ಈಶ್ವರ ಖಂಡ್ರೆ, ರಾಜಶೇಖರ ಪಾಟೀಲರಿಂದ ಪಾಪದ ಕೆಲಸ: ಸಚಿವ ಭಗವಂತ ಖೂಬಾ ಆರೋಪ

ಸತ್ತಿದ್ದಾರೆ ಎಂದವರು ಯಾರು?:

ನಾನು ಸೋತಿದ್ದೇನೆ, ಸತ್ತಿಲ್ಲ ಎಂದು ರಾಜಶೇಖರ ಪಾಟೀಲ ಹೇಳಿದ್ದಾರೆ. ಸತ್ತಿದ್ದಾರೆ ಎಂದು ಹೇಳಿದವರು ಯಾರು? ಜೀವಂತ ಇದ್ದವರಷ್ಟೇ ಪತ್ರಿಕಾಗೋಷ್ಠಿ ನಡೆಸಬಹುದು. ಆದರೆ, ಅವರು ಸೋತು ಸುಣ್ಣವಾಗಿದ್ದು ಖರೇ. ಇವರು ಸೋತ ಮೇಲೆ ಈಶ್ವರ ಖಂಡ್ರೆ ಮಂತ್ರಿಯಾಗಿದ್ದಾರೆ. ಅದನ್ನು ಇವರು ಸಹಿಸಲ್ಲ. ಇಬ್ಬರು ಬದ್ಧ ವೈರಿಗಳು. ಸುಳ್ಳರು, ಕಳ್ಳರು, ಮೋಸಗಾರರು, ಲೂಟಿಕೋರರು, ಅವಕಾಶವಾದಿಗಳು ನನ್ನಂತಹವನ ವಿರುದ್ಧ ಒಂದಾಗುವುದು ಸೃಷ್ಟಿ ನಿಯಮ, ಸಹಜ. ನನ್ನ ಒಬ್ಬನ ವಿರುದ್ಧ ಎಲ್ಲರೂ ಮುಗಿಬೀಳುತ್ತಿದ್ದಾರೆ. ಭಗವಂತ ಖೂಬಾನ ಪ್ರಾಮಾಣಿಕತೆ ಏನು ಎನ್ನುವುದು ಇವರೇ ಹೇಳಿದಂತಾಗಿದೆ. ಎಲ್ಲ ವಿರೋಧಿಗಳು ರಾಜನ ಮೇಲೆ ಮುಗಿ ಬಿದ್ದರೆ ಅವರು ಪ್ರಾಮಾಣಿಕ ಎಂದರ್ಥ. ಖಂಡ್ರೆ, ಪಾಟೀಲ ಅವರು ಒಂದೇ ವೇದಿಕೆಗೆ ಬಂದರೆ ಇಬ್ಬರು ಒಂದಾದರೂ ಎಂದರ್ಥ ಅಲ್ಲ ಎಂದರು.

ಬಿಎಸ್‌ಎಸ್‌ಕೆಯಲ್ಲಿ ಅಕ್ರಮವಾಗಿದೆ ಎಂದು ಖಂಡ್ರೆ, ಪಾಟೀಲರು ನಮ್ಮ ಸರ್ಕಾರದ ಅವಧಿಯಲ್ಲಿ ಮಾತಾಡಿದ್ದೇ ಮಾತಾಡಿದ್ದು. ಈಗ ಅವರದ್ದೇ ಸರ್ಕಾರ ಇದೆ. ತನಿಖೆ ನಡೆಸಿ, ತಪ್ಪಿತಸ್ಥರಿಗೆ ಶಿಕ್ಷೆ ಕೊಡಿಸಲಿ ಎಂದು ಆಗ್ರಹಿಸಿದರು.

‘ಖಂಡ್ರೆ ಸಂಚರಿಸುವ ವಿಮಾನ ಆರಂಭಿಸಿದ್ದು ಖೂಬಾ’

‘ಭಗವಂತ ಖೂಬಾ ಅವರು 9 ವರ್ಷಗಳಲ್ಲಿ ಏನೂ ಅಭಿವೃದ್ಧಿ ಕೆಲಸ ಮಾಡಿಲ್ಲ ಎಂದು ಈಶ್ವರ ಖಂಡ್ರೆ ಆರೋಪಿಸಿದ್ದಾರೆ. ಬೀದರ್‌–ಭಾಲ್ಕಿ ನಡುವೆ 120 ಕಿ.ಮೀ ವೇಗದಲ್ಲಿ ಹೋಗುವ ಹೆದ್ದಾರಿ ಆಗಿದ್ದು ನನ್ನ ಕಾಲದಲ್ಲಿ. ಬೀದರ್‌ನಿಂದ ಬೆಂಗಳೂರಿಗೆ ಖಂಡ್ರೆ ಸಂಚರಿಸುವ ವಿಮಾನ ಆರಂಭಿಸಿದ್ದು ಖೂಬಾ. ಸೈನಿಕ ಶಾಲೆ ಮಂಜೂರಾಗಿದ್ದಕ್ಕೆ ರಾಜ್ಯದ ಎಲ್ಲೆಡೆ ಚರ್ಚೆಗಳಾಗುತ್ತಿದೆ’ ಎಂದು ಸಚಿವ ಭಗವಂತ ಖೂಬಾ ಹೇಳಿದರು.

