ಬಾಗಲಕೋಟೆ: ಕೊರೊನಾ ವೈರಸ್ ಸೋಂಕು ಹರಡುವಿಕೆ ತಡೆಗಟ್ಟುವ ನಿಟ್ಟಿನಲ್ಲಿ ಮುಂಜಾಗರೂಕತಾ ಕ್ರಮವಾಗಿ ಮಾರ್ಚ್ 31 ರವರೆಗೆ ಸಾರ್ವಜನಿಕ ಗ್ರಂಥಾಲಯಗಳನ್ನು ಓದುಗರಿಗೆ ಮುಚ್ಚಲಾಗಿದೆ. ಬದಲಿಗೆ ಪುಸ್ತಕಗಳನ್ನು ಎರವಲು ಪಡೆದು ಮನೆಗೆ ಒಯ್ದು ಓದಬಹುದಾಗಿದೆ.
ಪುಸ್ತಕಗಳನ್ನು ಓದುಗರಿಗೆ ವಿತರಿಸುವ ಸೇವೆ ಮುಂದುವರೆಸಲು ಸಿಬ್ಬಂದಿ ಗ್ರಂಥಾಲಯದಲ್ಲಿ ಹಾಜರಿರುವಂತೆ ಸಾರ್ವಜನಿಕ ಗ್ರಂಥಾಲಯ ಇಲಾಖೆ ನಿರ್ದೇಶಕರು ಮಾರ್ಚ್ 17ರಂದು ಸುತ್ತೋಲೆ ಹೊರಡಿಸಿದ್ದಾರೆ.
ಅದರನ್ವಯ ಬಾಗಲಕೋಟೆಯ ಮುಖ್ಯ ಗ್ರಂಥಾಲಯ, 19 ಶಾಖಾ ಗ್ರಂಥಾಲಯ 157 ಗ್ರಾಮ ಪಂಚಾಯ್ತಿ ಮಟ್ಟದ ಗ್ರಂಥಾಲಯ ಹಾಗೂ 10 ಅಲೆಮಾರಿ, ಕೊಳಚೆ ಪ್ರದೇಶದ ಗ್ರಂಥಾಲಯಗಳನ್ನು ಬುಧವಾರದಿಂದ ಓದುಗರಿಗೆ ಮುಚ್ಚಲಾಗಿದೆ ಎಂದು ಜಿಲ್ಲಾ ಕೇಂದ್ರ ಗ್ರಂಥಾಲಯದ ಚೀಫ್ ಲೈಬ್ರರಿಯನ್ ಎಂ.ಎಸ್.ರೆಬಿನಾಳ ’ಪ್ರಜಾವಾಣಿ’ಗೆ ತಿಳಿಸಿದರು.