ದಿನದ ಸೂಕ್ತಿ | ಸತ್ಸಹವಾಸದ ಫಲ

ಜಾಡ್ಯಂ ಧಿಯೋ ಹರತಿ ಸಿಂಚತಿ ವಾಚಿ ಸತ್ಯಂ ಮಾನೋನ್ನತಿಂ ದಿಶತಿ ಪಾಪಮಪಾಕರೋತಿ । ಚೇತಃ ಪ್ರಸಾದಯತಿ ದಿಕ್ಷು ತನೋತಿ ಕೀರ್ತಿಂ ಸತ್ಸಂಗತಿಃ ಕಥಯ ಕಿಂ ನ ಕರೋತಿ ಪುಂಸಾಮ್ ।।

. ಇದರ ತಾತ್ಪರ್ಯ ಹೀಗೆ:

. ‘ಸತ್ಪುರುಷರ ಸಹವಾಸವು ಬುದ್ಧಿಯ ಜಡತ್ವವನ್ನು ಹೋಗಲಾಡಿಸುತ್ತದೆ; ಮಾತಿನಲ್ಲಿ ಸತ್ಯವನ್ನು ಚಿಮುಕಿಸುತ್ತದೆ; ಗೌರವವನ್ನು ಹೆಚ್ಚಿಸುತ್ತದೆ; ಪಾಪವನ್ನು ದೂರಮಾಡುತ್ತದೆ; ಮನಸ್ಸನ್ನು ಪ್ರಸನ್ನಗೊಳಿಸುತ್ತದೆ; ಎಲ್ಲ ದಿಕ್ಕುಗಳಲ್ಲಿಯೂ ಕೀರ್ತಿಯನ್ನು ಹರಡುತ್ತದೆ. ಒಳ್ಳೆಯ ಸಹವಾವು ಜನರಿಗೆ ಏನು ತಾನೆ ಮಾಡುವುದಿಲ್ಲ?’

. ನಮ್ಮ ಹಿರಿಯರು ನಮಗೆ ಚಿಕ್ಕವಯಸ್ಸಿನಿಂದಲೇ ಒಂದು ಎಚ್ಚರಿಕೆಯನ್ನು ಕೊಡುತ್ತಿರುತ್ತಾರೆ: ಒಳ್ಳೆಯವರ ಸಹವಾಸ ಮಾಡಿ.

. ಈ ದೊಡ್ಡವರು ಯಾವಾಗಲೂ ನಮಗೆ ಉಪದೇಶ ಕೊಡ್ತಾನೆ ಇರ್ತಾರೆ; ಯಾಕಾದರೂ ಹೀಗೆ ಹೇಳ್ತಾರೋ – ಎಂದೂ ನಮಗೆ ಅನಿಸಿರುತ್ತದೆ. ಒಳ್ಳೆಯವರ ಸ್ನೇಹದಿಂದ ಏನೆಲ್ಲ ಲಾಭಗಳಾಗುತ್ತವೆ – ಎಂಬುದನ್ನೇ ಸುಭಾಷಿತ ಇಲ್ಲಿ ಹೇಳುತ್ತಿರುವುದು.

. ನಮ್ಮ ಎಲ್ಲ ದೋಷಗಳಿಗೂ ದೊಡ್ಡ ಕಾರಣ ಎಂದರೆ ನಮ್ಮ ಬುದ್ಧಿಯ ನಿಷ್ಕ್ರಿಯತೆ; ಎಂದರೆ ಜಡತೆ. ಕಲ್ಲಿನಂತೆ ಯಾವಾಗಲೂ ಮಲಗಿರುವ, ನಿಂತ ನೀರಿನಂತೆ ಕಲುಷಿತವಾಗಿರುವ ಬುದ್ಧಿಯೇ ನಿಷ್ಕ್ರಿಯಬುದ್ಧಿ. ಸತ್ಸಹವಾಸದಿಂದ ಬುದ್ಧಿಯ ಇಂಥ ಜಡತೆ ತೊಲಗುತ್ತದೆ. ಇದು ನಮಗೆ ಒಳ್ಳೆಯವರಿಂದ ಆಗವ ಪ್ರಥಮ ಮತ್ತು ಪ್ರಧಾನ ಪ್ರಯೋಜನ.