ಜಿಲ್ಲೆಯ ನೀರಾವರಿ ಯೋಜನೆಗಳ ಕುರಿತು ನಾನು ಸಿಎಂ, ಡಿಸಿಎಂ ಅವರನ್ನು ಭೇಟಿಯಾಗಿ ಚರ್ಚಿಸಿದ ನಂತರ ಖಂಡ್ರೆಯವರು ಹೋಗಿ ಅದಕ್ಕೆ ಅನುದಾನ ಕೋರಿದ್ದಾರೆ. ನನಗೆ ಅದರ ಶ್ರೇಯಸ್ಸು ಸಿಗುತ್ತದೆ ಎಂದು ಹೀಗೆ ಮಾಡಿದ್ದಾರೆ ಎಂದರು.

‘ಡೀಪ್‌ ಲವ್‌ ಅಲ್ಲ, ನನ್ನ ಕರ್ತವ್ಯ’

‘ಬಿಡಿಸಿಸಿ ಬ್ಯಾಂಕಿನ ಅಧ್ಯಕ್ಷ ಉಮಾಕಾಂತ ನಾಗಮಾರಪಳ್ಳಿ ಅವರು ಉತ್ತಮ ರೀತಿಯಲ್ಲಿ ಬ್ಯಾಂಕ್‌ ನಡೆಸಿಕೊಂಡು ಹೋಗುತ್ತಿದ್ದಾರೆ. ಅದಕ್ಕಾಗಿ ಅವರ ಮೇಲೆ ಪ್ರೀತಿ. ಅವರಿಗೆ ವೈಯಕ್ತಿಕವಾಗಿ ಬೆಂಬಲ ಸೂಚಿಸಿದ್ದೇನೆ. ಅವರ ಮೇಲೆ ನನಗೆ ಡೀಪ್‌ ಲವ್‌ ಅಲ್ಲ, ಉತ್ತಮರಿಗೆ ಬೆಂಬಲಿಸುವುದು ನನ್ನ ಕರ್ತವ್ಯ. ಆದರೆ,ಚುನಾವಣೆ ಪೂರ್ವದಲ್ಲಿ ಈಶ್ವರ ಖಂಡ್ರೆ ಹಾಗೂ ರಾಜಶೇಖರ ಪಾಟೀಲ ನಡುವೆ ಡೀಪ್‌ ಲವ್‌ ಎಲ್ಲಿತ್ತು? ಸೂರ್ಯಕಾಂತ ನಾಗಮಾರಪಳ್ಳಿಗೆ ನಾನು ಟಿಕೆಟ್‌ ತಪ್ಪಿಸಿಲ್ಲ. ಅದು ಪಕ್ಷದ ನಿರ್ಧಾರ. ಬೇಕಾದರೆ ಅದನ್ನು ಸೂರ್ಯಕಾಂತ ನಾಗಮಾರಪಳ್ಳಿಗೆ ಕೇಳಬಹುದು ಎಂದರು.

ಉಮಾಕಾಂತ ಪುನಃ ಅಧ್ಯಕ್ಷರಾಗಲು ಯಾರಿಂದಲೂ ತಡೆಯೊಕ್ಕಾಗಲ್ಲ. ಅವರ ಪೆನಾಲ್‌ನ ಮೂವರು ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ. ಇನ್ನುಳಿದ 12 ನಿರ್ದೇಶಕರ ಸ್ಥಾನಗಳಿಗೆ ಚುನಾವಣೆ ನಡೆಯಲಿದೆ. ನನಗೆ ಅನೇಕರು ಕರೆ ಮಾಡಿ, ತೀರ್ಥ ಯಾತ್ರೆಯಲ್ಲಿದ್ದೇವೆ. ಉಮಾಕಾಂತ ಅವರಿಗೆ ಸಮರ್ಥಿಸುತ್ತೇವೆ ಎಂದಿದ್ದಾರೆ ಎಂದು ತಿಳಿಸಿದರು.

