ಬಿಎಂಟಿಸಿಗೆ ಹುಡ್ಕೊ ಪ್ರಶಸ್ತಿ ಗರಿ

ಬೆಂಗಳೂರು: ಕೇಂದ್ರ ಸರ್ಕಾರದ ವಸತಿ ಮತ್ತು ನಗರಾಭಿವೃದ್ಧಿ ನಿಗಮದ (ಹುಡ್ಕೊ) 2012 ನೇ ಸಾಲಿನ ರಾಷ್ಟ್ರೀಯ ಪ್ರಶಸ್ತಿಗೆ ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆ ಆಯ್ಕೆಯಾಗಿದೆ.



ನಗರ ಪ್ರದೇಶಗಳ ಜನರ ಜೀವನ ಪರಿಸರವನ್ನು ಉತ್ತಮಪಡಿಸಲು ಕೈಗೊಂಡ ಅತ್ಯುತ್ತಮ ಸೇವೆಗಾಗಿ ಪ್ರತಿ ವರ್ಷ ಈ ಪ್ರಶಸ್ತಿಯನ್ನು ಹುಡ್ಕೊ ನೀಡುತ್ತಿದೆ.ಬಿಎಂಟಿಸಿಯು ಬೆಂಗಳೂರು ನಗರದ ಪ್ರಮುಖ 10 ಸ್ಥಳಗಳಲ್ಲಿ ಸಂಚಾರ ಮತ್ತು ಸಾರಿಗೆ ನಿರ್ವಹಣಾ ಕೇಂದ್ರಗಳನ್ನು (ಟಿಟಿಎಂಸಿ) ನಿರ್ಮಿಸಿರುವ ಯೋಜನೆಯನ್ನು, ನಗರ ಪ್ರದೇಶಗಳ ಸಾರಿಗೆ ಸೇವೆಯಲ್ಲಿ ಮೂಲಭೂತ ಸೌಕರ್ಯಗಳನ್ನು ಅಭಿವೃದ್ಧಿಪಡಿಸಿರುವುದು ಅತ್ಯುತ್ತಮ ಕಾರ್ಯವೆಂದು ಪರಿಗಣಿಸಲಾಗಿದೆ.



ಪ್ರಶಸ್ತಿಯು 1 ಲಕ್ಷ ರೂ ನಗದು ಬಹುಮಾನ ಹೊಂದಿದ್ದು, ಹುಡ್ಕೊ ವಾರ್ಷಿಕ ದಿನವಾದ ಏ. 25 ರಂದು ನವದೆಹಲಿಯ ಇಂಡಿಯನ್ ಹ್ಯಾಬಿಟಾಟ್ ಸೆಂಟರ್‌ನಲ್ಲಿ ನಡೆಯುವ ಸಮಾರಂಭದಲ್ಲಿ ಕೇಂದ್ರ ವಸತಿ ಮತ್ತು ನಗರ ಬಡತನ ನಿರ್ಮೂಲನಾ ಸಚಿವೆ ಸೆಲ್ಜಾ ಪ್ರಶಸ್ತಿ ನೀಡುವರು.