ಬಾದಾಮಿ: ಹಿಂದೂ ಮನೆಯಲ್ಲಿ ಪಂಜಾ ಪ್ರತಿಷ್ಠಾಪನೆ

ಬಾದಾಮಿ: ಪಟ್ಟಣದ ಕಲಾಲ್ ಬಡಾವಣೆಯ ಹಿಂದೂ ಸೂರ್ಯವಂಶ ಕ್ಷತ್ರಿಯ ಕಾಟಿಕ್ ಸಮಾಜದ ಮುಖಂಡ ಅಶೋಕ ಕೋಟನಕರ ಮನೆ ಮುಂದೆ  ‘ಕೌಡಿಪೀರಾ’ ಪಂಜಾ ದೇವರನ್ನು ಪ್ರತಿಷ್ಠಾಪನೆ ಮಾಡಲಾಗಿದೆ.

ಪ್ರತಿವರ್ಷ ಮೊಹರಂ ಆಚರಣೆ ಮುಗಿದು ಮೂರು ದಿನಗಳ ನಂತರ ‘ಕೌಡಿಪೀರಾ’ ದೇವರನ್ನು ಪ್ರತಿಷ್ಠಾಪಿಸಲಾಗುತ್ತಿದೆ ಎಂದು ಕಲಾಲ್ ಕುಟುಂಬದ ಹಿರಿಯ ಅಶೋಕ ಕೋಟನಕರ ಹೇಳಿದರು.

‘ಕೌಡಿಪೀರಾ’ ಪಂಜಾ ದೇವರು ಎರಡು ಶತಮಾನಗಳ ಹಿಂದೆ ಬಳ್ಳಾರಿಯಿಂದ ಬಾದಾಮಿಗೆ ಬಂದಿದೆ. ನಮ್ಮ ಪೂರ್ವಜರು ಬಳ್ಳಾರಿಯಲ್ಲಿ ದೇವರನ್ನು ಇಟ್ಟು ಪೂಜಿಸುತ್ತಿದ್ದರು. ಕಲಾಲ್ ಕುಟುಂಬ ಬಾದಾಮಿಗೆ ಬಂದ ನಂತರ ಇಲ್ಲಿಯೇ ಪ್ರತಿಷ್ಠಾಪಿಸಲಾಗುತ್ತಿದೆ ಎಂದರು.

ಅಂದಾಜು ಎರಡು ಶತಮಾನಗಳ ಹಿಂದೆ ಪಟ್ಟಣದಲ್ಲಿ ಚಿನ್ನ ಮತ್ತು ಬೆಳ್ಳಿ ಆಭರಣ ತಯಾರಕರಾದ ನಿಂಗಪ್ಪ ಶೀಲವಂತರ ಪಂಚಲೋಹದಲ್ಲಿ ಪಂಜಾವನ್ನು ರೂಪಿಸಿ ಮಧ್ಯದಲ್ಲಿ ಓಂ ಎಂದು ಸಂಕೇತ ಮಾಡಿದ್ದಾರೆ.

ಎರಡು ತಲೆಮಾರಿನ ಹಿರಿಯರಾಗಿದ್ದ ಶೇರಾಜಿ ಕೋಟನಕರ, ಮಹಾಬಣ್ಣ ಕೋಟನಕರ ದೇವರ ಕುದುರೆಯಾಗಿ ಸೇವೆ ಮಾಡಿದ್ದಾರೆ. ಈಗ ನೇತಾಜಿ ಕೋಟನಕರ ದೇವರನ್ನು ಹೊತ್ತು ಭಕ್ತರ ಮನೆ ಮನೆಗೆ ತೆರಳುವ ವಾಡಿಕೆ ಇದೆ ಎಂದು ತಿಳಿಸಿದರು.

ಪಟ್ಟಣದಲ್ಲಿ ಹಿಂದೂ ಮುಸ್ಲಿಂ ಬಾಂಧವರು ಕೌಡಿಪೀರಾ ಪಂಜಾ ದೇವರಿಗೆ ಶ್ರದ್ಧೆ, ಭಕ್ತಿಯಿಂದ ಪುಷ್ಪಮಾಲೆ, ಸಕ್ಕರೆ, ಮಕನಾ ಮತ್ತಿತರ ವಸ್ತುಗಳಿಂದ ಪೂಜೆಯನ್ನು ಸಲ್ಲಿಸುವರು.