‘ರಾಹುಲ್‌ ಗಾಂಧಿ, ಖಂಡ್ರೆ ಸ್ಪರ್ಧಿಸಿದರೂ ಸೋಲಿಸುವೆ’

‘2024ರ ಲೋಕಸಭೆ ಚುನಾವಣೆಯಲ್ಲಿ ಬೀದರ್‌ ಕ್ಷೇತ್ರದಿಂದ ನನ್ನ ವಿರುದ್ಧ ಕಾಂಗ್ರೆಸ್‌ ಮುಖಂಡ ರಾಜಶೇಖರ ಪಾಟೀಲ ಹುಮನಾಬಾದ್‌ ಅಲ್ಲ, ಸಚಿವ ಈಶ್ವರ ಬಿ. ಖಂಡ್ರೆ, ಕಾಂಗ್ರೆಸ್‌ ನಾಯಕ ರಾಹುಲ್‌ ಗಾಂಧಿ ಅವರು ಸ್ಪರ್ಧಿಸಿದರೂ ಸೋಲಿಸುವೆ’ ಎಂದು ಕೇಂದ್ರ ಸಚಿವ ಭಗವಂತ ಖೂಬಾ ಹೇಳಿದರು.

‘ನಾನು ಗ್ರಾಮ ಪಂಚಾಯಿತಿ ಸದಸ್ಯನಾಗಲು ಅರ್ಹನಲ್ಲ’ ಎಂದು ರಾಜಶೇಖರ ಪಾಟೀಲ, ಖಂಡ್ರೆ ಹೇಳಿದ್ದಾರೆ. ಇವರಂತಹ ಕನಿಷ್ಠ ವಿಚಾರವಂತರನ್ನು ನಾನು ಎಲ್ಲೂ ನೋಡಿಲ್ಲ. ಬಿಜೆಪಿ ನನಗೆ ಟಿಕೆಟ್‌ ಕೊಟ್ಟು ಜಿಲ್ಲೆಯ ಸಂಸದನಾಗಿ ಮಾಡಿದೆ. ಕಾರ್ಯಕರ್ತರ ಪರಿಶ್ರಮ, ಜನರ ಆಶೀರ್ವಾದದಿಂದ ಗೆದ್ದಿದ್ದೇನೆ. 2014ರ ಚುನಾವಣೆಯಲ್ಲಿ ನಾನು ಲಕ್ಷ ಮತಗಳ ಅಂತರದಿಂದ ಗೆದ್ದಿದೆ. ಆಗ ಬಿಜೆಪಿಯ ಒಬ್ಬ ಶಾಸಕರಿದ್ದರು. 2019ರಲ್ಲಿ ಇಬ್ಬರು ಬಿಜೆಪಿ ಎಂಎಲ್‌ಎಗಳಿದ್ದರು. ಆಗ ಖಂಡ್ರೆ ನನ್ನ ಎದುರಾಳಿ. ಕಾಂಗ್ರೆಸ್‌ ಜೆಡಿಎಸ್‌ ಸರ್ಕಾರ ಇತ್ತು. ಸಿ.ಎಂ. 18 ಜನ ಸಚಿವರು ನಾಮಿನೇಷನ್‌ಗೆ ಬಂದಿದ್ದರು. ಖಂಡ್ರೆಯವರಿಗೆ 1.25 ಲಕ್ಷ ಮತಗಳ ಅಂತರದಿಂದ ಸೋಲಿಸಿದ್ದೆ. ಈಗ ಬೀದರ್‌ ಲೋಕಸಭೆ ವ್ಯಾಪ್ತಿಯಲ್ಲಿ ಬಿಜೆಪಿಯ ಐದು ಜನ ಶಾಸಕರಿದ್ದಾರೆ. 2024ರ ಚುನಾವಣೆಯಲ್ಲಿ ಪುನಃ ಗೆಲ್ಲುವೆ ಎಂದು ನಗರದಲ್ಲಿ ಮಂಗಳವಾರ ಪತ್ರಿಕಾಗೋಷ್ಠಿಯಲ್ಲಿ ಭರವಸೆ ವ್ಯಕ್ತಪಡಿಸಿದರು.

