ಶುಕ್ರವಾರ, ಜೂಲೈ 10, 2020
22 °C

ಪತ್ತೇದಾರಿ ವಕೀಲ

ಗಿರೀಶ ಕೆ.ಎಸ್ Updated:

ಅಕ್ಷರ ಗಾತ್ರ : | |

ಪತ್ತೇದಾರಿ ವಕೀಲ

ಸಂಸಾರದ ಜಗಳ, ಅಳು, ಗೋಳಾಟ, ಅದೇ ಪುನಾರವರ್ತಿತ ಘಟನೆಗಳು, ಕಪ್ಪು-ಬಿಳುಪಿನ ಪಾತ್ರಗಳು, ಮನೆ ಒಳಗೆ ನಡೆಯುವ ಚರ್ವಿತಚರ್ವಣ ಸನ್ನಿವೇಶಗಳು. ಇಂಥ ಮೆಗಾ ಧಾರಾವಾಹಿಗಳನ್ನು ನೋಡಿ ಬೇಸತ್ತವರಿಗೆ ಇದೀಗ ಪತ್ತೇದಾರಿ ಧಾರಾವಾಹಿ ನೋಡುವ ಅವಕಾಶ.  ದೂರದರ್ಶನದಲ್ಲಿ ಪ್ರಸಾರವಾಗುತ್ತಿದ್ದ `ಅಜಿತನ ಸಾಹಸ~ಗಳನ್ನು ನೋಡಿದ್ದ ಪ್ರೇಕ್ಷಕರಿಗೆ ಇಷ್ಟವಾಗುವಂತೆ `ಅಡ್ವೋಕೇಟ್ ಅರ್ಜುನ್~ ಈಗ ಸಿದ್ಧವಾಗುತ್ತಿದೆ.



`ವಾರಕ್ಕೊಂದು ಕಥೆ ಪ್ರಸಾರ ಮಾಡಲಾಗುವುದು. ಅನವಶ್ಯಕವಾಗಿ ಕಥೆಯನ್ನು ಎಳೆಯುವುದಿಲ್ಲ~ ಎನ್ನುವ ಭರವಸೆ ನಿರ್ದೇಶಕ ಸುಧಾಕರ್ ಸಾಜ ಅವರಿಂದ ದೊರೆಯಿತು.



`ಬರುತ್ತಿರುವ ಎಲ್ಲಾ ಮೆಗಾ ಧಾರಾವಾಹಿಗಳಿಗಿಂತ ತಮ್ಮದು ವಿಭಿನ್ನ. ಬಹುತೇಕ ಎಲ್ಲ ಧಾರಾವಾಹಿಗಳಲ್ಲಿ ಮನೆಯೊಳಗಿನ ಸನ್ನಿವೇಶಗಳೇ ಜಾಸ್ತಿ. ಮನೆಯ ಹೊರಗೆ ಅಂದರೆ ಒಂದೇ ಊರಿನಲ್ಲಿ ಚಿತ್ರೀಕರಣವಾಗುವುದೇ ಹೆಚ್ಚು. ಆದರೆ, ತಮ್ಮ ಧಾರಾವಾಹಿಯ ಪ್ರತಿ ಎಪಿಸೋಡನ್ನು ಬೇರೆ ಬೇರೆ ಊರುಗಳಲ್ಲಿ ಚಿತ್ರೀಕರಿಸುವ ಯೋಜನೆ ಇದೆ~ ಎಂದು ಸುಧಾಕರ್ ಹೇಳಿದರು. ಹೀಗೆ ಊರಿಂದ ಊರಿಗೆ ಪಯಣ ಬೆಳೆಸುವುದರಿಂದ ನಿರ್ಮಾಣ ವೆಚ್ಚ ಹೆಚ್ಚುವುದಾದರೂ ಗುಣಮಟ್ಟದ ಬಗ್ಗೆ ಅವರ ಗಮನವಂತೆ.



`ಬದುಕಿನ ನೈಜ ಘಟನೆಗಳ ಸ್ಫೂರ್ತಿ ಈ ಧಾರಾವಾಹಿಗಿದೆ. ಆದರೆ ಯಾವ ಘಟನೆಗಳನ್ನೂ ನೇರವಾಗಿ ತೆಗೆದುಕೊಂಡಿಲ್ಲ. ನೈಜ ಘಟನೆಗಳ ಸ್ಫೂರ್ತಿಯಿಂದ ಕಾಲ್ಪನಿಕವಾಗಿ ಸೃಷ್ಟಿಸಿದ ಕಥಾಗುಚ್ಚ ಇದರಲ್ಲಿದೆ~ ಎಂದರು ಸಾಜ.



ಅಡ್ವೊಕೇಟ್ ಅರ್ಜುನ್ ಪಾತ್ರದಲ್ಲಿ ರಾಜೇಶ್ ಕಾಣಿಸಿಕೊಳ್ಳುತ್ತಿದ್ದು, ಪ್ರತಿ ವಾರವೂ ಒಂದೊಂದು ಪ್ರಕರಣವನ್ನು ಬಗೆಹರಿಸಲಿದ್ದಾರೆ. ರಿಕಿ ಕೇಜ್ ಸಂಗೀತ ಮತ್ತು ಗುರು ಪ್ರಶಾಂತ್ ರೈ ಕಾಮೆರಾ ಈ ಧಾರಾವಾಹಿಗಿದೆ. ಸುಧಾಕರ್ ಸಾಜ ಅವರೇ ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದಿದ್ದಾರೆ.



ಅಂದಹಾಗೆ, ಟಿ.ಎನ್.ಸೀತಾರಾಂ ಅವರ `ಮುಕ್ತ ಮುಕ್ತ~ ಧಾರಾವಾಹಿಯಲ್ಲಿನ ನ್ಯಾಯಾಲಯದ ದೃಶ್ಯಗಳು ವೀಕ್ಷಕರಿಗೆ ರೋಮಾಂಚನ ನೀಡುತ್ತಿರುವ ಸಂದರ್ಭದಲ್ಲೇ, ಅದಕ್ಕಿಂತಲೂ ಭಿನ್ನವಾದ ಕೋರ್ಟ್ ಸೀನ್‌ಗಳು `ಅಡ್ವೊಕೇಟ್ ಅರ್ಜುನ್~ ಧಾರಾವಾಹಿಯಲ್ಲಿ ಇರಲಿವೆಯಂತೆ.



`ಅಡ್ವೊಕೇಟ್ ಅರ್ಜುನ್~ ಜೂನ್ 11ರಿಂದ ಪ್ರತಿ ಶನಿವಾರ ರಾತ್ರಿ 9ರಿಂದ ಒಂದು ತಾಸು `ಉದಯ ವಾಹಿನಿ~ಯಲ್ಲಿ ಪ್ರಸಾರವಾಗಲಿದೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.