ಬೃಜೇಶ್‌ ಕುಮಾರ್‌ ಅವರ ತಂದೆ ಶಿಯೋ ಯೋಗಿ ಸಿಂಗ್‌, ತಾಯಿ ಲಲಿತಾ ಸಿಂಗ್ ಮತ್ತು ಇತರರನ್ನು ಆರೋಪಿಗಳೆಂದು ಎಫ್‌ಐಆರ್‌ನಲ್ಲಿ ಹೆಸರಿಸಲಾಗಿದೆ. ಸಿಬಿಐ ದೆಹಲಿ ಭ್ರಷ್ಟಾಚಾರ ನಿಯಂತ್ರಣ ಘಟಕ–3ರ ಡಿವೈಎಸ್‌ಪಿ ಸುನೀಲ್‌ ದತ್‌ ಅವರಿಗೆ ತನಿಖೆಯ ಹೊಣೆ ವಹಿಸಲಾಗಿದೆ.

ಬಿಹಾರದ ಪಾಟ್ನಾ ನಿವಾಸಿಯಾದ ಬೃಜೇಶ್ ಕುಮಾರ್, 2008ರಲ್ಲಿ ಸಿಬಿಐ ಸಬ್ ಇನ್ಸ್‌ಪೆಕ್ಟರ್ ಹುದ್ದೆಗೆ ಆಯ್ಕೆಯಾಗಿದ್ದರು. 2013ರಲ್ಲಿ ಇನ್ಸ್‌ಪೆಕ್ಟರ್ ಹುದ್ದೆಗೆ ಬಡ್ತಿ ಹೊಂದಿದ್ದರು. 2013ರ ಏಪ್ರಿಲ್‌ನಲ್ಲಿ ಡಿವೈಎಸ್‌ಪಿ ಹುದ್ದೆಗೆ ಬಡ್ತಿ ಹೊಂದಿದ್ದ ಅವರನ್ನು, ಸಿಬಿಐ ಬೆಂಗಳೂರು ಬ್ಯೂರೊದ ಬ್ಯಾಂಕ್ ಭದ್ರತೆ ಮತ್ತು ವಂಚನೆ ತಡೆ ಘಟಕಕ್ಕೆ ನಿಯೋಜಿಸಲಾಗಿತ್ತು. 2020ರ ಜೂನ್‌ನಿಂದ ಸಿಬಿಐ ಬೆಂಗಳೂರು ಬ್ಯೂರೊದ ಭ್ರಷ್ಟಾಚಾರ ನಿಯಂತ್ರಣ ಘಟಕದಲ್ಲಿದ್ದಾರೆ.

2018ರ ಸೆಪ್ಟೆಂಬರ್ 1ರಿಂದ 2021ರ ಮೇ 31ರವರೆಗಿನ ಅವಧಿಯಲ್ಲಿ ಬೃಜೇಶ್ ಕುಮಾರ್ ಪಡೆದಿರುವ ವೇತನ ಮತ್ತು ಅಧಿಕೃತ ಆದಾಯ, ಮಾಡಿರುವ ವೆಚ್ಚಗಳಿಗೆ ಹೋಲಿಸಿದರೆ ₹ 1.94 ಕೋಟಿ ಮೌಲ್ಯದ (ಶೇಕಡ 302) ಅಕ್ರಮ ಆಸ್ತಿ ಹೊಂದಿರುವುದು ಕಂಡುಬಂದಿದೆ ಎಂದು ಎಫ್ಐಆರ್‌ನಲ್ಲಿ ಉಲ್ಲೇಖಿಸಲಾಗಿದೆ.

2020ರಲ್ಲಿ ಯಲಹಂಕ ಸಮೀಪದ‌ ಆವಲಹಳ್ಳಿಯ ಪ್ರೆಸ್ಟೀಜ್ ರಾಯಲ್‌ ಗಾರ್ಡನ್ಸ್ ಅಪಾರ್ಟ್‌ಮೆಂಟ್ ಸಮುಚ್ಚಯದಲ್ಲಿ ತಂದೆ ಶಿಯೋ ಯೋಗಿ ಸಿಂಗ್ ಹೆಸರಿನಲ್ಲಿ ₹ 96.38 ಲಕ್ಷ‌ ಮೌಲ್ಯದ ಒಂದು ಫ್ಲ್ಯಾಟ್ ಮತ್ತು ತಾಯಿ ಲಲಿತಾ ಸಿಂಗ್ ಹೆಸರಿನಲ್ಲಿ ₹ 95.29 ಲಕ್ಷ ಮೌಲ್ಯದ ಒಂದು ಫ್ಲ್ಯಾಟ್ ಖರೀದಿಸಲಾಗಿದೆ. ಈ ಯಾವುದೇ ಖರೀದಿಗೆ ಬ್ಯಾಂಕ್ ಅಥವಾ ಹಣಕಾಸು ಸಂಸ್ಥೆಗಳಿಂದ ಸಾಲ ಪಡೆದಿಲ್ಲ ಎಂಬ ಮಾಹಿತಿ ಎಫ್ಐಆರ್‌ನಲ್ಲಿದೆ.

2014ರಲ್ಲಿ ಕಮ್ಮನಹಳ್ಳಿ ರಸ್ತೆಯ ಶುಭೋದಯ ಲಾರೆಲ್ ಅಪಾರ್ಟ್‌ಮೆಂಟ್ ಸಮುಚ್ಚಯದಲ್ಲಿ ಪತ್ನಿ ಸ್ವೀಟಿ ಸಿಂಗ್ ಹೆಸರಿಗೆ ಒಂದು ಫ್ಲ್ಯಾಟ್ ಖರೀದಿಸಲಾಗಿದೆ ಎಂಬ ಉಲ್ಲೇಖವೂ ಇದೆ.