ಕವಿತೆ: ಒಂದು ಮಳೆಯನ್ನು ಏನೆಲ್ಲಾ ಮಾಡಬಹುದು

ಮಳೆಯನ್ನು
ನುಡಿಸುವುದು ಎಂದರೆ
ಕತ್ತರಿಸಿಹೋದ ಬೆರಳುಗಳಿಂದ
ಆಕಾಶದ ವೀಣೆಯನ್ನು
ನೇವರಿಸುವುದು ಎಂದರ್ಥ

ಮಳೆಯನ್ನು
ನೇವರಿಸುವುದು ಎಂದರೆ
ಅವಳು ಅವಳೊಂದಿಗೆ
ಸಿಡಿದೇಳುವ ಹೃದಯವನ್ನು
ಬಿಡಿಸುವುದು ಎಂದರ್ಥ

ಮಳೆಯನ್ನು
ಬಿಡಿಸುವುದು ಎಂದರೆ
ಕಂಬನಿ ತೊಟ್ಟಿಕ್ಕಿ ಹರಡಿದ
ತುಟಿಗಳಿಂದ ಅಕ್ಷರಗಳನ್ನು
ನೆನಪಿಸಿಕೊಳ್ಳುವುದು ಎಂದರ್ಥ

ಮಳೆಯನ್ನು
ನೆನಪಿಸಿಕೊಳ್ಳುವುದು ಎಂದರೆ
ಒಂದು ಕೊಡೆಯಿಂದ
ನಿಲ್ಲಿಸಲು ಸಾಧ್ಯವಾಗುವವರೆಗೆ
ತಡೆದು ಮಣಿಸುವುದು ಎಂದರ್ಥ

ಮಳೆಯನ್ನು
ತಡೆಯುವುದು ಎಂದರೆ
ಇಷ್ಟವಿರುವಾತನನ್ನು
ಹಠಾತ್ತನೆ ಕಂಡಾಗ ಹಿಡಿತಕ್ಕೆ
ಸಿಗದಂತಿರುವುದು ಎಂದರ್ಥ

ಮಳೆಯನ್ನು
ಕಾಣುವುದು ಎಂದರೆ
ತನ್ನದೇ ಸಮಾಧಿ ಈಕ್ಷಿಸುವ
ಪರೇತಾತ್ಮನ ಹಾಗೆ
ಮೂಕ, ಕಣ್ಣು ಮುಚ್ಚಿದ
ನೆಂದ ಶಬ್ದ ಸಾಲು ಎಂದರ್ಥ !