ಶನಿವಾರ, ಮಾರ್ಚ್ 6, 2021
21 °C

ಕವಿತೆ: ಧ್ಯಾನವೆಂದರೆ ಹೀಗೆ

ಮೂಡ್ನಾಕೂಡು ಚಿನ್ನಸ್ವಾಮಿ Updated:

ಅಕ್ಷರ ಗಾತ್ರ : | |

Prajavani

ಹಕ್ಕಿ ಗೂಡಿನೊಳಗಿಣುಕಿ
ತನ್ನ ಮರಿಗಳನ್ನು ನೋಡುವಂತೆ
ಅರೆನಿಮೀಲಿತ ಕಣ್ಣುಗಳು
ಒಳಮುಖವಾಗಿ ನಖಶಿಖಾಂತ
ತದೇಕ ದಿಟ್ಟಿಸುತ್ತಿರಬೇಕು

ಆನೆಯಂತೆ ಕಿವಿಗಳನ್ನು
ಒಳಗೆಳೆದುಕೊಂಡು
ಒಡಲಮುಖ ಮಾಡಿ
ನಾಡಿಬಡಿತವನ್ನು ಕೇಳಿಸಿಕೊಳ್ಳುತ್ತಿರಬೇಕು

ಮೂಗು ಅರಳುವ ಹೂವಿನಂತೆ
ಹೊರಳೆ ಅರಳಿಸಿ
ಬರುವ ಹೋಗುವ
ಉಸಿರ ಸಂಚಾರದ ಲೆಕ್ಕ ಇಡಬೇಕು

ತುಟಿಗಳು
ಕಮಲದಂತೆ ಬಿರಿದು
ಮುಗುಳುನಗುವಿನ
ಬುದ್ಧಕಳೆಯನ್ನು ಚೆಲ್ಲಬೇಕು

ಮೋಡದ ರಭಸಕ್ಕೆ
ಬೆಟ್ಟದ ನವಿಲು ಗರಿಗೆದರಿ ನರ್ತಿಸುವಂತೆ
ಚರ್ಮವು ಸ್ಪರ್ಶಾತೀತವಾಗಿ
ರೋಮಾಂಚನಗೊಳ್ಳಬೇಕು

ಮನಸ್ಸು ಜಲತರಂಗಗಳ
ನಿಃಶಬ್ದವನ್ನು ಸವಿಯುತ್ತಾ
ಚಿತ್ತವಿಹೀನ ಸ್ಥಿತಿಯಲ್ಲಿ
ತಂಗಬೇಕು

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.