ಕಬ್ಬನ್: ಪ್ರಮಾಣಪತ್ರವಿದ್ದರೆ ಶ್ವಾನಗಳಿಗೆ ಪ್ರವೇಶ

ಉದ್ಯಾನಕ್ಕೆ ಬೆಳಿಗ್ಗೆ ಹಾಗೂ ಸಂಜೆ ವಾಯುವಿಹಾರಕ್ಕೆ ಬರುವವರು ತಮ್ಮೊಟ್ಟಿಗೆ ಶ್ವಾನಗಳನ್ನೂ ಕರೆತರುತ್ತಾರೆ. ಇದು ಇತರರಿಗೆ ಸಮಸ್ಯೆಯಾಗುತ್ತಿದೆ. ನಾಯಿಗಳು ಕಚ್ಚಬಹುದು ಎಂಬ ಭೀತಿಯಲ್ಲಿ ಉದ್ಯಾನದಲ್ಲಿ ಸಂಚರಿಸಬೇಕಾಗಿದೆ ಎಂದು ಕೆಲವರಿಂದ ದೂರು ಬಂದಿರುವುದರಿಂದ ಇಲಾಖೆ ಈ ನಿರ್ಧಾರ ಕೈಗೊಂಡಿದೆ.

ಎಲ್ಲ ಶ್ವಾನಗಳಿಗೂ ಕಡ್ಡಾಯವಾಗಿ ಮುಖಗವಸು ಹಾಕಬೇಕು. ಮಾಲೀಕರು ಶ್ವಾನಗಳನ್ನು ತಮ್ಮ ನಿಯಂತ್ರಣದಲ್ಲಿ ಇಡಬೇಕು. ಶ್ವಾನದೊಂದಿಗೆ ಆರೋಗ್ಯ ಪ್ರಮಾಣಪತ್ರ ಕಡ್ಡಾಯ ಎಂಬ ಷರತ್ತು ವಿಧಿಸಿರುವ ಫಲಕಗಳನ್ನು ಇಲಾಖೆ ಉದ್ಯಾನದಲ್ಲಿ ಅಳವಡಿಸಿದೆ. ಉದ್ಯಾನದಲ್ಲಿ ಸಾಕು ನಾಯಿಗಳು ವಿಸರ್ಜಿಸುವ ಮಲ-ಮೂತ್ರದಿಂದಲೂ ಜನರಿಗೆ ಕಿರಿಕಿರಿಯಾಗುತ್ತಿದ್ದು, ಇದನ್ನು ಮಾಲೀಕರೇ ಸ್ವಚ್ಛಗೊಳಿಸಬೇಕು. ನಿಯಮ ಉಲ್ಲಂಘಿಸಿದರೆ ದಂಡ ವಿಧಿಸುವುದಾಗಿ ಎಚ್ಚರಿಕೆಯೂ ನೀಡಲಾಗಿದೆ.

'ಸಾಕು ನಾಯಿಗಳನ್ನು ಉದ್ಯಾನಕ್ಕೆ ಕರೆತರುವವರಿಗೆ ಈ ಹಿಂದೆಯೇ ಹಲವು ಷರತ್ತುಗಳನ್ನು ವಿಧಿಸಲಾಗಿತ್ತು. ಅದು ಜನರಿಗೆ ತಿಳಿಯುವಂತೆ ಈಗ ದೊಡ್ಡ ಫಲಕಗಳಲ್ಲಿ ಬರೆಸಲಾಗಿದೆ. ಇದು ಹೊಸದಾಗಿ ರೂಪಿಸಿರುವ ನಿಯಮಗಳಲ್ಲ' ಎಂದು ತೋಟಗಾರಿಕೆ ಇಲಾಖೆಯ ಉಪ ನಿರ್ದೇಶಕ ಜೆ.ಗುಣವಂತ ತಿಳಿಸಿದ್ದಾರೆ.