ಬೆಂಗಳೂರು: ಜರ್ಮನಿ ಮೂಲದ, ಹಣಕಾಸು ವಹಿವಾಟುಗಳಿಗೆ ಅಗತ್ಯವಾದ ಸಾಫ್ಟ್‌ವೇರ್‌ಗಳನ್ನು ಅಭಿವೃದ್ಧಿಪಡಿಸುವ ಬುಹ್ಲ್‌ ಸಮೂಹವು ಭಾರತದಲ್ಲಿ ಒಟ್ಟು ₹ 43 ಕೋಟಿ ಹೂಡಿಕೆ ಮಾಡಲಿದೆ.
ಅಲ್ಲದೆ, ಬೆಂಗಳೂರಿನ ಮಾರುಕಟ್ಟೆಗಾಗಿ ‘ಇಂಪ್ರೆಸ್’ ಹೆಸರಿನ ಮೊಬೈಲ್‌ ಅಪ್ಲಿಕೇಷನ್ ಅಭಿವೃದ್ಧಿಪಡಿಸಿದ್ದು, ಸಣ್ಣ ವ್ಯಾಪಾರಿಗಳು ತಮ್ಮ ಗ್ರಾಹಕರಿಗೆ ಡಿಜಿಟಲ್ ರೂಪದಲ್ಲಿ ಬಿಲ್‌ ಸಿದ್ಧಪಡಿಸಿಕೊಡಲು ಇದು ನೆರವಾಗಲಿದೆ ಎಂದು ಕಂಪನಿ ಹೇಳಿದೆ.
ಸಣ್ಣ ಕಿರಾಣಿ ಅಂಗಡಿಗಳ ಮಾಲೀಕರಿಗೆ ಈ ಅಪ್ಲಿಕೇಷನ್ ಬಳಸಿ ದಾಸ್ತಾನು ನಿರ್ವಹಣೆ, ತಮ್ಮ ಗ್ರಾಹಕರ ಪ್ರೊಫೈಲ್ ನಿರ್ವಹಣೆ ಕೆಲಸಗಳನ್ನು ಕೂಡ ಮಾಡಲು ಇದು ನೆರವಾಗಲಿದೆ. ಈ ಅಪ್ಲಿಕೇಷನ್ ಬಳಸಲು ಹೆಚ್ಚುವರಿಯಾಗಿ ಯಾವುದೇ ಹಾರ್ಡ್‌ವೇರ್‌ ಖರೀದಿಯ ಅಗತ್ಯ ಇಲ್ಲ ಎಂದು ಕಂಪನಿ ಹೇಳಿದೆ.
