ಬೆಲೆ ಕುಸಿತ: ಟೊಮೆಟೊ ಬುಡಕ್ಕೆ ಕುಡುಗೋಲು

‘ಸಗಟು ಮಾರುಕಟ್ಟೆಯಲ್ಲಿ 15 ಕೆಜಿ ತೂಗುವ ಟೊಮೆಟೊ ಬಾಕ್ಸೊಂದು ₹30 ರಿಂದ ₹70 ರವರೆಗೆ ಮಾರಾಟವಾಗುತ್ತಿದೆ. ಈ ಬೆಲೆಯಲ್ಲಿ ಟೊಮೆಟೊ ಬಿಡಿಸಿ ಮಾರುಕಟ್ಟೆಗೆ ಸಾಗಿಸಿದ ವೆಚ್ಚವೂ ಸಿಗುವುದಿಲ್ಲ. ಮಾರುಕಟ್ಟೆಗೆ ಹಾಕಿ ಕೈ ಸುಟ್ಟುಕೊಂಡು ಸಾಕಾಗಿದೆ. ಆದ್ದರಿಂದಲೇ ಗಿಡದ ಬುಡಕ್ಕೆ ಕುಡುಗೋಲು ಹಾಕಿದ್ದೇನೆ, ಎಂದು ರೈತ ಚಂದನ್‌ ರೆಡ್ಡಿ ‘ಪ್ರಜಾವಾಣಿ’ಗೆ ತಿಳಿಸಿದರು.

ತಾಲ್ಲೂಕಿನಲ್ಲಿ ಕೃಷಿ ಕೊಳವೆ ಬಾವಿಗಳ ಆಶ್ರಯದಲ್ಲಿ ಮುಖ್ಯ ಬೆಳೆಯಾಗಿ ಟೊಮೆಟೊ ಬೆಳೆಯಲಾಗಿದೆ. ಬೆಲೆ ಕುಸಿತದ ಪರಿಣಾಮವಾಗಿ ಬಹುತೇಕ ರೈತರು ಬಿಡಿಸುವ ಗೋಜಿಗೆ ಹೋಗಿಲ್ಲ. ಹಾಗಾಗಿ ಟೊಮೆಟೊ ಹಣ್ಣಾಗಿ ಕೊಳೆಯುತ್ತಿದೆ. ಹುಳಿ ಸೋರುವಿಕೆಯಿಂದ ನೆಲದ ಆರೋಗ್ಯ ಕೆಡುವ ಭೀತಿಯಿಂದ, ಕೆಲವು ರೈತರು ಹಣ್ಣನ್ನು ಬಿಡಿಸಿ ಹೊರಗೆಎಸೆಯುತ್ತಿದ್ದಾರೆ.