕೃಷಿ ಮೇಳ: ಬಿತ್ತನೆ, ಗೊಬ್ಬರಕ್ಕೆ ಒಂದೇ ಯಂತ್ರ

ಹೌದು, ಬೀಜ ಬಿತ್ತನೆ ಹಾಗೂ ಗೊಬ್ಬರ ಹಾಕುವ ಈ ಯಂತ್ರ ಕೃಷಿಮೇಳದಲ್ಲಿ ಪ್ರಮುಖ ಆಕರ್ಷಣೆಯಾಗಿದೆ. ಬೀಜ ಬಿತ್ತುತ್ತಾ, ಗೊಬ್ಬರ ಸುರಿಯುವ ಈ ಯಂತ್ರಗಳ ಹಿಂಬದಿಯಲ್ಲಿ ಮಣ್ಣಿನ ಸಾಲು ಮುಚ್ಚುವ ವ್ಯವಸ್ಥೆಯನ್ನೂ ಮಾಡಲಾಗಿದೆ. ಇದರಿಂದ ರೈತರಿಗೆ ಇನ್ನಷ್ಟು ಖರ್ಚು ಉಳಿಯುತ್ತದೆ ಎಂಬುದು ಮಾರಾಟಗಾರರ ಮಾಹಿತಿ. ಹಲವು ರೈತರು ಆಸಕ್ತಿಯಿಂದ ಈ ಯಂತ್ರಗಳ ಬಳಿ ನಿಂತು, ಮಾಹಿತಿ ಪಡೆಯುತ್ತಿದ್ದು ಮೇಳದ ವಿವಿಧೆಡೆ ಕಂಡುಬಂತು.

ಯಂತ್ರದ ಕುರಿತು ‘ಪ್ರಜಾವಾಣಿ’ಗೆ ಮಾಹಿತಿ ನೀಡಿದ ಕೂರಿಗೆ ಯಂತ್ರವನ್ನು ಅಭಿವೃದ್ಧಿಪಡಿಸಿರುವ ದಾವಣಗೆರೆಯ ಓಂ ಗಣೇಶ ಆಗ್ರೊ ಇಂಡಸ್ಟ್ರೀಸ್‌ನ ನಂದಿಗೌಡ, ‘ನಡಕಟ್ಟಿನ ಕೂರಿಗೆ ಮಾದರಿಯಲ್ಲಿ ಈ ಕೂರಿಗೆ ಯಂತ್ರವನ್ನು ಅಭಿವೃದ್ಧಿಪಡಿಸಲಾಗಿದೆ. ಜೋಳ, ಶೇಂಗಾ, ರಾಗಿ ಮೊದಲಾದ ದ್ವಿದಳ ಧಾನ್ಯಗಳನ್ನು ಯಂತ್ರದಿಂದ ಬಿತ್ತನೆ ಮಾಡಬಹುದು. 50 ಕೆ.ಜಿ ಬಿತ್ತನೆ ಬೀಜ ಹಾಗೂ 50 ಕೆ.ಜಿ ಗೊಬ್ಬರವನ್ನು ಇದರಲ್ಲಿ ಹಾಕಬಹುದು’ ಎಂದರು.

‘ಯಂತ್ರದ ಅಭಿವೃದ್ಧಿಗೆ ₹1 ಲಕ್ಷ ಖರ್ಚಾಗಿದ್ದು, ಸಹಾಯಧನ ನೀಡುವಂತೆ ಸರ್ಕಾರಕ್ಕೆ ಮನವಿ ಮಾಡಿದ್ದೇವೆ. ಸರ್ಕಾರದ ಪ್ರತಿಕ್ರಿಯೆ ನೋಡಿಕೊಂಡು ಶೀಘ್ರ ದರ ನಗದಿ ಮಾಡಿ ರೈತರಿಗೆ ಮಾರಾಟ ಮಾಡಲಾಗುತ್ತದೆ. ರೈತರ ಖರ್ಚು ಉಳಿಸುವಂತಹ ಸಾಕಷ್ಟು ಅನುಕೂಲಗಳನ್ನು ಯಂತ್ರ ಹೊಂದಿದೆ. ಸಿಂಗಲ್ ಪೇಸ್‌ ಕರೆಂಟ್‌ ಬಳಸಿ ಎಣ್ಣೆ ತಯಾರಿಸುವ ಯಂತ್ರ, ಒಕ್ಕಣೆ ಮಾಡುವ ಯಂತ್ರವೂ ನಮ್ಮಲ್ಲಿ ಲಭ್ಯವಿವೆ’ ಎಂದು ಅವರು ಮಾಹಿತಿ ನೀಡಿದರು.

ಮಾಹಿತಿಗೆ ಸಂಪರ್ಕ ಸಂಖ್ಯೆ: 96118 89233