ಯಂತ್ರಮಾನವ: ರಷ್ಯಾ ಸರದಿ

ಅಂತರಿಕ್ಷ ಹಾಗೂ ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದಲ್ಲಿ (ಐಎಸ್‌ಎಸ್) ಗಗನಯಾತ್ರಿಗಳು ನಡೆಸುತ್ತಿರುವ ಪ್ರಯೋಗಗಳಿಗೆ ನೆರವು ನೀಡುವ ಉದ್ದೇಶದಿಂದ ಅಮೆರಿಕ ಬಾಹ್ಯಾಕಾಶ ಅಧ್ಯಯನ ಸಂಸ್ಥೆ `ನಾಸಾ~, ಜನರಲ್ ಮೋಟಾರ್ಸ್‌ ಕಂಪೆನಿಯ ನೆರವಿನೊಂದಿಗೆ ರೋಬೋನಾಟ್2 (ಆರ್2) ಎಂಬ ರೋಬೋಟ್ ರೂಪಿಸಿ `ಐಎಸ್‌ಎಸ್~ಗೆ ಕಳುಹಿಸಿರುವುದು ನೆನಪಿದೆ ತಾನೇ?



`ಆರ್2~ ಈಗಾಗಲೇ ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದಲ್ಲಿ ಗಗನಯಾತ್ರಿಗಳು ನಡೆಸುತ್ತಿರುವ ಕೆಲಸಗಳಿಗೆ ಹೆಗಲು ಕೊಡುತ್ತಿದೆ. ಈ ಯಂತ್ರಮಾನವನ ಸೇವೆಯನ್ನು `ಐಎಸ್‌ಎಸ್~ಗೆ ಮಾತ್ರ ಸೀಮಿತಗೊಳಿಸದೆ ಭವಿಷ್ಯದ ಇತರ ಬಾಹ್ಯಾಕಾಶ ಯೋಜನೆಗಳಿಗೂ ಬಳಸಿಕೊಳ್ಳುವುದು `ನಾಸಾ~ದ ಯೋಜನೆಯಾಗಿದೆ.

ಈಗ ರಷ್ಯಾದ ಸರದಿ..!



`ನಾಸಾ~ದ ಹಾದಿಯಲ್ಲೇ ರಷ್ಯಾದ ಸಂಯುಕ್ತ ಬಾಹ್ಯಾಕಾಶ ಅಧ್ಯಯನ ಸಂಸ್ಥೆ, `ರೊಸ್ಕೊಸ್ಮೊಸ್~ ಕೂಡ ಸಾಗುತ್ತಿದೆ.  ಅಂತರಿಕ್ಷದಲ್ಲಿ ಕಾರ್ಯನಿರ್ವಹಿಸಬಲ್ಲ ಯಂತ್ರಮಾನವನನ್ನು ಸೃಷ್ಟಿಸಲು ಅದು ಯಶಸ್ವಿಯಾಗಿದೆ. ಇಪ್ಪತ್ತು ವರ್ಷಗಳ ಅವಧಿಯಲ್ಲಿ ರಷ್ಯಾ ರೂಪಿಸಿರುವ ಮೊದಲ ಅಂತರಿಕ್ಷ ರೊಬೋಟ್ ಇದಾಗಿದೆ.ಈ ಬಾಹ್ಯಾಕಾಶ ರೋಬೋಟ್‌ಗೆ `ಎಸ್-400~ ಎಂದು ರೊಸ್ಕೊಸ್ಮೊಸ್ ಹೆಸರಿಟ್ಟಿದೆ. 



   ಬೋಲ್ಟ್ ತಿರುಪಿಸುವುದು,  ನೌಕೆಯಲ್ಲಿ ಹಾನಿಗೊಳಗಾದ ಭಾಗ ಪತ್ತೆ ಹಚ್ಚುವುದು ಸೇರಿದಂತೆ ಅತ್ಯಂತ ಸರಳ ಕೆಲಸಗಳನ್ನು ಮಾಡುವ ಸಾಮರ್ಥ್ಯ ಈ ಯಂತ್ರಮಾನವನಿಗಿದೆ ಎಂದು ತಜ್ಞರು ಹೇಳಿದ್ದಾರೆ.



ಮುಂದಿನ ಎರಡು ವರ್ಷಗಳ ಒಳಗಾಗಿ `ಎಸ್-400~ನ್ನು ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಕ್ಕೆ ಕಳುಹಿಸುವ ಯೋಜನೆಯಲ್ಲಿ  ರಷ್ಯಾ ಇದೆ. ಆ ನಂತರ ಇದೇ ರೋಬೋಟನ್ನು ಭವಿಷ್ಯದಲ್ಲಿ ಕೈಗೊಳ್ಳಲಾಗುವ  ಚಂದ್ರ, ಮಂಗಳನ ಅನ್ವೇಷಣೆ ಕಾರ್ಯಕ್ರಮಗಳಲ್ಲಿ ಬಳಸುವ ಆಲೋಚನೆ ಅದರದು.



`ಎಸ್-400~ `ಐಎಸ್‌ಎಸ್~ಗೆ ಕೈಗೊಳ್ಳುವ ಪ್ರವಾಸವು ಅದರ ಕಾರ್ಯನಿರ್ವಹಣೆಯ ಸಾಮರ್ಥ್ಯ  ಅಳೆಯಲು ವಿಜ್ಞಾನಿಗಳಿಗೆ ಅವಕಾಶ ನೀಡಲಿದೆ ಎಂದು ಗಗನಯಾತ್ರಿ ಸರ್ಜಿ ಅವ್ಡೆಯೆವ್ ಹೇಳಿದ್ದಾರೆ.



`ಅಂತರಿಕ್ಷದ ಪ್ರಯೋಗಗಳಲ್ಲಿ ರೋಬೊಟ್ ಗಗನಯಾತ್ರಿಗಳನ್ನು ಬಳಸುವ ವಿಚಾರದಲ್ಲಿ ದೇಶವು ಇಟ್ಟಿರುವ ಮೊದಲ ಹೆಜ್ಜೆ ಇದು~ ಎಂದು `ಎಸ್-400~ ಸೃಷ್ಟಿಯನ್ನು `ರೊಸ್ಕೊಸ್ಮೊಸ್~ ಅಧಿಕಾರಿಯೊಬ್ಬರು ಬಣ್ಣಿಸಿದ್ದಾರೆ.



ಇತ್ತ ರಷ್ಯಾ ಅಂತರಿಕ್ಷದ ಬಳಕೆಗಾಗಿ  `ಯಂತ್ರ ಮಾನವ~ನನ್ನು ಸೃಷ್ಟಿಸಿದ ಸುದ್ದಿ ಬಹಿರಂಗವಾಗುತ್ತಲೇ, ಅತ್ತ ಜಪಾನ್ ಮತ್ತು ಜರ್ಮನಿ ಇಂತಹುದೇ ಯಂತ್ರಮಾನವರನ್ನು ನಭಕ್ಕೆ ಚಿಮ್ಮಿಸಲು ಚಿಂತನೆ ನಡೆಸಿರುವ ಮಾಹಿತಿಯು ಹೊರ ಬಿದ್ದಿದೆ. ಅಂತರಿಕ್ಷದಲ್ಲಿ ಯಂತ್ರಮಾನವರು ನಡೆದಾಡುದ ದಿನಗಳು ದೂರವಿಲ್ಲ..!