ಕೆಐಎ: ಗರಿಷ್ಠ ಪ್ರಮಾಣದ ಸರಕು ಸಾಗಣೆ

ಬೆಂಗಳೂರು: ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ (ಕೆಐಎ) 2020ರ ಡಿಸೆಂಬರ್‌ನಲ್ಲಿ ಗರಿಷ್ಠ ಪ್ರಮಾಣದ ಸರಕು ಸಾಗಣೆ ನಡೆದಿದೆ. ಈ ಮೂಲಕ ದಕ್ಷಿಣ ಭಾರತದಲ್ಲೇ ಅತಿ ಹೆಚ್ಚು ಸರಕುಗಳನ್ನು ಸಾಗಿಸಿದ ವಿಮಾನ ನಿಲ್ದಾಣ ಎಂಬ ಹಿರಿಮೆಗೆ ಕೆಐಎ ಪಾತ್ರವಾಗಿದೆ.

ಈ ಅವಧಿಯಲ್ಲಿ ಒಟ್ಟಾರೆ 33,053 ಟನ್‌ಗಳಷ್ಟು ಸರಕು ಸಾಗಣೆಯಾಗಿದ್ದು, ವಾರ್ಷಿಕ ಶೇ. 7ರಷ್ಟು ಪ್ರಗತಿ ಸಾಧಿಸಿದೆ. ಬೇರೆ ಕಡೆಯಿಂದ ಇಲ್ಲಿಗೆ ಬಂದಿರುವ ಮತ್ತು ಸಾಗಣೆಯಾಗಿರುವ ಸರಕು ಕೂಡ ಇದರಲ್ಲಿ ಸೇರಿದೆ. ಹಿಂದಿನ ವರ್ಷಕ್ಕೆ ಹೋಲಿಸಿದರೆ, ಕಳೆದ ನಾಲ್ಕು ತಿಂಗಳು (ಸೆಪ್ಟೆಂಬರ್-ಡಿಸೆಂಬರ್) ಸರಕು ಸಾಗಣೆಯಲ್ಲಿ ಶೇಕಡ 100ರಷ್ಟು ಗುರಿ ಸಾಧಿಸಿರುವ ಏಕೈಕ ವಿಮಾನ ನಿಲ್ದಾಣವೂ ಇದಾಗಿದೆ.

ಕಳೆದ ವರ್ಷ ಇದೇ ಅವಧಿಯಲ್ಲಿ ಬೆಂಗಳೂರು ಅಂತರರಾಷ್ಟ್ರೀಯ ವಿಮಾನನಿಲ್ದಾಣ ಸಂಸ್ಥೆ (ಬಿಐಎಎಲ್‌) 30,961 ಟನ್ ಸರಕು ಸಾಗಿಸಿತ್ತು. ಇ-ವಾಣಿಜ್ಯ, ಬಹುಬೇಗ ಹಾಳಾಗುವ ಸರಕುಗಳು, ಸ್ವದೇಶಿ ಮತ್ತು ವಿದೇಶಿ ಉತ್ಪನ್ನಗಳೂ ಇದರಲ್ಲಿ ಇವೆ. 21 ತಿಂಗಳಲ್ಲಿ ಅತ್ಯಧಿಕ (20,288 ಟನ್) ವಿದೇಶಿ ಸರಕು ಸಾಗಣೆ ಡಿಸೆಂಬರ್‌ನಲ್ಲಿ ಸಾಧ್ಯವಾಗಿದೆ ಎಂದು ಬಿಐಎಎಲ್‌ ಹೇಳಿದೆ.