ಭೂ ಅಕ್ರಮ | ತಪ್ಪಿತಸ್ಥರ ವಿರುದ್ಧ ಕ್ರಮ: ಪ್ರಜಾವಾಣಿ ವರದಿಗೆ ಜನರ ಪ್ರತಿಕ್ರಿಯೆ

ಸಮಿತಿ ಅಧ್ಯಕ್ಷರು–ಸದಸ್ಯರು ಕಾನೂನು ತಜ್ಞರಲ್ಲ. ಶಾಸಕ ಸ್ಥಾನ ಸರ್ಕಾರಿ ಉದ್ಯೋಗವಲ್ಲ ನಾವು ಜನರ ಪ್ರತಿನಿಧಿಗಳು. ತಹಶೀಲ್ದಾರ್‌ಗೆ ಕಂದಾಯ ಕಾಯ್ದೆ ಬಗ್ಗೆ ಸಂಪೂರ್ಣ ಅರಿವಿರುತ್ತದೆ. ಕಡತ ತಯಾರು ಮಾಡುವುದು ಭೂಮಾಪಕರು ಗ್ರಾಮ ಆಡಳಿತಾಧಿಕಾರಿ ಕಂದಾಯ ನಿರೀಕ್ಷಕರು ಮತ್ತು  ಶೀರಸ್ತೇದಾರರು. ಲೋಪಗಳಿವೆಯೇ ಎಂಬುದನ್ನು ನೋಡಿ ಸಭೆಗೆ ಮಂಡಿಸುವುದು ತಹಶೀಲ್ದಾರ್ ಕೆಲಸ. ಲೋಪ ಆಗದಂತೆ ನಾವೂ ಕುಡ ಆದಷ್ಟು ಎಚ್ಚರ ವಹಿಸಿದ್ದೇವೆ. ಆದರೂ ಭೂಗಳ್ಳರು ನೀಡುವ ಹಣದ ಆಸೆಗೆ ಅನರ್ಹರ ಕಡತಗಳನ್ನೂ ನಮ್ಮ ಕಣ್ತಪ್ಪಿಸಿ ಅಧಿಕಾರಿಗಳು ಮಂಡಿಸಿರುವ ಸಾಧ್ಯತೆಗಳಿರುತ್ತವೆ. ಸತ್ಯ ಮರೆಮಾಚಿ ಸಮಿತಿಯಲ್ಲಿ ಅನುಮೋದನೆ ಪಡೆದಿರಬಹುದು. ಆದ್ದರಿಂದ ಅಷ್ಟೂ ಅಕ್ರಮಕ್ಕೆ ಅಧಿಕಾರಿಗಳೇ ನೇರ ಹೊಣೆ. ಅವರಿಗೆ ಶಿಕ್ಷೆಯಾಗಬೇಕೆ ಹೊರತು ನಿರಪರಾಧಿಗಳಿಗೆ ಅಲ್ಲ.

326 ಸಿಬ್ಬಂದಿ ಸಮಿತಿಯ ಅಧ್ಯಕ್ಷರು ಮತ್ತು ಸದಸ್ಯರು ಅಕ್ರಮಕ್ಕೆ ಹೊಣೆಗಾರರು ಎಂಬುದನ್ನು ತನಿಖಾ ವರದಿ ಹೇಳುತ್ತಿದೆ. ಆದರೆ ಇಬ್ಬರು ತಹಶೀಲ್ದಾರ್‌ಗಳನ್ನು ಅಮಾನತು ಮಾಡಿದ್ದನ್ನು ಬಿಟ್ಟರೆ ಬೇರೆ ಯಾರ ವಿರುದ್ಧವೂ ಕ್ರಮ ಆಗಿಲ್ಲ. ಎಲ್ಲರ ವಿರುದ್ಧ ಮೊದಲು ಎಫ್‌ಐಆರ್ ದಾಖಲಾಗಬೇಕು. ಅಲ್ಲದೇ ಭ್ರಷ್ಟಾಚಾರದ ಬಗ್ಗೆಯೂ ತನಿಖೆಯಾಗಬೇಕು. ಎಕರೆಗೆ ₹1 ಲಕ್ಷ ಕೊಟ್ಟು ಹಣವು ಇಲ್ಲ ಜಮೀನೂ ಇಲ್ಲ ಎಂಬ ಸ್ಥಿತಿಗೆ ರೈತರು ಬಂದಿದ್ದಾರೆ. ಈ ನಡುವೆ ಸರ್ಕಾರ ಅಧಿಕಾರಿ ಮತ್ತು ಸಿಬ್ಬಂದಿಯನ್ನು ರಕ್ಷಿಸುತ್ತಿದೆ ಎಂಬ ಅನುಮಾನ ನಮ್ಮನ್ನು ಕಾಡುತ್ತಿದೆ. ಕಂದಾಯ ಸಚಿವ ಕೃಷ್ಣ ಬೈರೇಗೌಡ ಮತ್ತು ಕಂದಾಯ ಇಲಾಖೆ ಪ್ರಧಾನ ಕಾರ್ಯದರ್ಶಿ ರಾಜೇಂದರ್‌ಕುಮಾರ್ ಕಟಾರಿಯಾ ಅವರು ಪ್ರಾಮಾಣಿಕರು ಎಂದು ನಂಬಿದ್ದೆವೆ. ಆದರೆ ಈಗ ಅಧಿಕಾರಿಗಳಿಗೆ ರಕ್ಷಣೆ ದೊರೆಯುತ್ತಿರುವುದನ್ನು ಗಮನಿಸಿದರೆ ಅನುಮಾನ ಕಾಡುತ್ತಿದೆ. ಅಕ್ರಮ ಬಯಲಿಗೆ ಎಳೆಯುವಲ್ಲಿ ರೈತ ಸಂಘ ಪ್ರಮುಖ ಪಾತ್ರ ವಹಿಸಿದೆ. ಅಕ್ರಮ ಮಾಡಿದವರ ವಿರುದ್ಧ ಕ್ರಮ ಆಗಲೇಬೇಕು. ಕಡೂರು ಮೂಡಿಗೆರೆ ಮಾತ್ರವಲ್ಲ ಇಡೀ ಜಿಲ್ಲೆಯ್ಲಿ ಕಳೆದ 10 ವರ್ಷಗಳ ಭೂಮಂಜೂರಾತಿ ಬಗ್ಗೆ ತನಿಖೆ ನಡೆಸಬೇಕು. ಇನ್ನಷ್ಟು ಅಕ್ರಮ ಹೊರಗೆ ಬರಲಿದೆ. ಆದರೆ ಬದುಕಿಗಾಗಿ ಸರ್ಕಾರಿ ಭೂಮಿ ಉಳುಮೆ ಮಾಡುತ್ತಿರುವ ಬಡವರಿಗೆ ತೊಂದರೆ ಕೊಡಬಾರದು.