'ಒಂದು ಕೊಲಾಜ್' ಮಕ್ಕಳ ಕವನ

Last Updated 7 ಸೆಪ್ಟೆಂಬರ್ 2019, 19:30 IST

ಅಕ್ಷರ ಗಾತ್ರ

ಒಂದು ಕೊಲಾಜ್ ಪುಟ್ಟನು ಗೀಚಿದ
ಗೋಡೆಯ ಮೇಲಿನ ನದಿಯ
ಚಿತ್ರಕೆ
ಇರುವೆಗಳು ಸೇತುವೆ ಕಟ್ಟುತಿವೆ.

ಯೋಧನ ಹಸಿರು ಎಲೆ ಬಳ್ಳಿಯ
ಮಿಲಿಟರೀ ಯೂನಿಫಾರ್ಮಿನ ಮೇಲೆ
ಇದ್ದಕ್ಕಿದ್ದಂತೆ ಗುಲಾಬಿಯೊಂದು ಅರಳಿ
ನಿಂತಿದೆ

ಕಚ್ಚಾ ಬಾಂಬು ಹೊತ್ತೇ
ಬೆನ್ನು ಬಾಗಿದ ಜಿಹಾದಿ ಮಕ್ಕಳ
ಬೆನ್ನಿಗೆ ಹೂ ಹಗುರ
ಪಾಟೀ ಚೀಲ ನೇತಾಡಿದೆ

ಜೈಲಿನ ದೊಡ್ಡ ಬಾಗಿಲುಗಳೆಲ್ಲಾ
ತೆರೆದು
ವೃದ್ಧಾಶ್ರಮದ ತಾಯಿ
ಮನೆಯ ದಾರಿ ತುಳಿದಿದ್ದಾಳೆ

ಬಣ್ಣ ಬಣ್ಣದ ಗಡಿ ರೇಖೆಗಳ
ಬರೆದ
ಕುಂಚವೊಂದು ನೀರಿನ ಬಟ್ಟಲಿನಲಿ
ಎಲ್ಲ ಬಣ್ಣಗಳ ತುಸು ತುಸುವೇ ಕರಗಿಸಿ

ಒಂದಾಗಿಸುತಿದೆ ಎಲ್ಲ

ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.