ಕವನ | ಕಾತರಿಕೆಯೊಂದು ಹಂಬಲವಾಗಿ

ಕಣ್ಣ ಪರದೆಯಿಂದ ಜಾರಿ ಎದೆಗಿಳಿದದ್ದು ಗೊತ್ತೇ ಆಗಿರಲಿಲ್ಲ ಅವನ ಚರ್ಯೆ ಮನಸಿನಿಂದ ಎದೆಯಾಳಕ್ಕಿಳಿದದ್ದು ಗೊತ್ತೇ ಆಗಿರಲಿಲ್ಲ

ಬಿರುಬಿಸಿಲಿನ ಸೂರ್ಯನಿಂದ ಚಂದ್ರನಾದ ಪಲ್ಲಟವದೆಷ್ಟು ಅಚ್ಚರಿ ತಂಗಾಳಿ ಸುಳಿದಂತೆ ಹವೆ ತಂಪಾಗಿ ಬದಲಾದದ್ದು ಗೊತ್ತೇ ಆಗಿರಲಿಲ್ಲ

ಮರೀಚಿಕೆಯೂ ನಿರ್ಜಲವಾಗಿತ್ತೆಂದು ಅರಿವಾಗಿ ಬಾರಿ ಬಾರಿ ಬೆದರಿದ್ದೆಷ್ಟು ಆಂತರ್ಯದಲ್ಲಿ ಜೀವಸೆಲೆ ಚಿಮ್ಮಿ ಅಂತರ್ಜಲವಾಗಿದ್ದು ಗೊತ್ತೇ ಆಗಿರಲಿಲ್ಲ

ಕಣ್ಣ ಕಾಡಿಗೆ ಅಳಿಸದಂತೆ ಕಾಪಾಡಿಕೊಳ್ಳಲು ಹೆಣಗಿದ್ದು ಸಾಕಾಗಿತ್ತು ಮೇಘ ಕರಗಿ ಹೊಳೆವ ಬೆಳಕೊಂದು ಕಾಂತಿಯಾಗಿದ್ದು ಗೊತ್ತೇ ಆಗಿರಲಿಲ್ಲ

ಮಸ್ತಿಷ್ಕ ಮಂದವಾಗಿ ಚುರುಕು ಚೆಲ್ಲಾಟವೆಲ್ಲ ಕಾಣೆಯಾಗಿತ್ತು ಗೊತ್ತೆ ಶ್ರಮದ ಬೆವರ ಹನಿಯೊಂದು ಕನಸು ಕಟ್ಟಿಕೊಟ್ಟದ್ದು ಗೊತ್ತೇ ಆಗಿರಲಿಲ್ಲ

ಕಾತರಿಕೆಯೊಂದು ಹಂಬಲಕ್ಕೆ ತಿರುಗಿ ಕಾಡುತ್ತಿದೆಯಲ್ಲ ಈಗ ಶಮಾ ಅವನ ಸಾಮೀಪ್ಯದ ಬಿಸುಪು ಸದ್ಯದಲ್ಲೆ ದಕ್ಕುವುದೆಂದು ಗೊತ್ತೇ ಆಗಿರಲಿಲ್ಲ

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.