‘30ರ ವರೆಗೆ ಕಾಲುವೆಗೆ ನೀರು ಹರಿಸಿ’

ಸುರಪುರ: ನಾರಾಯಣಪುರ ಜಲಾಶ­ಯ­ದಿಂದ ಎಡ ಮತ್ತು ಬಲ ದಂಡೆ ಕಾಲುವೆಗಳಿಗೆ ಮಾ.10ರಂದು ನೀರು ಸ್ಥಗಿತಗೊಳಿಸುವ ಸರ್ಕಾದ ಕ್ರಮವನ್ನು ಖಂಡಿಸಿ ಕರ್ನಾಟಕ ರಾಜ್ಯ ರೈತ ಸಂಘ ಇಲ್ಲಿನ ಗಾಂಧಿ ವೃತ್ತದಲ್ಲಿ ಭಾನುವಾರ ಪ್ರತಿಭಟನೆ ನಡೆಸಿತು.



ಸಂಘದ ರಾಜ್ಯ ಘಟಕದ ಅಧ್ಯಕ್ಷ ಚಾಮ­ರಾಸ ಮಾಲಿ ಪಾಟೀಲ ಮಾತ­ನಾಡಿ, ನೀರಾವರಿ ಸಲಹಾ ಸಮಿತಿಯ ನಿರ್ಧಾರ ಅವೈಜ್ಞಾನಿಕ­ವಾದದ್ದು. 10ಕ್ಕೆ ನೀರು ಸ್ಥಗಿತಗೊಳಿಸಿ­ದರೆ ರೈತರು ಜಮೀನುಗಳಲ್ಲಿ ಬಿತ್ತಿದ ಹತ್ತಿ, ಶೇಂಗಾ, ಮೆಣಸಿನಕಾಯಿ ಇತರೆ ಬೆಳೆಗಳು ಹಾಳಾಗುತ್ತವೆ ಎಂದರು.



ಜಿಲ್ಲಾ ಘಟಕದ ಅಧ್ಯಕ್ಷ ಮಲ್ಲಿಕಾ­ರ್ಜುನ ಸತ್ಯಂಪೇಟೆ ಮಾತನಾಡಿ, 30ರ ವರೆಗೆ ಕಾಲುವೆಗೆ ನೀರು ಹರಿಸುವ ನಿರ್ಧಾರವನ್ನು ಮಾ. 8 ರೊಳಗಾಗಿ ಪ್ರಕಟಿಸಬೇಕು. ವಿಳಂಬವಾದಲ್ಲಿ ರಾಜ್ಯ­ದಾದ್ಯಂತ ಹೋರಾಟ ಹಮ್ಮಿಕೊಳ್ಳ­ಲಾಗು­ತ್ತದೆ ಎಂದು ಎಚ್ಚರಿಸಿದರು.



ಬಳ್ಳಾರಿ ಜಿಲ್ಲಾ ಘಟಕದ ಅಧ್ಯಕ್ಷ ಪ್ರತಾಪರೆಡ್ಡಿ ಪಾಟೀಲ, ಅಯ್ಯಣ್ಣ ಹಾಲಬಾವಿ, ಲಕ್ಷ್ಮಣ ನಾಯಕ, ಸಂಗಣ್ಣ ಅಂಗಡಿ, ಚನ್ನಪ್ಪ ಗೊಬ್ಬೂರು, ಬಸವರಾಜ ಮಂಗಿಹಾಳ, ಪರಮಣ್ಣ ಮಂಗಿಹಾಳ, ತಿಪ್ಪಣ್ಣ ಚಾಗಲಿ, ಮಲ್ಲನ­ಗೌಡ ಕಚಕನೂರು, ಯಂಕಾರೆಡ್ಡಿ, ಅಯ್ಯಣ್ಣ ಅರಳಹಳ್ಳಿ, ಮಲ್ಲಣ್ಣ ದಿವಾನ್, ರಾಘವೇಂದ್ರ ದಿವಾನ್, ಮಹಾಲಿಂಗಪ್ಪ ತಳಗೇರಿ, ಪ್ರತಾಪ­ಗೌಡ, ಸಿದ್ದನಗೌಡ ಹೆಬ್ಬಾಳ ಇದ್ದರು.