ಕಣ್ಣೋಟದಿಂದಲೇ ಕಡತ ರವಾನೆ...
ಅಕ್ಷರ ಗಾತ್ರ :ಆ |ಆ |ಆ
ಲಂಡನ್‌ (ಪಿಟಿಐ): ಕಣ್ಣೋಟದಿಂದಲೇ ಕಂಪ್ಯೂಟರ್‌ ಪರದೆಯಿಂದ (ಸ್ಕ್ರೀನ್‌) ನಿಮ್ಮ ಸ್ಮಾರ್ಟ್‌ಫೋನ್‌ ಅಥವಾ ಟ್ಯಾಬ್ಲೆಟ್‌ಗೆ ಕಡತಗಳನ್ನು (ಫೈಲ್ಸ್‌) ರವಾನಿಸಲು ಅವಕಾಶ ಮಾಡಿಕೊಡುವ ಹೊಸ ತಂತ್ರಜ್ಞಾನವನ್ನು ಬ್ರಿಟನ್‌ ವಿಜ್ಞಾನಿಗಳು ಅಭಿವೃದ್ಧಿಪಡಿಸಿದ್ದಾರೆ.
‘ಐಡ್ರಾಪ್‌’ ಹೆಸರಿನ ಈ ನೂತನ ತಂತ್ರಜ್ಞಾನ, ಕಂಪ್ಯೂಟರ್‌ ಬಳಕೆದಾರರ ಕಣ್ಣುಗಳ ಚಲನವಲನಗಳನ್ನು ಗುರುತಿಸಿ ಸಂಬಂಧಿಸಿದ ಕಡತ ಅಥವಾ ಚಿತ್ರವನ್ನು ಸ್ಮಾರ್ಟ್‌ಫೋನ್‌ ಅಥವಾ ಟ್ಯಾಬ್ಲೆಟ್‌ಗೆ ಕಳುಹಿಸುತ್ತದೆ ಎಂದು ‘ನ್ಯೂ ಸೈಂಟಿಸ್ಟ್‌’ ವರದಿ ಮಾಡಿದೆ.
ಉದಾಹರಣೆಗೆ ಯಾವುದಾದರೂ ಕಡತ ಅಥವಾ ಛಾಯಾಚಿತ್ರವನ್ನು ಆಯ್ಕೆ ಮಾಡಿ ಗುಂಡಿ ಒತ್ತಿದರೆ ಸಾಕು ಅದು ಕಂಪ್ಯೂಟರ್‌ ಬಳಕೆದಾರರ ಸ್ಮಾರ್ಟ್‌ಫೋನ್‌ಗೆ ತಲುಪುತ್ತದೆ.
‘ನಾವು ಯಾವ ಕಡತ ಅಥವಾ ಚಿತ್ರವನ್ನು ಪಡೆಯಲು ಬಯಸುತ್ತೇವೆ ಸಹಜವಾಗಿ ನಮ್ಮ ಕಣ್ಣುಗಳು ಆ ಕಡೆಗೆ ಹರಿಯುತ್ತವೆ. ಅದಕ್ಕೆ ಪೂರಕವಾಗಿ ನಮ್ಮ ತಂತ್ರಜ್ಞಾನ ಕಾರ್ಯನಿರ್ವಹಿಸುತ್ತದೆ’ ಎಂದು ಇತರ ಸಹೋದ್ಯೋಗಿಗಳೊಂದಿಗೆ ಹೊಸ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸಿರುವ ಬ್ರಿಟನ್‌ನ ಲ್ಯಾಂಕ್‌ಸ್ಟರ್‌ ವಿಶ್ವವಿದ್ಯಾಲಯದ ಜೇಸನ್‌ ಟರ್ನರ್‌ ತಿಳಿಸಿದ್ದಾರೆ.
ಬೆರಳಿಗೆ ಸಂದೇಶ
.ವಾಷಿಂಗ್ಟನ್‌ (ಪಿಟಿಐ): ಮೊಬೈಲ್‌ಗೆ ಕರೆ ಬಂದಿದ್ದು ತಿಳಿಯದೆ ಎಷ್ಟೋ ಕರೆಯನ್ನು ಸ್ವೀಕರಿಸಲು ಸಾಧ್ಯವಾಗುವುದಿಲ್ಲ. ಇನ್ನು ಮುಂದೆ ಈ ತೊಂದರೆ ಇಲ್ಲ. ನಿಮ್ಮ ಕೈ ಬೆರಳಿಗೆ ಸಂದೇಶ ಕಳುಹಿಸುವಂತಹ ಹೊಸ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸಲಾಗಿದೆ.
ಕೈ ಬೆರಳಿನಲ್ಲಿ ಬ್ಲೂಟೂತ್‌ ಉಂಗುರ ಧರಿಸಿದರೆ ನಿಮ್ಮ ಸ್ಮಾರ್ಟ್‌ಫೋನ್‌ ನೇರವಾಗಿ ನಿಮ್ಮ ಕೈ ಬೆರಳಿಗೇ ಸಂದೇಶ ಕಳಿಸುವಂತಹ ತಂತ್ರಜ್ಞಾನ ಇದರಲ್ಲಿದೆ ಎಂದು ಮೂಲಗಳು ತಿಳಿಸಿವೆ.
ಉಂಗುರದ ಬದಲಾಗಿ ಗಡಿಯಾರ, ಟೈಮರ್‌ ಹಾಗೂ ಫೋನ್‌ ಫೈಂಡರ್‌ಗಳನ್ನೂ ಬಳಸಬಹುದು.
