ಹಾಲು ಉತ್ಪಾದಕರ ಸಮಾವೇಶ

ಬೆಂಗಳೂರು: ಕರ್ನಾಟಕ ಹಾಲು ಮಹಾ­ಮಂಡಳಿ (ಕೆಎಂಎಫ್‌) ನಗರದಲ್ಲಿ ಶನಿ­ವಾರ ಆಯೋಜಿಸಿದ್ದ ಹಾಲು ಉತ್ಪಾದ­ಕರ  ಸಮಾವೇಶದಲ್ಲಿ ರಾಜ್ಯದ ವಿವಿಧ ಭಾಗಗಳ ಅಸಂಖ್ಯಾತ ರೈತರು ಪಾಲ್ಗೊಂಡಿದ್ದರು.



ಮುಖ್ಯಮಂತ್ರಿ ಸಿದ್ದರಾಮಯ್ಯ ಸಮಾ­ವೇಶ ಉದ್ಘಾಟಿಸಿದರು. ನಂದಿನಿ ಉತ್ಪನ್ನ­ಗಳ ಪ್ರಚಾರ ರಾಯಭಾರಿ, ನಟ ಪುನೀತ್‌ ರಾಜ್‌ಕುಮಾರ್‌ ಅವರನ್ನು  ಸನ್ಮಾನಿಸಲಾಯಿತು.



ಕಾಲುಬಾಯಿ ಜ್ವರ ತಡೆಗಟ್ಟಲು ತೆಗೆದುಕೊಳ್ಳಬೇಕಾದ ಮುಂಜಾಗ್ರತಾ ಕ್ರಮಗಳು ಹಾಗೂ ಲಸಿಕೆ ಹಾಕಿಸುವ ಬಗ್ಗೆ  ಕೈಪಿಡಿಯನ್ನು ಹಂಚಲಾಯಿತು.

ಸಮಾವೇಶದಲ್ಲಿ ಪಾಲ್ಗೊಂಡವರಿಗೆ ಹಂಚಲು ತಂದಿದ್ದ ನಂದಿನಿ ಮಜ್ಜಿಗೆ  ಹಾಗೂ ನೀರಿನ ಪ್ಯಾಕೆಟ್‌ಗಳನ್ನು ಸರಿ­ಯಾಗಿ ವಿತರಿಸದ ಕಾರಣ ನೂರಾರು ಪ್ಯಾಕೆಟ್‌ಗಳು ನೆಲಕ್ಕೆ ಬಿದ್ದು ವ್ಯರ್ಥ­ವಾದವು. ಸಮಾವೇಶ ನಡೆದ ಬೆಂಗ­ಳೂರು ಅಂತರರಾಷ್ಟ್ರೀಯ ವಸ್ತು­ಪ್ರದರ್ಶನ ಕೇಂದ್ರದ ಮುಂಭಾಗದ ಮೈದಾನದಲ್ಲಿ ಜನ ಜಮಾಯಿಸಿದ್ದರಿಂದ ತುಮಕೂರು ರಸ್ತೆಯಲ್ಲಿ ಸಂಚಾರ ದಟ್ಟಣೆ ಉಂಟಾಯಿತು.



ಪ್ರಯಾಣಿಕರು ಗಂಟೆಗಟ್ಟಲೆ ರಸ್ತೆಯ ಮೇಲೆಯೆ ಕಾಲ ಕಳೆಯುವಂತಾಯಿತು. ಸಂಜೆ ಆರು ಗಂಟೆಯವರೆಗೂ ಯಶವಂತಪುರದಿಂದ ನೆಲಮಂಗಲ ಕ್ರಾಸ್‌ವರೆಗಿನ ರಸ್ತೆಯಲ್ಲಿ ವಾಹನಗಳು  ನಿಧಾನಗತಿಯಲ್ಲಿ ಸಂಚರಿಸಿದವು.



ಸಿದ್ದರಾಮಯ್ಯ ನನ್ನ ಗುರು !

‘ಸಿದ್ದರಾಮಯ್ಯ ನನ್ನ ಗುರು. ನಾನು ಬೇರೆ ಪಕ್ಷದಲ್ಲಿದ್ದರೂ ಅವರು ನನ್ನ ಗುರುಗಳು. ಮೊದಲಿನಿಂದಲೂ ಅವರು ನನಗೆ ಮೆಚ್ಚಿನವರು’ ಎಂದು ಕೆಎಂಎಫ್‌ ಅಧ್ಯಕ್ಷ ಸೋಮಶೇಖರ ರೆಡ್ಡಿ ಹೇಳಿದರು.