‘ಲೋಕಪಾಲದಿಂದ ಭ್ರಷ್ಟರಿಗೆ ರಕ್ಷಣೆ’

ಬೆಂಗಳೂರು: ‘ಲೋಕಪಾಲ ಕಾಯ್ದೆಯು ಭ್ರಷ್ಟ ಅಧಿ­ಕಾರಿ­ಗಳನ್ನು  ಮತ್ತು ರಾಜಕಾರಣಿಗಳನ್ನು ರಕ್ಷಿ­ಸುವ ಕಾನೂನಾಗಿದೆ. ಇದರಿಂದ, ಜನಸಾಮಾನ್ಯರಿಗೆ ಮೂರು ಕಾಸಿನ ಪ್ರಯೋಜನವಿಲ್ಲ’ ಎಂದು ನಿವೃತ್ತ ಲೋಕಾಯುಕ್ತ ನ್ಯಾಯಮೂರ್ತಿ ಎನ್‌.­ವೆಂಕಟಾಚಲ ಅವರು ಹೇಳಿದರು.



ಭ್ರಷ್ಟಾಚಾರ ನಿರ್ಮೂಲನ ವೇದಿಕೆಯು ನಗರದ ಪುರಭವನದಲ್ಲಿ ಸೋಮವಾರ ಆಯೋಜಿಸಿದ್ದ ಸಂಘದ 8 ನೇ ವಾರ್ಷಿಕೋತ್ಸವ ಸಮಾರಂಭದಲ್ಲಿ ಭಾಗವಹಿಸಿ ಅವರು ಮಾತನಾಡಿದರು.



‘ಲೋಕಪಾಲ ಕಾನೂನಿನಲ್ಲಿ ಯಾರು ದೂರು ನೀಡು­ತ್ತಾರೋ ಅವರ ಮೇಲೆ ಕ್ರಮ ಕೈಗೊಳ್ಳ­ಬಹುದು ಎಂಬ ಅಂಶವಿದೆ. ಇದರಿಂದ, ಭ್ರಷ್ಟ ಅಧಿ­ಕಾರಿ­ಗಳು ನನಗೆ ಕೆಲಸ ಮಾಡಲು ತೊಂದರೆ ನೀಡುತ್ತಿದ್ದಾರೆ ಎಂದು ದೂರು ಸಲ್ಲಿಸಿ ಕ್ರಮ ಕೈಗೊಳ್ಳಬಹುದು. ಇದರಿಂದ, ಜನರು ಯಾವುದೇ ಅಧಿಕಾರಿಯ ವಿರುದ್ಧ ದೂರು ಸಲ್ಲಿಸಿದರೆ, ಅವರಿಗೇ ಕಂಟಕಪ್ರಾಯವಾಗುತ್ತದೆ’ ಎಂದು ಹೇಳಿದರು.



‘ರಾಜ್ಯದಲ್ಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಲೋಕಪಾಲ ಕಾಯ್ದೆ ಅನುಷ್ಠಾನಕ್ಕೆ ತಾತ್ಕಾ­ಲಿಕ ತಡೆಯೊಡ್ಡಿದ್ದಾರೆ. ಮುಖ್ಯಮಂತ್ರಿ ಅವರು ಈ ಕಾನೂನಿನ ಕುರಿತು ಕೂಲಂಕಶವಾಗಿ ಪರಿಶೀಲಿ­ಸ­ಬೇಕು. ಈ ಕಾನೂನು ಜಾರಿಯಾದಲ್ಲಿ ಜನ­ಸಾಮಾನ್ಯರ ಹಕ್ಕು ಕಿತ್ತುಕೊಂಡಂತಾಗುತ್ತದೆ. ಆದ್ದರಿಂದ, ಲೋಕಪಾಲ ಕಾನೂನು ಜಾರಿಗೆ ತರಬಾರದು’ ಎಂದು ಒತ್ತಾಯಿಸಿದರು.



ಮಾಜಿ ಶಾಸಕ ಎ.ಟಿ.ರಾಮಸ್ವಾಮಿ ಮಾತನಾಡಿ, ‘ರಾಜಕಾರಣವು ಇಂದು ಸೇವೆಯಾಗದೆ, ವ್ಯಾಪಾರ­ವಾಗಿದೆ. ಪ್ರಜಾಪ್ರಭುತ್ವ ಸತ್ತ ಶವವಾಗಿದೆ. ಶವದ ಮುಂದೆ ಮಾಡುವ ಪ್ರತಿಭಟನೆ, ಹೋರಾಟ, ಗಂಟೆಯ ಸ್ವರ ಪ್ರಯೋಜನಕ್ಕೆ ಬರುವುದಿಲ್ಲ’ ಎಂದು ವಿಷಾದಿಸಿದರು.



‘ಭ್ರಷ್ಟಾಚಾರ ನಿಯಂತ್ರಿಸಬೇಕಾದ ಸಾಂವಿಧಾನಿಕ ಸಂಸ್ಥೆ­ಗಳೇ ಇಂದು ಭ್ರಷ್ಟಾಚಾರದಲ್ಲಿ ತೊಡಗಿವೆ. ನ್ಯಾಯಾ­ಲಯಗಳ ಮೇಲೆ  ಜನರಿಗೆ ಕೊನೆಯ ವಿಶ್ವಾಸ­ವಿದೆ. ನ್ಯಾಯಾಲಯಗಳಾದರೂ ಜನರ ನಿರೀಕ್ಷೆ­ಗಳಿಗೆ ತಕ್ಕಂತೆ ನ್ಯಾಯವನ್ನು ಸಲ್ಲಿಸ­ಬೇಕಾ­ಗಿದೆ’ ಎಂದು ಹೇಳಿದರು.



‘ಅತಿ ಹೆಚ್ಚಿನ ರೀತಿಯಲ್ಲಿ ಯುವಕರು ಭ್ರಷ್ಟಾ­ಚಾರ ನಿರ್ಮೂಲನ ಹೋರಾಟದಲ್ಲಿ ಪಾಲ್ಗೊಳ್ಳ­ಬೇಕು. ಸ್ವಾತಂತ್ರ್ಯದ ಚಳವಳಿಯಂತೆ ಭ್ರಷ್ಟಾಚಾರ ನಿರ್ಮೂ­ಲನ ಚಳವಳಿ ನಡೆಯಬೇಕಾಗಿದೆ’ ಎಂದರು.



ಭ್ರಷ್ಟಾಚಾರ ನಿರ್ಮೂಲನ ವೇದಿಕೆ ಅಧ್ಯಕ್ಷ ಕೆ.ಪ್ರಭಾಕರ ರೆಡ್ಡಿ ಮಾತನಾಡಿ, ‘ಅಧಿಕಾರದ ಸೂತ್ರವನ್ನು ಹಿಡಿದವರಿಂದಲೇ ಇಂದು ಭ್ರಷ್ಟಾಚಾರ ನಡೆಯುತ್ತಿದೆ. ಎಲ್ಲ ಇಲಾಖೆಗಳಿಗೂ ಭ್ರಷ್ಟಾಚಾರ ವ್ಯಾಪಕವಾಗಿ ವ್ಯಾಪಿಸಿದೆ. ಇದರ ವಿರುದ್ಧ ಎಲ್ಲರೂ ಒಗ್ಗಟ್ಟಾಗಿ ಹೋರಾಟ ನಡೆಸಬೇಕಾಗಿದೆ ಎಂದು ಅವರು ಹೇಳಿದರು..