ಟೆಲಿಕಾಂ ಎಂಜಿನಿಯರ್‌ ಈಗ ಪ್ರಗತಿಪರ ರೈತ

ಟೆಲಿಕಾಂ ಕಂಪನಿಯಲ್ಲಿ ಹೊರಗುತ್ತಿಗೆ ಉದ್ಯೋಗಿಯಾಗಿ ಮಾಸಿಕ ₹20 ಸಾವಿರ ವೇತನ ಪಡೆಯುತ್ತಿದ್ದರು. ಕೃಷಿಯಲ್ಲಿ ದಾಳಿಂಬೆ ಬೆಳೆದು 10 ಜನರಿಗೆ ಉದ್ಯೋಗ ನೀಡಿದ್ದಾರೆ.

2018-19ನೇ ಸಾಲಿನಲ್ಲಿ ನರೇಗಾ ಯೋಜನೆಯಡಿ ತೋಟಗಾರಿಕೆ ಇಲಾಖೆಯಿಂದ ₹71 ಸಾವಿರ ಸಹಾಯಧನ ಪಡೆದು ತಮ್ಮ ನಾಲ್ಕು ಜಮೀನಿನಲ್ಲಿ ದಾಳಿಂಬೆ ಬೆಳೆಯುವುದಕ್ಕಾಗಿ ಗುಜರಾತ್ ರಾಜ್ಯದಿಂದ 1300 ಸಸಿಗಳನ್ನು ತಂದು ನೆಟ್ಟರು. ಕೆಡ್ಲಾ ಕಂಪನಿಯ ಬಗವಾ ತಳಿಯ ದಾಳಿಂಬೆ ಸಸಿಗಳನ್ನು ತಲಾ ₹45ಕ್ಕೆ ಖರೀದಿಸಿದ್ದರು. ಸಸಿಗಳನ್ನು 8 ಅಡಿ ಸಾಲಿನಿಂದ ಸಾಲಿಗೆ 14 ಅಡಿ ಅಂತರವಿರುವಂತೆ ನೆಟ್ಟಿದ್ದರು. ಆರಂಭದಲ್ಲಿಯೇ ಕೃಷಿ ತಜ್ಞರ ಸಲಹೆ ಪಾಲನೆ ಮಾಡಿದ್ದರು.

ಮೂರು ವರ್ಷಕ್ಕೆ ದಾಳಿಂಬೆ ಫಸಲು ಆರಂಭವಾಗಿದ್ದು, ಮೊದಲೆರಡು ವರ್ಷ ಅವರು 50 ಟನ್‌ನಷ್ಟು ಫಸಲನ್ನು ಬೆಂಗಳೂರಿಗೆ ರಫ್ತು ಕಳಿಸಿದ್ದರು. ಆಗ ಒಂದು ಟನ್‌ಗೆ ಸರಾಸರಿ ಒಂದು ಲಕ್ಷ ಆದಾಯ ಸಿಕ್ಕಿತ್ತು.

‘ಈಗ ಮೂರನೇ ಫಸಲು ಕೈ ಸೇರುತ್ತಿದ್ದು, 45 ಟನ್ ಇಳುವರಿ ನಿರೀಕ್ಷೆ ಇದೆ. ದೀಪಾವಳಿ ಹೊತ್ತಿಗೆ ಮೂರನೇ ಕಟಾವು ಶುರುವಾಗಲಿದ್ದು ತೋಟಕ್ಕೆ ಬಂದು ಮಾರಾಟಗಾರರು ಕೊಂಡೊಯ್ಯಲಿದ್ದಾರೆ’ ಎಂದು ರೈತ ವಿಜಯ್ ಶಿರುಂದ ‘ಪ್ರಜಾವಾಣಿ‘ಗೆ ತಿಳಿಸಿದರು.

ಕಳೆದ ನಾಲ್ಕು ವರ್ಷಗಳಿಂದ 10 ರೈತರಿಗೆ ಮಾಸಿಕ ₹21 ಸಾವಿರ ವೇತನ ನೀಡಿ ಉದ್ಯೋಗ ಸೃಷ್ಟಿ ಮಾಡಿದ ಹಿರಿಮೆ ಸಹ ಅವರದು. ದಾಳಿಂಬೆಗೆ ರೋಗ ಬಾಧೆ ಹೆಚ್ಚು. ಅದನ್ನು ನಿಗ್ರಹಿಸುವಲ್ಲಿ ರೈತರಿಗೆ ಪರಿಶ್ರಮ ಅತ್ಯಗತ್ಯ. ಅದರಲ್ಲಿ ಯಶಸ್ವಿಯಾದರೆ ಉತ್ತಮ ಆದಾಯವನ್ನು ಖಂಡಿತ ನಿರೀಕ್ಷಿಸಬಹುದು ಎನ್ನುವುದು ಅವರ ಅನುಭವದ ಮಾತು.

‘2018-19ರಲ್ಲಿ ಟೆಲಿಕಾಂ ಗುತ್ತಿಗೆ ನೌಕರಿ ಬಿಟ್ಟಿದ್ದೆ. ಕೃಷಿಯಲ್ಲಿ ತೊಡಗಿಸಿಕೊಂಡಾಗ ನರೇಗಾ ಯೋಜನೆ ಕೈ ಹಿಡಿಯಿತು. ನಾನು ದುಡಿಯುತ್ತಿದ್ದಾಗ ನೀಡುತ್ತಿದ್ದಷ್ಟೇ ಪಗಾರವನ್ನು ನಾನೀಗ ನನ್ನ ಜಮೀನಿನ 10 ರೈತರಿಗೆ ನೀಡುತ್ತಿದ್ದೇನೆ. ದಾಳಿಂಬೆಗೆ ಪರಿಶ್ರಮ ಬೇಕು. ಪರಿಶ್ರಮ ಪಟ್ಟೇವು, ನರೇಗಾ ಯೋಜನೆ ಸಹಕಾರಿಯಾಯಿತು. ಹಾಗಾಗಿ ಈ ಫಲಿತಾಂಶ. ನೌಕರಿ ಬಿಟ್ಟು ರೈತನಾಗಿದ್ದಕ್ಕೆ ಹೆಮ್ಮೆಯಿದೆ’ ಎಂದರು.