ಬುಧವಾರ, ಜೂನ್ 3, 2020
27 °C

ರಿಲಯನ್ಸ್‌ ಷೇರು ಖರೀದಿ ಭರಾಟೆ: ಚೇತರಿಕೆ ನೀಡಿದ ಸೆನ್ಸೆಕ್ಸ್‌ ಓಟ

ಏಜೆನ್ಸೀಸ್ Updated:

ಅಕ್ಷರ ಗಾತ್ರ : | |

ಷೇರುಪೇಟೆ ವಹಿವಾಟು– ಸಾಂಕೇತಿಕ ಚಿತ್ರ

ಮುಂಬೈ: ಮುಂಬೈ ಷೇರುಪೇಟೆ ಸಂವೇದಿ ಸೂಚ್ಯಂಕ ಸೆನ್ಸೆಕ್ಸ್‌ ಶುಕ್ರವಾರ 199 ಅಂಶ ಏರಿಕೆಯೊಂದಿಗೆ ದಿನದ ವಹಿವಾಟು ಮುಗಿಸಿದೆ. ರಿಲಯನ್ಸ್‌ ಇಂಡಸ್ಟ್ರೀಸ್‌ ಷೇರುಗಳ ಖರೀದಿಗೆ ಹೂಡಿಕೆದಾರರು ಆಸಕ್ತಿ ತೋರಿದ್ದು, ಸಕಾರಾತ್ಮ ವಹಿವಾಟಿಗೆ ಕಾರಣವಾಯಿತು. 

ದಿನದ ವಹಿವಾಟಿನಲ್ಲಿ 645.13 ಅಂಶಗಳ ವರೆಗೂ ಹೆಚ್ಚಳ ಕಂಡಿದ್ದ ಸೆನ್ಸೆಕ್ಸ್‌, ಅಂತಿಮವಾಗಿ ಶೇ 0.63ರಷ್ಟು ಏರಿಕೆಯೊಂದಿಗೆ 31,642.70 ಅಂಶ ತಲುಪಿತು. ರಾಷ್ಟ್ರೀಯ ಷೇರುಪೇಟೆ ಸಂವೇದಿ ಸೂಚ್ಯಂಕ ನಿಫ್ಟಿ 52.45 ಅಂಶ ಚೇತರಿಕೆಯೊಂದಿಗೆ 9,251.50 ಅಂಶಗಳಲ್ಲಿ ವಹಿವಾಟು ಮುಗಿಸಿತು. 

ಸೆನ್ಸೆಕ್ಸ್‌ ಷೇರುಗಳ ಪೈಕಿ ಹಿಂದುಸ್ತಾನ್‌ ಯೂನಿಲಿವರ್‌ ಶೇ 4ರಷ್ಟು ಗಳಿಕೆ ದಾಖಲಿಸಿತು. ನೆಸ್ಟ್ಲೆ ಇಂಡಿಯಾ, ಟೆಕ್‌ ಮಹೀಂದ್ರಾ ಹಾಗೂ ಸನ್‌ ಫಾರ್ಮಾ ಷೇರುಗಳು ಸಹ ಏರಿಕೆ ಕಂಡವು. 

ಅಮೆರಿಕ ಮೂಲದ ವಿಸ್ಟಾ ಈಕ್ವಿಟಿ ಪಾರ್ಟ್‌ನರ್ಸ್‌ ಜಿಯೊದಲ್ಲಿ ₹11,367 ಕೋಟಿ ಹೂಡುವ ಮೂಲಕ ಶೇ 2.32ರಷ್ಟು ಪಾಲುದಾರಿಕೆ ಹೊಂದಲಿರುವ ವಿಷಯ ಪ್ರಕಟಗೊಳ್ಳುತ್ತಿದ್ದಂತೆ ರಿಲಯನ್ಸ್‌ ಇಂಡಸ್ಟ್ರೀಸ್‌ ಷೇರು ಶೇ 3ರಷ್ಟು ಜಿಗಿಯಿತು. 

ಎನ್‌ಟಿಪಿಸಿ, ಮಹೀಂದ್ರಾ ಆ್ಯಂಡ್‌ ಮಹೀಂದ್ರಾ, ಆ್ಯಕ್ಸಿಸ್‌ ಬ್ಯಾಂಕ್‌ ಹಾಗೂ ಇಂಡಸ್‌ಇಂಡ್‌ ಬ್ಯಾಂಕ್‌ ಷೇರುಗಳು ನಷ್ಟ ಅನುಭವಿಸಿದವು. 

ಜಗತ್ತಿನಾದ್ಯಂತ ಹಲವು ಭಾಗಗಳಲ್ಲಿ ಲಾಕ್‌ಡೌನ್‌ ಸಡಿಲಿಕೆ ಮಾಡಲಾಗುತ್ತಿದ್ದು, ಶಾಂಘೈ, ಹಾಂಕಾಂಗ್‌, ಟೋಕಿಯೊ ಹಾಗೂ ಸೋಲ್‌ ಷೇರುಪೇಟೆಗಳು ಗಳಿಕೆಯೊಂದಿಗೆ ವಹಿವಾಟು ಮುಗಿಸಿವೆ. ಗುರುವಾರ ವಿದೇಶಿ ಸಾಂಸ್ಥಿತಕ ಹೂಡಿಕೆದಾರರು ₹19,056.49 ಕೋಟಿ ಮೌಲ್ಯದ ಷೇರುಗಳನ್ನು ಖರೀದಿಸಿದ್ದಾರೆ. 

ಡಾಲರ್‌ ಎದುರು ರೂಪಾಯಿ ಮೌಲ್ಯ 18 ಪೈಸೆ ಚೇತರಿಕೆ ಕಂಡು ₹75.54 ತಲುಪಿದೆ. ಅಂತರರಾಷ್ಟ್ರೀಯ ಕಚ್ಚಾ ತೈಲ ಮಾನದಂಡ ಬ್ರೆಂಟ್‌ ಫ್ಯೂಚರ್ಸ್‌ ದರ ಶೇ 1.73ರಷ್ಟು ಏರಿಕೆಯಾಗಿ ಪ್ರತಿ ಬ್ಯಾರೆಲ್‌ಗೆ 29.97 ತಲುಪಿದೆ. 

ಜಗತ್ತಿನಾದ್ಯಂತ ಕೊರೊನಾ ವೈರಸ್‌ ಸೋಂಕು ಪ್ರಕರಣಗಳು 38.46 ಲಕ್ಷ ದಾಟಿದೆ ಹಾಗೂ ಸೋಂಕಿನಿಂದ 2.69 ಲಕ್ಷ ಮಂದಿ ಸಾವಿಗೀಡಾಗಿದ್ದಾರೆ. ಭಾರತದಲ್ಲಿ ಕೋವಿಡ್‌–19 ಪ್ರಕರಣಗಳು 56,000 ದಾಟಿದೆ. 
 

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು