ದಿನದ ಸೂಕ್ತಿ: ವಿನಯದ ಸೊಗಸು

ನಭೋಭೂಷಾ ಪೂಷಾ ಕಮಲವನಭೂಷಾ ಮಧುಕರೋ

. ವಚೋಭೂಷಾ ಸತ್ಯಂ ವರವಿಭವಭೂಷಾ ವಿತರಣಮ್ ।

. ಮನೋಭೂಷಾ ಮೈತ್ರೀ ಮಧುಸಮಯಭೂಷಾ ಮನಸಿಜಃ

. ಸದೋಭೂಷಾ ಸೂಕ್ತಿಃ ಸಕಲಗುಣಭೂಷಾ ಚ ವಿನಯಃ ।।

. ಇದರ ತಾತ್ಪರ್ಯ ಹೀಗೆ:

. ‘ಆಕಾಶಕ್ಕೆ ಸೂರ್ಯನೂ, ಕಮಲವನಕ್ಕೆ ದುಂಬಿಯೂ, ಮಾತಿಗೆ ಸತ್ಯವೂ, ಹೆಚ್ಚಾಗಿರುವ ಸಂಪತ್ತಿಗೆ ದಾನವೂ, ಮನಸ್ಸಿಗೆ ಸ್ನೇಹವೂ, ವಸಂತಕಾಲಕ್ಕೆ ಪ್ರೇಮವೂ, ಸಭೆಗೆ ಸೂಕ್ತಿಯೂ, ಎಲ್ಲ ಗುಣಗಳಿಗೂ ವಿನಯವೂ ಭೂಷಣಗಳು.‘

. ಪ್ರತಿಯೊಂದು ವಸ್ತುವಿಗೂ ಅದರ ಸೊಗಸನ್ನು ಹೆಚ್ಚಿಸಬಲ್ಲ ಅದರದ್ದೇ ಆದ ಅಂಗವೊಂದು ಇದ್ದೇ ಇರುತ್ತದೆ; ಸೊಗಸಿನ ಜೊತೆಗೆ ಅದು ಅದರ ಬೆಲೆಯನ್ನೂ ಹೆಚ್ಚಿಸುತ್ತದೆ. ಆ ವಸ್ತುವಿನ ಪ್ರಯೋಜನಕ್ಕೂ ಸಾರ್ಥಕತೆಗೂ ಅದು ಕಾರಣವಾಗಿರುತ್ತದೆ. ಸುಭಾಷಿತ ಇದನ್ನೇ ಇಲ್ಲಿ ಹೇಳುತ್ತಿರುವುದು.

. ಇಡಿಯ ಆಕಾಶಕ್ಕೆ ಭೂಷಣ ಎಂದರೆ ಸೂರ್ಯ. ಹೌದು, ಸೂರ್ಯನಿಲ್ಲದ ಆಕಾಶವನ್ನು ಊಹಿಸಿಕೊಳ್ಳಲೂ ಆಗದು. ಕಮಲವನಕ್ಕೆ ದುಂಬಿಯೇ ಭೂಷಣ; ದುಂಬಿಗಳು ಅಲ್ಲಿವೆ ಎಂದರೆ ಹೂವಿನಲ್ಲಿ ಮಕರಂದವೂ ಇದೆ ಎಂಬುದು ಗೊತ್ತಾಗುತ್ತದೆ; ಜೊತೆಗೆ ಕಮಲಗಳ ದೃಶ್ಯವೈಭವಕ್ಕೆ ದುಂಬಿಗಳ ಝೇಂಕಾರ ಸಂಗೀತವಾಗಿ ಒದಗಿ, ಅಲ್ಲಿಯ ಪರಿಸರವನ್ನು ಇನ್ನಷ್ಟು ಸುಂದರಗೊಳಿಸುತ್ತದೆ.

. ಸಾವಿರ ಮಾತುಗಳನ್ನು ಆಡಬಹುದು; ಆದರೆ ಆ ಎಲ್ಲ ಮಾತುಗಳಿಗೂ ಒಂದು ವ್ಯಕ್ತಿತ್ವ ಬರುವುದೇ ಅವು ಸತ್ಯವನ್ನು ಹೇಳಲು ಹೊರಟಾಗ. ಹೀಗಾಗಿ ಮಾತಿಗೆ ಭೂಷಣವೇ ಸತ್ಯ.

. ನಮ್ಮ ಸಂಪತ್ತಿಗೆ ಅಲಂಕಾರ ಯಾವುದು? ದಾನವೇ ಸಂಪತ್ತಿಗೆ ಭೂಷಣ. ನಾವು ಕೂಡಿಟ್ಟ ಸಂಪತ್ತು ನಾಲ್ಕು ಜನರಿಗೆ ಉಪಯೋಗವಾಗಬೇಕು; ಆದರೆ ಅದಕ್ಕೆ ಸಾರ್ಥಕತೆ.

. ಸ್ನೇಹವೇ ಮನಸ್ಸಿಗೆ ಭೂಷಣ ಎಂದಿದೆ ಸುಭಾಷಿತ. ಮನಸ್ಸಿನ ವೈಶಾಲ್ಯಕ್ಕೂ ಇದು ಸಂಕೇತ; ಸೊಗಸಿಗೂ ಸಂಕೇತ; ಆರೋಗ್ಯಕ್ಕೂ ಸಂಕೇತ.

. ಪ್ರಕೃತಿಯಲ್ಲಿ ಕಾಣುವ ಸುಂದರ ಋತು ಎಂದರೆ ವಸಂತಋತು. ಈ ಸಮಯದಲ್ಲಿ ಪ್ರಕೃತಿಯು ಹಸಿರಿನಿಂದ ಕಂಗೊಳಿಸುತ್ತಿರುತ್ತದೆ. ಇದರ ಸಾರ್ಥಕತೆ ಪ್ರೇಮಭಾವದಲ್ಲಿಯೇ ಇದೆ.ಪ್ರೀತಿ–ಪ್ರೇಮ–ಶೃಂಗಾರಗಳಿಗೆ ಇದು ಒಪ್ಪುವಂಥ ಸಮಯವೂ ಹೌದು. ಹೀಗಾಗಿ ವಸಂತಸಮಯದಲ್ಲಿ ಮನ್ಮಥನೇ ಭೂಷಣ.

. ಸಭೆ ಎಂದರೆ ಭಾಷಣ ಆಗಬಹುದು; ನಾಲ್ಕಾರು ಜನರ ಮಧ್ಯೆ ನಿಂತು ಆಡುವ ಮಾತುಗಳು. ಈ ಮಾತುಗಳಿಗೆ ಕಳೆ ಬರುವುದೇ ಸೂಕ್ತಿಗಳ ಮೂಲಕ. ಸೂಕ್ತಿ ಎಂದರೇನೆ ಒಳ್ಳೆಯ ಮಾತು ಎಂಬ ಅರ್ಥವಿದೆ. ಮಹಾಪುರುಷರ ವಿಚಾರಪ್ರದ ಮಾತುಗಳೂ ಸೂಕ್ತಿಗಳೇ ಹೌದು. ಸುಂದರವೂ ಅರ್ಥಪೂರ್ಣವೂ ಆದ ಸೂಕ್ತಿಗಳನ್ನು ಉದ್ಧರಿಸಿ ಮಾತನಾಡಿದರೆ ಇಡಿಯ ಪರಿಸರಕ್ಕೇ ಜೀವಕಳೆ ಬರುತ್ತದೆ; ಕೇಳುಗರಲ್ಲೂ ಆಕರ್ಷಣೆ–ಉತ್ಸಾಹಗಳು ಹೆಚ್ಚುತ್ತವೆ.

. ನಮ್ಮಲ್ಲಿ ನೂರು ಒಳ್ಳೆಯ ಗುಣಗಳು ಇರಬಹುದು; ನಮ್ಮದು ಸಾವಿರ ಸಾಧನೆಗಳೂ ಇರಬಹುದು. ಆದರೆ ಅವುಗಳಿಗೆ ಬೆಲೆ ಬರುವುದು ನಮ್ಮಲ್ಲಿ ವಿನಯ ಇದ್ದಾಗ ಮಾತ್ರ. ಇತ್ತೀಚೆಗಷ್ಟೇ ನಮ್ಮನ್ನು ಅಗಲಿದ ಖ್ಯಾತ ಹಿನ್ನೆಲೆಗಾಯಕ ಎಸ್. ಪಿ. ಬಾಲಸುಬ್ರಹ್ಮಣ್ಯಂ ಅವರ ವಿನಯಗುಣವನ್ನು ಎಲ್ಲರೂ ಹಾಡಿಹೊಗಳುತ್ತಿದ್ದಾರೆ. ಅಷ್ಟೆಲ್ಲ ಸಾಧನೆಮಾಡಿದ್ದರೂ ಅವರಲ್ಲಿ ಅಹಂಕಾರ ಇರಲಿಲ್ಲ; ವಿನಯದ ಮೂರ್ತರೂಪವೇ ಆಗಿದ್ದ ಅವರನ್ನು ಜನರು ನೂರ್ಕಾಲ ಸ್ಮರಿಸಿಕೊಳ್ಳುತ್ತಲೇ ಇರುತ್ತಾರೆ.

. ನಮ್ಮ ಕಾಲದ ದೊಡ್ಡ ದುರಂತ ಎಂದರೆ ನಮಗೆ ವಿನಯದ ಬೆಲೆ ಗೊತ್ತಿಲ್ಲ; ವಿನಯದ ಸೊಗಸೂ ಗೊತ್ತಿಲ್ಲ. ವಿನಯವೇ ನಮ್ಮ ಎಲ್ಲ ಸಾಧನೆಗಳನ್ನೂ ಕಾಪಾಡುವ ಮಹಾಶಕ್ತಿ ಎಂಬುದನ್ನು ನಾವು ಇನ್ನಾದರೂ ತಿಳಿದುಕೊಳ್ಳಬೇಕಿದೆ.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ದಿನದ ಸೂಕ್ತಿ: ವಿನಯದ ಸೊಗಸು

ಚಿನಕುರುಳಿ: ಬುಧವಾರ, 17 ಸೆಪ್ಟೆಂಬರ್ 2025

ಧರ್ಮಸ್ಥಳ ಪ್ರಕರಣ: ಮತ್ತಷ್ಟು ಮೃತದೇಹಗಳ ಅವಶೇಷ ಪತ್ತೆ; SIT ಮರುಶೋಧ

ಅಂತರ್ಜಾತಿ ವಿವಾಹ ಆಗುವವರಿಗೆ ಸರ್ಕಾರದಿಂದ ಏನೆಲ್ಲಾ ಸೌಲಭ್ಯ: ಇಲ್ಲಿದೆ ಮಾಹಿತಿ

ಚುರುಮುರಿ: ಪ್ರಜಾ ಫಜೀತಿ

Asia Cup: ಯುಎಇ ಎದುರು ಗೆದ್ದು 'ಸೂಪರ್‌ ಫೋರ್‌' ಹಂತಕ್ಕೇರಿದ ಪಾಕಿಸ್ತಾನ

ವಾಲಿಬಾಲ್‌: ಎಎಲ್‌ವಿ ತಂಡಕ್ಕೆ ಜಯ

ಆಸ್ಟ್ರೇಲಿಯಾ ಎದುರು ಏಕದಿನ ಸರಣಿ: ಸ್ಮತಿ ಮಂದಾನ ಬಿರುಸಿನ ಶತಕ, ಭಾರತಕ್ಕೆ ಜಯ

ಜಾವೆಲಿನ್ ಥ್ರೋ: ವಿಶ್ವ ವೇದಿಕೆಯಲ್ಲಿ ಭಾರತದ ನೀರಜ್, ಪಾಕಿಸ್ತಾನದ ನದೀಂ ಪೈಪೋಟಿ

ಒಳನೋಟ: ಕಿರಾಣಿ ಅಂಗಡಿಗಳಿಗೆ ಗ್ರಹಣ

ಒಳನೋಟ | ನೆರೆ ಸಂತ್ರಸ್ತರ ತೀರದ ಬವಣೆ

Elephant Attack | ಆನೆ ದಾಳಿ ಸಂತ್ರಸ್ತರ ಅರಣ್ಯ ರೋದನ

ಒಳನೋಟ: ಬೆಳಗಾವಿ, ಮಹಾರಾಷ್ಟ್ರ ಗಡಿಯಲ್ಲಿ ಮದ್ಯ ಅಕ್ರಮ ಸಾಗಣೆ ನಿರಂತರ..!

ಚಿನಕುರುಳಿ: ಬುಧವಾರ, 17 ಸೆಪ್ಟೆಂಬರ್ 2025

ಧರ್ಮಸ್ಥಳ ಪ್ರಕರಣ: ಮತ್ತಷ್ಟು ಮೃತದೇಹಗಳ ಅವಶೇಷ ಪತ್ತೆ; SIT ಮರುಶೋಧ

ಅಂತರ್ಜಾತಿ ವಿವಾಹ ಆಗುವವರಿಗೆ ಸರ್ಕಾರದಿಂದ ಏನೆಲ್ಲಾ ಸೌಲಭ್ಯ: ಇಲ್ಲಿದೆ ಮಾಹಿತಿ

ಚುರುಮುರಿ: ಪ್ರಜಾ ಫಜೀತಿ