ರಾಜಶೇಖರ ಪಾಟೀಲ ಅವರು ಚುನಾವಣೆಗೆ ಸ್ಪರ್ಧಿಸುವ ಮಾತುಗಳನ್ನು ಆಡಿದ್ದಾರೆ. ಆದರೆ, ಅವರಿಗೆ ಖಂಡ್ರೆಯವರು ಟಿಕೆಟ್‌ ಕೊಡಲು ಬಿಡ್ತಾರಾ? ಖಂಡ್ರೆಯವರೇ ಸ್ಪರ್ಧಿಸಲಿ, ರಾಹುಲ್‌ ಗಾಂಧಿಯವರೇ ನನ್ನ ವಿರುದ್ಧ ಸ್ಪರ್ಧಿಸಲಿ ಎರಡು ಲಕ್ಷ ಮತಗಳ ಅಂತರದಿಂದ ಅವರನ್ನು ಸೋಲಿಸುತ್ತೇನೆ ಎಂದು ಹೇಳಿದರು.

‘ವೀರಶೈವ ಮಹಾಸಭೆಯಲ್ಲಿ ಗುಮಾಸ್ತನಂತಿದ್ಧಾರೆ’

‘ಈಶ್ವರ ಬಿ. ಖಂಡ್ರೆಯವರು ಅಖಿಲ ಭಾರತ ವೀರಶೈವ ಮಹಾಸಭೆಯಲ್ಲಿ ಪ್ರಧಾನ ಕಾರ್ಯದರ್ಶಿ ಗುಮಾಸ್ತನಂತಿದ್ದಾರೆ. ಮಹಾಸಭೆಯ ರಾಷ್ಟ್ರೀಯ ಅಧ್ಯಕ್ಷ ಶಾಮನೂರು ಶಿವಶಂಕರಪ್ಪ ಅವರು, ಲಿಂಗಾಯತ ಅಧಿಕಾರಿಗಳಿಗೆ ಕಾಂಗ್ರೆಸ್‌ ಸರ್ಕಾರದಿಂದ ಕಿರುಕುಳ ಕೊಡಲಾಗುತ್ತಿದೆ, ಕಡೆಗಣಿಸಲಾಗುತ್ತಿದೆ ಎಂದು ಹೇಳಿದ್ದಾರೆ. ಅವರ ಹೇಳಿಕೆಗೆ ಇದುವರೆಗೆ ಪ್ರತಿಕ್ರಿಯಿಸಿಲ್ಲ’ ಎಂದು ಭಗವಂತ ಖೂಬಾ ಹೇಳಿದರು.

ಖಂಡ್ರೆಯವರು ಒಳ್ಳೆಯ ಕೆಲಸಗಳ ಬಗ್ಗೆ ಮಾತಾಡುವುದಿಲ್ಲ. ಭ್ರಷ್ಟಾಚಾರ, ಸ್ವಜನಪಕ್ಷಪಾತದ ಬಗ್ಗೆ ಬಾಯಿ ತೆಗೆಯುತ್ತಾರೆ. ಒಳ್ಳೆಯ ವಿಷಯಗಳಿಗೆ ಬಾಯಿಗೆ ಬೀಗ ಹಾಕುತ್ತಾರೆ. ಲಿಂಗಾಯತರ ‘ಠೇಕಾ’ ತೆಗೆದುಕೊಂಡ ಖಂಡ್ರೆ, ಅವರ ಪಕ್ಷದ ಸಚಿವ ಕೆ.ಎಚ್‌. ಮುನಿಯಪ್ಪ ಅವರ ಹೇಳಿಕೆಗೂ ಏನೂ ಹೇಳಿಲ್ಲ. ಇನ್ನೂ ಎರಡು ವರ್ಷಗಳಲ್ಲಿ ಅಧಿಕಾರ ಹಸ್ತಾಂತರಿಸಬೇಕಾಗುತ್ತದೆ. ನಾನು ರಾಜೀನಾಮೆ ನೀಡಬೇಕಾಗುತ್ತದೆ ಎಂದು ಹೇಳಿದ್ದಾರೆ.

ಇತ್ತೀಚೆಗೆ ಶಿವಮೊಗ್ಗದಲ್ಲಿ ಟಿಪ್ಪು ಸುಲ್ತಾನ್‌, ಔರಂಗಜೇಬ್‌ನ ಕಟೌಟ್‌ಗಳನ್ನು ಹಾಕಿ ಗಲಭೆ ಸೃಷ್ಟಿಸಲಾಗಿದೆ. ಕೋಮುವಾದ ಕಾಂಗ್ರೆಸ್‌ ಸಂಸ್ಕೃತಿ. ಅದರ ಬಗ್ಗೆ ಮಾತಾಡುತ್ತಿಲ್ಲ. ಬಾಯಿಗೆ ಬೀಗ ಹಾಕಿಕೊಂಡಿದ್ದಾರೆ. ಅವರಿಗೆ ಯಾವ ಕಳಕಳಿ ಇದೆ ಎಂದು ಪ್ರಶ್ನಿಸಿದರು.