ದಾರಿ ತೋರಿದ ಚಾಲಕ

ಮೊನ್ನೆ ಯಾವುದೋ ಕೆಲಸದ ನಿಮಿತ್ತ ದತ್ತಾತ್ರೇಯ ನಗರಕ್ಕೆ ಹೋಗಬೇಕಾಯಿತು. ಸಂಪೂರ್ಣ ವಿಳಾಸ ಇದ್ದರೂ ದಿನದಿನಕ್ಕೆ ತಲೆಎತ್ತುತ್ತಿರುವ ಉಪನಗರಗಳ ಪರಿಚಯ ಇಲ್ಲದಿದ್ದುದರಿಂದ ಹೊಸಕೆರೆಹಳ್ಳಿಯವರೆಗೆ ಬಸ್‌ನಲ್ಲಿ ಹೋಗಿ ಅಲ್ಲಿಂದ ಆಟೊದಲ್ಲಿ ಹೋಗೋಣವೆಂದು ಅಲ್ಲೇ ನಿಂತಿದ್ದ ಆಟೊ ವಿಚಾರಿಸಿದಾಗ ಮೊಬೈಲ್‌ನಲ್ಲಿ ಮಾತನಾಡುವುದರಲ್ಲಿ ವ್ಯಸ್ತನಾಗಿದ್ದ ಆತ ನನ್ನ ಕಡೆ ತಿರುಗಿಯೂ ನೋಡದೆ ಬರುವುದಿಲ್ಲವೆಂದು ತಲೆಯಾಡಿಸಿದ.



ವಿಧಿಯಿಲ್ಲದೆ ಇನ್ನೂ ಹತ್ತು ಹೆಜ್ಜೆ ನಡೆದು ಇನ್ನೊಂದು ಆಟೊಗೆ ಕೈ ಮಾಡಿದೆ. ಆತ ವಿಳಾಸ ನೋಡಿ `ಸಾರ್ ನೀವು ಬರಲೇಬೇಕು ಅಂದ್ರೆ ಬರ‌್ತೀನಿ. ಮಿನಿಮಮ್ ಚಾರ್ಜ್ ಆಗುತ್ತೆ ಆದರೆ ಇಲ್ಲಿಂದ ಈ ವಿಳಾಸ ಸರಿಯಾಗಿ ಅರ್ಧ ಕಿಲೋಮೀಟರ್ ಸಹ ಆಗೋಲ್ಲ~ ಎಂದು ಹೇಳಿ ಹೋಗಬೇಕಾದ ದಾರಿ ಸಹ ತೋರಿಸಿದಾಗ, ಆಟೊದವರೆಲ್ಲಾ ಅಪ್ರಾಮಾಣಿಕರು, ಕರೆದ ಕಡೆ ಬರದೆ ಧಿಮಾಕು ತೋರಿಸುವವರು ಎಂದು ನಂಬಿದ್ದ ನನ್ನ ಅಭಿಪ್ರಾಯ ಬದಲಾಗಿ, ಆತನ ಸಹೃದಯತೆ ಪ್ರಾಮಾಣಿಕತೆಗಳಿಗೆ ಹೃದಯಪೂರ್ವಕವಾಗಿ ಧನ್ಯವಾದ ಅರ್ಪಿಸಿ ಆತ ತೋರಿಸಿದ ದಾರಿ ಹಿಡಿದೆ.