ಬೆಂಗಳೂರು: ದಟ್ಟಣೆ ಹೊಂದಿರುವ ನಗರಗಳಲ್ಲಿ ಸುಲಭವಾಗಿ ಸಂಚರಿಸಿ ಸಾಮಗ್ರಿಗಳನ್ನು ರವಾನಿಸಲು ಅನುಕೂಲವಾಗುವಂತೆ ರೂಪಿಸಿರುವ ‘ಬೊಲೆರೊ ಸಿಟಿ ಪಿಕ್‌ ಅಪ್‌’ ಈಗ ಮಾರುಕಟ್ಟೆ ಪ್ರವೇಶಿಸಿದೆ.
ಮಹೀಂದ್ರಾ ಕಂಪನಿಯ ಈ ವಾಹನ 1.4 ಟನ್‌ ತೂಕದ ಸಾಮಗ್ರಿಗಳನ್ನು ಕೊಂಡೊಯ್ಯುವ ಸಾಮರ್ಥ್ಯವನ್ನು ಹೊಂದಿರುವುದು ವಿಶೇಷವಾಗಿದೆ. ಮಾರುಕಟ್ಟೆಯಂತಹ ಪ್ರದೇಶಗಳಲ್ಲಿ ಸುಲಭವಾಗಿ ಸಂಚರಿಸುವ ರೀತಿಯಲ್ಲಿ ವಿನ್ಯಾಸಗೊಳಿಸಲಾಗಿದೆ.
ಮಹೀಂದ್ರಾ ಮತ್ತು ಮಹೀಂದ್ರಾ ಲಿಮಿಟೆಡ್‌ನ ಅಟೊಮೊಟಿವ್‌ ವಿಭಾಗದ ಮಾರುಕಟ್ಟೆ ಉಪಾಧ್ಯಕ್ಷ ವಿಕ್ರಂ ಗಾರ್ಗ್‌ ಗುರುವಾರ ಇಲ್ಲಿ ಈ ವಾಹನ ಬಿಡುಗಡೆ ಮಾಡಿದರು.
ಈ ವಾಹನವನ್ನು ಸಣ್ಣ ಮತ್ತು ಮಧ್ಯಮ ಗಾತ್ರದ ವ್ಯಾಪಾರಿಗಳ ಸಾರಿಗೆ ಅಗತ್ಯತೆಯನ್ನು ಗಮನದಲ್ಲಿಟ್ಟುಕೊಂಡು ರೂಪಿಸಲಾಗಿದೆ.ಜತೆಗೆ, ಬೆಂಗಳೂರು, ಮುಂಬೈ, ಚೆನ್ನೈನಂತಹ ಮಹಾನಗರಗಳ ಸಂಚಾರ ದಟ್ಟಣೆಯನ್ನು ಗಮನದಲ್ಲಿಟ್ಟುಕೊಂಡು ಈ ವಾಹನದ ವಿನ್ಯಾಸ ರೂಪಿಸಲಾಗಿದೆ ಎಂದು ಗಾರ್ಗ್‌ ತಿಳಿಸಿದರು.
ವಿಶೇಷಗಳು:ಮೂರು ವರ್ಷಗಳವರೆಗೆ ಅಥವಾ ಒಂದು ಲಕ್ಷ ಕಿಲೋ ಮೀಟರ್‌ವರೆಗೆ ವಾರಂಟಿಯನ್ನು ಈ ವಾಹನಕ್ಕೆ ನೀಡಲಾಗಿದೆ. 2523 ಸಿಸಿ ಎಂ2ಡಿಐ ಎಂಜಿನ್‌, ನಾಲ್ಕು ಸಿಲಿಂಡರ್‌ ಮತ್ತು 63 ಅಶ್ವಶಕ್ತಿ ಹಾಗೂಡಿಸೇಲ್‌ ಎಂಜಿನ್‌ ಹೊಂದಿದೆ. 8.7 ಅಡಿ ಎತ್ತರ ಹಾಗೂ 5.6 ಉದ್ದದ ಕಾರ್ಗೊ ಬಾಕ್ಸ್‌ ಹೊಂದಿರುವುದರಿಂದ ಹೆಚ್ಚಿನ ತೂಕದ ಸಾಮಗ್ರಿಗಳನ್ನು ಕೊಂಡೊಯ್ಯಬಹುದಾಗಿದೆ.ಈ ವಾಹನ ಬೆಲೆ ₹6.25 ಲಕ್ಷ (ಬೆಂಗಳೂರು ಎಕ್ಸ್‌ ಶೋರೂಂ).