. ನಮ್ಮ ಬುದ್ಧಿಯನ್ನು ಚುರುಕುಗೊಳಿಸಿದಮೇಲೆ ಸಜ್ಜನರ ಸ್ನೇಹವು ನಮಗೊಂದು ವ್ಯಕ್ತಿತ್ವವನ್ನೂ ಕಟ್ಟಿಕೊಡುತ್ತದೆ. ಮಾತಿನಲ್ಲಿ ಸತ್ಯವನ್ನು ಚಿಮುಕಿಸುತ್ತದೆ – ಎಂದರೆ ಇದೇ ಅರ್ಥ; ನಮಗೊಂದು ಗಟ್ಟಿಯಾದ ವ್ಯಕ್ತಿತ್ವ ಒದಗುತ್ತದೆ. ಮಾತಿನ ಪ್ರಾಮಾಣಿಕತೆಯ ಮೂಲಕ ಸುಭಾಷಿತ ನಮ್ಮ ವ್ಯಕ್ತಿತ್ವದ ಸೌರಭವನ್ನು ಸೂಚಿಸಿದೆ.

. ಈಗ ನಮ್ಮ ವ್ಯಕ್ತಿತ್ವವನ್ನು ಸಮಾಜ ಗುರುತಿಸುತ್ತದೆ, ನಮ್ಮ ನಡೆ–ನುಡಿಗಳಿಗೆ ಸಮಾಜದಿಂದ ಬೆಲೆ ಬಂದಿರುತ್ತದೆ; ಎಂದರೆ ನಮ್ಮನ್ನು ಈಗ ಸಮಾಜ ಗೌರವದಿಂದ ನೋಡುತ್ತಿರುತ್ತದೆ. ಸತ್ಸಹವಾಸದಿಂದ ಪಾಪವೂ ದೂರವಾಗುತ್ತದೆಯಂತೆ. ಸಜ್ಜನರು ನಾವು ಕೆಟ್ಟ ದಾರಿಯನ್ನು ಹಿಡಿಯದಂತೆ ನಮ್ಮನ್ನು ಕಾಪಾಡುತ್ತಿರುತ್ತಾರೆ.

. ಸಜ್ಜನರು ಪ್ರಸನ್ನತೆ, ಸಂತೋಷ, ಉತ್ಸಾಹಗಳ ಮೂಲವೇ ಆಗಿರುವುದರಿಂದ ಅವರ ಸಾಮೀಪ್ಯದಿಂದ ನಮ್ಮಲ್ಲೂ ಪ್ರಸನ್ನತೆ ಎನ್ನುವುದು ಸಹಜಸ್ವಭಾವವಾಗಿಯೇ ನೆಲೆ ನಿಲ್ಲುತ್ತದೆ.

. ಇಷ್ಟೆಲ್ಲ ಗುಣಗಳು ನಮ್ಮ ವ್ಯಕ್ತಿತ್ವಕ್ಕೆ ಒದಗಿದೆ ಎಂದರೆ ಅದು ಈಗ ಸದೃಢವೂ ಸುಂದರವೂ ಆಗಿದೆ ಎಂದೇ ಅರ್ಥ ಅಲ್ಲವೆ? ಇಂಥ ವ್ಯಕ್ತಿತ್ವ ನಮ್ಮದಾಗಿದ್ದಾಗ ಸಮಾಜವೂ ನಮ್ಮ ಬಗ್ಗೆ ಒಳ್ಳೆಯ ಮಾತುಗಳನ್ನೇ ಆಡುತ್ತದೆ. ಎಂದರೆ ಸಮಾಜದಲ್ಲಿ ನಮಗೆ ಕೀರ್ತಿ ಲಭಿಸುತ್ತಿದೆ ಎಂದೇ ತಾತ್ಪರ್ಯ.

. ನಾವು ಎಂಥವರ ಸ್ನೇಹವನ್ನು ಮಾಡಬೇಕು ಎಂಬ ಸಂಕಲ್ಪ ಮತ್ತು ತೀರ್ಮಾನ – ಈ ಎರಡನ್ನೂ ನಿರ್ಧಾರಮಾಡಬೇಕಾದವರು ನಾವೇ!

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ದಿನದ ಸೂಕ್ತಿ | ಸತ್ಸಹವಾಸದ ಫಲ

ಚಿನಕುರುಳಿ: 02 ಜುಲೈ 2025, ಬುಧವಾರ

ಮಂಡ್ಯ: ಡೆತ್‌ನೋಟ್‌ ಬರೆದಿಟ್ಟು ತಾಯಿ-ಮಗಳು ನೇಣಿಗೆ ಶರಣು

ಧರ್ಮಪುರ: ಜಂಬೂ ನೇರಳೆಯಿಂದ ಕಾಲು ಕೋಟಿ ಆದಾಯ

ಚುರುಮುರಿ | ಗ್ರಾಮಾಭಿವೃದ್ಧಿ...

ವಿಂಡೀಸ್ ಕ್ರಿಕೆಟಿಗನ ವಿರುದ್ಧ ಲೈಂಗಿಕ ದೌರ್ಜನ್ಯ ಆರೋಪ: ಕೋಚ್ ಸಾಮಿ ಹೇಳಿದ್ದೇನು?

ಎಫ್‌ಸಿ ಬೆಂಗಳೂರು ಯುನೈಟೆಡ್‌ ತಂಡದ ಮುಖ್ಯ ಕೋಚ್ ಆಗಿ ಮೋಹನ್‌ರಾಜ್ ಮರುನೇಮಕ

ಕೆನಡಾ ಓಪನ್‌: ಎರಡನೇ ಸುತ್ತಿಗೆ ಶ್ರೀಕಾಂತ್‌

ದೂರವಾದ ಪತ್ನಿ, ಮಗಳಿಗೆ ₹4 ಲಕ್ಷ ಪರಿಹಾರ ನೀಡಲು ಶಮಿಗೆ ಕೋಲ್ಕತ್ತ ಹೈಕೋರ್ಟ್ ಆದೇಶ

ಒಳನೋಟ: ಸೋರುವ ಕೊಠಡಿಯಲ್ಲೇ ಕಲಿಕೆ!

ಒಳನೋಟ: ಹದಗೆಟ್ಟ ಹಾಸ್ಟೆಲ್‌ ‘ಆರೋಗ್ಯ’.. ಸರಿಯಾಗದ SC, ST, OBC ವಸತಿಶಾಲೆಗಳು

ಒಳನೋಟ | ರಾಜ್ಯದಲ್ಲಿ ವಿದೇಶಿ ಹಣ್ಣುಗಳ ದಿಬ್ಬಣ

ಒಳನೋಟ | ಕಾಲ್ತುಳಿತ ಪ್ರಕರಣ: ಸಾವಿನ ಮನೆ ಬಾಗಿಲು ತೆರೆದವರಾರು?

ಚಿನಕುರುಳಿ: 02 ಜುಲೈ 2025, ಬುಧವಾರ

ಮಂಡ್ಯ: ಡೆತ್‌ನೋಟ್‌ ಬರೆದಿಟ್ಟು ತಾಯಿ-ಮಗಳು ನೇಣಿಗೆ ಶರಣು

ಧರ್ಮಪುರ: ಜಂಬೂ ನೇರಳೆಯಿಂದ ಕಾಲು ಕೋಟಿ ಆದಾಯ

ಚುರುಮುರಿ | ಗ್ರಾಮಾಭಿವೃದ್ಧಿ...